လန်ဒန်၊ ကျန်းမာရေး
အောက်စဖို့တက္ကသိုလ်က အက်စထရာဇီနီကာကုမ္ပဏီနှင့် ပူးပေါင်းထုတ်လုပ်သော ကိုဗစ်-၁၉ ရောဂါကာ ကွယ်ဆေးသည် ကလေးငယ်များတွင် ဘေးကင်းစိတ်ချရမှုရှိ၊ မရှိနှင့် ကိုယ်ခံအားတုံ့ပြန်မှုရှိ၊ မရှိကို ပထမဆုံးအကြိမ် လေ့လာမည်ဖြစ်ကြောင်း ထိုတက္ကသိုလ်က ဖေဖော်ဝါရီ ၁၃ ရက်တွင် ထုတ်ပြန်ထားသည်။
အသက် ၆ နှစ်နှင့် ၁၇ နှစ်ကြားရှိကလေးငယ်များအတွက် ကိုဗစ်-၁၉ ရောဂါကာကွယ်ဆေးသည် ထိရောက်မှု ရှိ၊ မရှိကို အလယ်အလတ်အဆင့် လက်တွေ့စမ်းသပ်မှုတွင်ဆုံးဖြတ်သွားမည်ဖြစ်ကြောင်း အောက်စဖို့တက္ကသိုလ် ၏ ထုတ်ပြန်ချက်တွင်ဖော်ပြထားသည်။
ထိုကဲ့သို့ စမ်းသပ်မှုပြုလုပ်ရာတွင် ပါဝင်လိုသူ အယောက် ၃၀၀ နီးပါးက စာရင်းပေးထားပြီး ယခုလတွင် ပထမအကြိမ်ကာကွယ်ဆေးထိုးခြင်းပြုလုပ်သွားမည်ဖြစ်သည်။
အောက်စဖို့တက္ကသိုလ်နှင့် အက်စထရာဇီနီကာကုမ္ပဏီထုတ်ကာကွယ်ဆေးသည် ဈေးသက်သာပြီး အခြား ကိုဗစ်-၁၉ ရောဂါကာကွယ်ဆေးများထက် ဖြန့်ဖြူးရန်လွယ်ကူသဖြင့် ကမ္ဘာကြီးအတွက် အကောင်းဆုံး ကာကွယ်ဆေး အဖြစ် ကြိုဆိုဂုဏ်ပြုခံထားရသည်။
အက်စထရာဇီနီကာကုမ္ပဏီသည် ယခုနှစ်တွင် ကိုဗစ်-၁၉ ရောဂါကာကွယ်ဆေး ၃ ဘီလီယံထုတ်လုပ်ရန် ရည်မှန်းထားကြောင်းသိရသည်။
Ref: TST