မလေးရှား၌ ကိုဗစ်-၁၉ ရောဂါကြောင့် သေဆုံးသူ အများစု ဆီးချို၊ သွေးတိုးရောဂါများနှင့် ဆက်နွှယ်နေဟုဆို
မလေးရှားနိုင်ငံ၌ ကိုဗစ်-၁၉ ရောဂါ ကြောင့် သေဆုံးသူအများစုသည် ဆီးချိုရောဂါ၊ သွေးတိုးရောဂါတို့နှင့် ဆက်နွှွယ် နေကြောင်း ကျန်းမာရေး ဝန်ကြီးဌာနက ထုတ်ပြန်သည်။
ယခုနှစ်အောက်တိုဘာ ၂၈ ရက်အထိ ကိုဗစ်-၁၉ ရောဂါကြောင့် သေဆုံးသူများ အနက် ၃၇ ဒသမ ၃ ရာခိုင်နှုန်း သို့မဟုတ် လူ ၁ဝ ဦးလျှင် လေးဦးခန့်သည် ဆီးချိုရောဂါ ဖြစ်နေသူများဖြစ်သည်။
အဆိုပါအရေအတွက်သည် ပြီးခဲ့သည့် နှစ်ထက်အနည်းငယ်လျော့ကျပြီး ၂ဝ၂ဝ ပြည့်နှစ်တွင် ကိုဗစ်-၁၉ ရောဂါကြောင့် သေဆုံးသူများအနက် ဆီးချိုရောဂါဖြစ်ပွားသူ ၃၈ ဒသမ ၈ ရာခိုင်နှုန်းရှိကြောင်း ကျန်းမာရေး ဝန်ကြီးဌာန၏ ကူးစက်ရောဂါ ထိန်းချုပ်ရေးဌာနခွဲမှ ဒုတိယညွှန်ကြားရေးမှူး ဖေဆယ်အစ်ဝမ်မူစတာဖာက ပြောသည်။
ကမ္ဘာတစ်ဝန်း၌ မကူးစက်တတ်သော ရောဂါအခံရှိသူများ အနေဖြင့် စိုးရိမ်ရသော ကူးစက်ရောဂါများနှင့် ကိုဗစ်-၁၉ ရောဂါတို့ကြောင့် သေဆုံးနိုင်ခြေ များသည်ကို ၎င်းတို့အနေဖြင့် သိရှိထားကြောင်း၊ အထူးသဖြင့် ဆီးချိုရောဂါရှိသူများ၏ အခြေအနေသည် စိုးရိမ်ရပါက ထိုအချက်မှာ ပိုမိုမှန်ကန်ကြောင်း ဖေဆယ်အစ်ဝမ်မူစတာဖာကပြောသည်။
ထို့ပြင် ဆီးချိုရောဂါရှိသူ တစ်ဦး ကိုဗစ်-၁၉ ရောဂါ ကူးစက်ခံရပါက ရောင်ရမ်းခြင်းအပါအဝင် ပြင်းထန်သော ဝေဒနာများကို ခံစားရနိုင်ကြောင်း ၎င်းကဆက်ပြောသည်။
မလေးရှားနိုင်ငံ၌ အရွယ်ရောက်သူ ငါးဦးလျှင် တစ်ဦးနီးပါး သို့မဟုတ် ခန့်မှန်းခြေအားဖြင့် လူ ၃ ဒသမ ၉ သန်းတွင် ဆီးချိုရောဂါရှိနေသည်။
သို့သော် ယင်းတို့အနက် ထက်ဝက်ခန့်အနေဖြင့် ၎င်းတို့၌ ဆီးချိုရောဂါရှိနေသည်ကို သတိမပြုမိသည့် အချက်မှာ ပိုမိုစိုးရိမ်စရာကောင်းကြောင်း ကျန်းမာရေးဝန်ကြီးဌာန ညွှန်ကြားရေးမှူးချုပ် နူအောဟီရှမ်အဗ္ဗဒူလာက ပြောထားသည်။