နေပြည်တော်၊ လယ်ဝေးမြို့နယ်၌ ဆူပူအကြမ်းဖက်လုပ်ရပ်များတွင် အသုံးပြုရန် ရည်ရွယ်ပြုလုပ်ထားသော ဓား၊ လေးခွ၊ ဂျင်ကလိ၊ လေသေနတ်နှင့် ဆက်စပ်ပစ္စည်းများအား လက်ဝယ်ထားရှိသူနှင့်အတူ ဖမ်းဆီးရမိ
နေပြည်တော်၊ မတ်လ ၁၈
၂၀၂၁ ခုနှစ်၊ မတ်လ ၁၈ ရက်နေ့ မွန်းလွဲ ၁ နာရီ ၁၀ မိနစ်အချိန်တွင် နေပြည်တော်၊ လယ်ဝေးမြို့နယ်၌ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့သည် ရပ်ရွာအေးချမ်း သာယာရေးနှင့် တရားဥပဒေစိုးမိုးရေးအတွက် လှည့်ကင်းဆောင်ရွက်နေစဉ် အမှတ်(၃)ရပ်ကွက်၊ ပေတောကုန်း(၁) လမ်း၊ အိမ်အမှတ် (၃/၄၇၈)နေ စိန်လှိုင်ဦး(ခ) ရှမ်းလေး (၄၃)နှစ် (ဘ) ဦးဘမောင်၏ နေအိမ်တွင် ဆူပူအကြမ်းဖက်မှုများတွင် အသုံးပြုရန်အတွက် ဂျင်ကလိများပြုလုပ်နေကြောင်း သတင်းအရ ဝင်ရောက်ရှာဖွေစစ်ဆေးခဲ့ပါသည်။
ထိုသို့ရှာဖွေစစ်ဆေးရာတွင် စိန်လှိုင်ဦး(ခ) ရှမ်းလေး၏နေအိမ်အောက်ထပ် အိပ်ခန်းအတွင်းမှ အလျား ၆ လက်မခန့်ရှိ ဆိုင်ကယ်စမုတ်တံများအား အဖျားချွန် ငါးမျှားချိတ်ပုံသဏ္ဍာန်ဂျင်ကလိ ၁၈ ချောင်း၊ လေထိုးတံပါ အလျား ၃ ပေ ၅ လက်မခန့်ရှိ သစ်သားကိုယ်ထည်ဖြင့် ပြုလုပ်ထားသော လေသေနတ် ၁ လက်၊ အရိုးအသွား ၂၉ လက်မခန့်ရှိ ဓားဦးချွန် ၁ ချောင်း၊ လေးခွ ၁ လက်၊ လက်ကိုင်လျှပ်စစ် သံဖြတ်စက် ၁ လုံး၊ လက်ကိုင်လျှပ်စစ်ဖောက်စက် ၁ လုံး၊ လေးခွဖြင့်ပစ်ခတ်ရသည့် ကုန်းသီးနှင့် လောက်စလုံးများ၊ လက်သမားသုံး ပစ္စည်းများအား ရှာဖွေသိမ်းဆည်းရမိခဲ့ပါသည်။
သိမ်းဆည်းရမိသော သက်သေခံပစ္စည်းများနှင့်ပတ်သက်၍ လက်ဝယ်တွေ့ရှိသူ စိန်လှိုင်ဦး(ခ) ရှမ်းလေးအား ဥပဒေအရအရေးယူနိုင်ရေး ဆက်လက်ဆောင်ရွက်လျက်ရှိကြောင်း သတင်းရရှိ ပါသည်။