ဗြိတိန်က ကိုဗစ်-၁၉ ရောဂါ ကုသဆေးကို မကြာမီ လက်တွေ့ စမ်းသပ်မည်
ဗြိတိန်နိုင်ငံက ကိုဗစ်-၁၉ ရောဂါ ကုသဆေးကို မကြာမီလက်တွေ့ စမ်းသပ်မည် ဖြစ်ကြောင်း ဗြိတိန်ကျန်းမာရေး ဌာနမှ ဆေးဘက်ဆိုင်ရာ အကြံပေး အရာရှိချုပ်က နိုဝင်ဘာ ၇ ရက်တွင် ပြောသည်။
အဆိုပါ ကုသဆေးသည် မာ့(ခ်)ကုမ္ပဏီထုတ် မိုနျူပီရာဗီရာဆေး ဖြစ်ပြီး လက်တွေ့ စမ်းသပ်မှုကို ယခုလနှောင်းပိုင်းတွင် လုပ်ဆောင်မည်ဖြစ်ကြောင်း အကြံပေး အရာရှိချုပ် ဆူဆန်ဟော့ကင်းက ပြောခြင်းဖြစ်သည်။
ထိုကုသဆေးကို အမေရိကန်နိုင်ငံ အခြေစိုက် မာ့(ခ်)ကုမ္ပဏီနှင့် ရစ်ချဘတ် ကုမ္ပဏီတို့က ပူးတွဲဖော်စပ်ထားခြင်းဖြစ်ပြီး အဆိုပါဆေးက ကိုဗစ်-၁၉ ရောဂါကုသမှုကိုအလှည့်အပြောင်း ဖြစ်သွားစေနိုင်သည်။
ဗြိတိန်နိုင်ငံသည် ထိုဆေးကို အသုံးပြုရန် ပြီးခဲ့သည့်သီတင်းပတ်တွင် အတည်ပြုခဲ့ခြင်းဖြစ်သည့်အတွက် ကိုဗစ်-၁၉ ရောဂါ ကုသဆေး အသုံးပြုမည့် ကမ္ဘာ့ပထမဆုံး နိုင်ငံ ဖြစ်လာသည်။
ဗြိတိန်အစိုးရအနေဖြင့် မာ့(ခ်)ကုမ္ပဏီထုတ် ကိုဗစ်-၁၉ ရောဂါ ကုသဆေး အပတ်ရေ ၄၈ဝဝဝဝ အတွက် မှာယူထားပြီး ဖြစ်ကြောင်းနှင့် ဖိုင်ဇာကုမ္ပဏီထုတ် အလားတူကုသဆေး အပတ်ရေ ၂၅ဝဝဝဝ ကိုလည်း မှာယူထားကြောင်း တာဝန်ရှိသူများက အောက်တိုဘာလတွင် ပြောသည်ဟု သိရသည်။