အချိန်အပိုင်းအခြားအလိုက် အစာမစားဘဲနေခြင်း (Intermittent Fasting) နှင့် ကျန်းမာရေး
အချိန်အပိုင်းအခြားအလိုက် အစာမစားဘဲနေခြင်း (Intermittent Fasting) ဆိုတာကတော့ တစ်ရက်အတွင်း အစာစားချိန်နဲ့ လုံးဝမစားရမယ့်အချိန်တို့ကို သတ်မှတ်ကာ လိုက်နာဆောင်ရွက်ခြင်းပဲဖြစ်ပါတယ်။ အချိန်အပိုင်းအခြားအလိုက် အစာမစားဘဲ နေခြင်းဟာ လွန်ခဲ့သော နှစ်အနည်းအငယ်အတွင်းကတည်းက ကိုယ်ခန္ဓာအလေးချိန် လျှော့ချလိုသူတွေကြားမှာ အထူးရေပန်းစား လာပါတယ်။ အချိန်အပိုင်းအခြားအလိုက် အစာငတ်ခံခြင်းနဲ့ ကာဗွန်ဟိုက်ဒရိတ်လျှော့ချ ထားတဲ့ ကီတိုအစားအသောက်စားခြင်း (Keto Diet)တို့ဟာ အင်ဆူလင်ထွက်ရှိမှုပမာဏကို လျော့ကျစေပြီး ကိုယ်အလေး ချိန်ကိုလည်း ကျစေပါတယ်။ ထို့ပြင် အစာငတ်ခံခြင်းဟာ ကျန်းမာရေးအတွက် အကျိုးကျေးဇူးတွေလည်း များစေတယ်လို့ သုတေသနများကဆိုပါတယ်။ ဘယ်လိုအကျိုး ကျေးဇူးတွေလဲဆိုတော့ စွမ်းအင်တိုးစေခြင်း၊ အစာခြေစနစ်ကောင်းစေခြင်း၊ လေပွခြင်းကို လျော့ကျစေခြင်း၊ မှတ်ဉာဏ်တိုးစေခြင်း၊ အိပ်စက်ခြင်းနှင့် အရေပြားအတွက်ကောင်းစေခြင်း စတဲ့အကျိုးထူးတွေ ရရှိလာနိုင်တယ်လို့ဆိုပါတယ်။ ထို့ပြင် ခန္ဓာကိုယ်မှာ ရောင်ရမ်းမှုများ ကျစေခြင်း၊ နှလုံးသွေးကြောထိခိုက်ခြင်း၊ ကင်ဆာနှင့် ပန်းနာ ရင်ကျပ်ကဲ့သို့သော ရောဂါဖြစ်ပွားမှုလျော့ကျ စေခြင်းနဲ့ အသက်ရှည်စေခြင်း စတဲ့အကျိုးတွေရရှိနိုင်တယ်လို့ ဆိုပြန်ပါတယ်။
အချိန်အပိုင်းအခြားအလိုက် အစာမစားဘဲနေခြင်းဟာဆိုရင် သင်ဘာစားသလဲဆိုတာကို အာရုံမထားပါဘူး။ သင်ဘယ်အချိန် စားလဲဆိုတာကိုသာ ဖိုးကပ်စ် (Focus) လုပ်တာဖြစ်ပါတယ်။ သင်ဟာ အသီးအနှံကိုသာ အားပြုစားတာလား၊ သို့တည်းမဟုတ် ကာဗွန်ဟိုက်ဒရိတ်အနည်းငယ်သာပါဝင်တဲ့ အစားအစာကို စားသလား စတာတွေဟာ အချိန်အပိုင်းအခြားအလိုက် အစာငတ်ခံ ခြင်းမှာ အရေးမကြီးပါဘူး။ အချိန်ဘယ်လောက်ခွာပြီး အစာစားလေ့ရှိသလဲဆိုတာကိုသာ ဖိုးကပ်စ်လုပ်ပါတယ်။ သင်ဘာပဲစားရ မယ်လို့ ဆိုတာကို အချိန်အပိုင်းအခြားအလိုက်အစာမစားဘဲနေခြင်းစနစ် (Intermittent Fasting) မှာ ကန့်သတ် မထားပါဘူး။ လူအများစုဟာ အချိန်အပိုင်းအခြားအလိုက်အစာငတ်ခံခြင်းကို ယေဘုယျအားဖြင့် လိုက်လုပ်နိုင်ကြပါတယ်။ ဘာလို့လဲ ဆိုတော့ လူတစ်ဦးဟာ တစ်ရက်ကို ၇ နာရီကနေ ၈ နာရီအထိဘာမှမစားမသောက်ဘဲ အိပ်လေ့ရှိသောကြောင့်ပါပဲ။ အဆိုပါ အိပ်ချိန်ထက် နာရီအနည်းငယ်ပိုပြီးတော့ အစာမစားမယ့်အချိန်သတ်မှတ်လိုက်ရုံနဲ့ ဖော်ပြပါ နည်းစနစ်ကို လိုက်နာဆောင်ရွက်ပြီး ဖြစ်စေပါတယ်။
အချိန်အပိုင်းအခြားအလိုက် အစာမစားဘဲနေခြင်း (Intermittent Fasting) နည်းစနစ်များနှင့် အကျိုးကျေးဇူး
အချိန်အပိုင်းအခြားအလိုက် အစာမစားဘဲနေခြင်းဟာ လေ့ကျင့်ခန်းတစ်ခုလုပ်သလိုပါပဲ။ သူ့မှာ နည်းစနစ်ပုံစံ များစွာရှိပြီး ပြင်းထန်မှု ပုံစံတွေဟာလည်း မတူညီပါဘူး။ အသုံးအများဆုံးနည်းစနစ်များနှင့် ပုံစံများကိုတော့ အောက်မှာ ဖော်ပြထား ပါတယ်-
အချိန်အပိုင်းအခြားအလိုက် အစာမစားဘဲနေခြင်းနည်းစနစ်သည် ရေရှည်မှာကျန်းမာရေးအတွက် ကောင်းနိုင်ပါ့မလား?
ဖော်ပြပါဇယားမှာပါရှိသလို အစာစားမှုကို အချိန်အပိုင်းအခြားအလိုက်သာစားသုံးခြင်းဖြင့် သွေးတွင်းအင်ဆူလင်ဓာတ်နှင့် သွေးတွင်း သကြားဓာတ်များ၊ ရောင်ရမ်းမှုများနှင့် ဦးနှောက်ဆဲလ်များအတွက် ကောင်းကျိုးများရရှိစေသလို သွေးပေါင်ကျစေခြင်း၊ ကင်ဆာ အတွက်အန္တရာယ်ဖြစ်စေနိုင်မှု လျော့နည်းစေခြင်း စတဲ့အကျိုးကျေးဇူးများလည်း ရရှိနိုင်တယ်လို့ဆိုပါတယ်။ ကိုယ်အလေးချိန် ကျဆင်းစေခြင်းအတွက်လည်း အထောက်အကူဖြစ်စေကြောင်း သိရှိရပါတယ်။ ထိုသို့အစာဖြတ်ခြင်း နည်းလမ်းကျင့်သုံးမယ်ဆိုရင် မိမိအနေနဲ့ ဘာကိုဦးတည်လဲဆိုတဲ့ အပေါ်မှာလည်း မူတည်ပါတယ်။ အကယ်လို့ စွမ်းအားတိုးဖို့၊ အစာခြေစနစ်ကောင်းဖို့၊ အိပ်ကောင်းဖို့ ဆိုရင်တော့ တစ်ရက်လျှင် ၁၂ နာရီမှ ၁၆ နာရီအထိ အစာမစားဘဲနေခြင်းက သင့်လျော်ပါတယ်။ အကယ်လို့ ကိုယ်ခန္ဓာ အတွင်း အဆိပ်အတောက်များကို ဖယ်ရှားချင်တာ၊ ခန္ဓာကိုယ်ရှိ ဆဲလ်အဟောင်းများ၊ အသေများကို ဖယ်ရှားလိုတာဆိုရင်တော့ ၂၄ နာရီ အစာဖြတ်ခြင်းဟာ သင့်လျော်ပါတယ်။ ထိုသို့အစာဖြတ်ထားခြင်းဖြင့် ခန္ဓာကိုယ်ရှိ ဆဲလ်အဟောင်းများ၊ အားနည်းသွားသည့် ဆဲလ်များကို လောင်ကျွမ်းစေခြင်းဖြင့် ခန္ဓာကိုယ်အတွက် လိုအပ်တဲ့စွမ်းအင်ကိုရရှိအောင် ခန္ဓာကိုယ်က သူ့နည်းသူ့ဟန်ဖြင့် ရှာဖွေတာဖြစ်တဲ့အတွက် ခန္ဓာကိုယ်ကို အဆိပ်အတောက်ဖြစ်စေတဲ့ ဆဲလ်ဟောင်းများနှင့် ဓာတ်တိုးပစ္စည်းများကို လျော့ကျစေမှာ ဖြစ်တာကြောင့် ပါကင်ဆန်ရောဂါလို၊ အသက်ကြီးလို့ဖြစ်တတ်တဲ့ မေ့တတ်တဲ့ရောဂါမျိုးလို၊ ကင်ဆာကဲ့သို့သော ရောဂါမျိုးတွေလို ဖြစ်ပွားမှုလျော့ကျအောင် ကူညီနိုင်မှာဖြစ်ပါတယ်။ အကယ်၍ သင့်ရဲ့ဦးတည်ချက်ဟာ ကိုယ်အလေးချိန်လျော့ကျစေဖို့ဆိုရင် ဖော်ပြပါအစာ ဖြတ်ခြင်းနည်းစနစ်တွေကအလုပ်ဖြစ်နိုင်ပါတယ်။ အချို့သူတွေကတစ်ရက်လျှင် ၁၂ နာရီ သို့မဟုတ် ၁၆ နာရီ အစာမစားဘဲနေခြင်းဖြင့် ကိုယ်အလေးချိန်လျော့ကျစေသလို အချို့တွေမှာတော့ တစ်ရက်လျှင် ၁၈ နာရီခန့် သို့မဟုတ် ၂၄ နာရီခန့် အစာမစားဘဲနေနိုင်ဖို့ လိုအပ်တာ တွေ့ရပါတယ်။ တစ်ယောက်နဲ့ တစ်ယောက်မတူနိုင်ပါဘူး။
မည်သူတွေဟာ အချိန်အပိုင်းအခြားအလိုက်အစာမစားဘဲနေခြင်းစနစ်ကို မကျင့်သုံးသင့်ဘူးလဲ?
ကိုယ်ဝန်ဆောင်မိခင်တွေ၊ နို့တိုက်မိခင်တွေ၊ နဂိုပိန်သူတွေနှင့် အစားအသောက်နှင့် ပတ်သက်လို့ပုံမှန်မဟုတ်သူတွေအနေနဲ့ကတော့ ဖော်ပြပါအချိန်ပိုင်း အစာမစားခြင်းစနစ်ကို မကျင့်သုံးသင့်ပါဘူး။ ထို့ပြင် ဆီးချိုဝေဒနာရှင်တွေ၊ ရောဂါတစ်ခုခုကြောင့် ဆေးသောက် နေရသူတွေနှင့် ရောဂါအခံရှိသူတွေ အနေနဲ့လည်း အဆိုပါနည်းစနစ်ကို မကျင့်သုံးသင့်ပါဘူး။
ကျန်းမာရေးနှင့်ညီညွတ်မှုအရှိဆုံး အချိန်အပိုင်းအခြားအလိုက် အစာမစားခြင်းပုံစံ (Intermittent Fasting) ကဘာလဲ?
သင်ဟာ အဆိုပါစနစ်ကို အခုမှစတင်ကျင့်သုံးသူဆိုရင် စစချင်း ၁၂း၁၂ သို့မဟုတ် ၁၄း၁၀ စနစ်နဲ့ စသင့်ပါတယ်။ ဆိုလိုတာက အစာမစားဘဲနေရန် အချိန်သတ်မှတ်ချက်ကို တစ်ရက်လျှင် ၁၂ နာရီ သို့မဟုတ် ၁၄ နာရီ သတ်မှတ်ပြီးတော့ နေထိုင်ကာ ကျန်သည့် အချိန်အတွင်းတွင်သာ အစာစားခြင်းပြုလုပ်ရန်ဖြစ်ပါတယ်။ ဒါကို နေ့တိုင်း သို့မဟုတ် တစ်ပတ်လျှင် အကြိမ်အနည်းငယ် လုပ်ဆောင်နိုင်ပါတယ်။ နောက်ပိုင်းမှာ မိမိလိုလားချက် ပြည့်မီဖို့တဖြည်းဖြည်းနဲ့အချိန်တွေ တိုးမြင့်လုပ်ဆောင်နိုင်ပါတယ်။ ကျန်းမာရေးနှင့် အညီညွတ်ဆုံး အချိန်အပိုင်းအခြားအလိုက် အစာမစားဘဲနေခြင်းစနစ်ဆိုတာ မိမိအတွက်ရုပ်ပိုင်းကော စိတ်ပိုင်းပါ သက်သောင့်သက်သာရှိရှိနဲ့ စဉ်ဆက်မပြတ်လုပ်ဆောင်နိုင်မယ့်ပုံစံဖြစ်ပါတယ်။
အချိန်ပိုင်းအစာဖြတ်ခြင်းစနစ်ဟာ အတိုင်းအဆနဲ့ အစာစားရတဲ့စနစ် (Diet) လုပ်ခြင်းမဟုတ်ပါဘူး။ ဒါဟာဆိုရင် နေထိုင်မှုပုံစံ တစ်ခုမျှသာဖြစ်ပါတယ်။ ကိုယ်သတ်မှတ်ထားတဲ့ အချိန်အပိုင်းအခြားအလိုက် အစာစားခြင်း၊ အစာမစားခြင်းလုပ်တာပဲဖြစ်ပြီး ပြောင်းလွယ်ပြင်လွယ်ရှိတာကြောင့် ရေရှည်ထိန်းသိမ်းနိုင်မယ့် နေထိုင်မှုပုံစံပဲဖြစ်ပါတယ်။ သင့်ရဲ့ အချိန်ပိုင်းအစာမစားခြင်းကို သင့်ရဲ့ရည်မှန်းချက်တို့ သင့်ရဲ့ နေ့စဉ်လူနေမှုဘဝတို့အပေါ် မူတည်ပြီး ညှိနိုင်ပါတယ်။ (ဥပမာ- တနင်္လာမှ သောကြာအထိကို ၁၈ နာရီ အစာမစားခြင်း (၁၈း၆)လုပ်ဆောင်ပြီး စနေနဲ့ တနင်္ဂနွေနေ့များမှာတော့ ပုံမှန်အတိုင်းစားခြင်း၊ ဒါမှမဟုတ် တနင်္လာတစ်ရက်ကို လုံးဝ အစာမစားဘဲ ကျန်တဲ့ရက်များတွင် ပုံမှန်အတိုင်းစားခြင်း၊ ဒါမှမဟုတ် နေ့တိုင်း ၁၄ နာရီခန့်အစာမစားဘဲနေခြင်း၊ တစ်လလုံး မနက်စာ မစားဘဲနေခြင်း)၊ နောက်တစ်လတွင် ညစာမစားဘဲနေခြင်း)။ မျိုးစုံလုပ်ဆောင်ကြည့်ပြီး မိမိနှင့်သင့်တော်မည့် ပုံစံတစ်ခုရရှိနိုင်မှာ ဖြစ်ပါတယ်။ အချိန်အပိုင်းအခြားအလိုက် အစာမစားပဲနေခြင်းစနစ်ဟာ သင့်အတွက် လွယ်ကူပြီး ကျန်းမာလာစေဖို့ပဲ ဖြစ်သင့်တာပါ။
အချိန်အပိုင်းအခြားအလိုက် အစာမစားဘဲနေခြင်းစနစ်ဟာ ကျန်းမာရေးအတွက် အကျိုးကျေးဇူးရရှိရုံတင်မကဘဲ အစာရွေးချယ် စားသုံးစရာမလိုခြင်းကြောင့် အစားအစာရွေးချယ်ခြင်းမှ ကင်းလွတ်သည့် ခံစားချက်များရရှိစေကာ ယုံကြည်မှုတိုးစေခြင်း၊ အစား အစာနှင့် ခန္ဓာကိုယ်ဆက်သွယ်မှု စနစ်ပိုကောင်းလာခြင်း စတဲ့အကျိုးများလည်း ခံစားနိုင်ပါတယ်။ ဒါပေမဲ့လို့ အချိန်ပိုင်း အစာဖြတ် ခြင်းစနစ်ကို လူတိုင်းမလုပ်သင့်ပါဘူး။ မိမိကျန်းမာရေးအခြေအနေအရ ဆရာဝန်နဲ့ မေးမြန်းတိုင်ပင်လုပ်ဆောင်သင့်ပါတယ်။ ထို့ပြင် မိမိနဲ့ကိုက်ညီမယ့် အချိန်ပိုင်းစနစ်ကို သေချာရွေးချယ်တတ်ဖို့လိုပါတယ်။
အချုပ်ဆိုရလျှင် အချိန်အပိုင်းအခြားအလိုက် အစာမစားဘဲနေခြင်း (Intermittent Fasting)ဟာ အစာရွေးချယ်စားသုံးခြင်း (Low Calorie Diet) သို့မဟုတ် အစာလျှော့စားသုံးခြင်း (Diet) ကဲ့သို့ပင် အကျိုးကျေးဇူးများပါတယ်။ အထက်မှာဖော်ပြခဲ့ပြီးသကဲ့သို့ ၎င်းနည်းစနစ်ဟာ သင်ဘာတွေရွေးချယ်စားရမယ်ဆိုတာကို အထူးမပြုပါဘူး။ သင်ဘယ်အချိန်မှာပဲ အစာစားသင့်တယ်၊ အချိန်ဘယ် လောက် အစာမစားဘဲနေရမယ်ဆိုတာကိုသာ ညွှန်းဆိုပါတယ်။ သတိပြုရမှာကတော့ စတင်ကျင့်သုံးတဲ့ တစ်လ၊ နှစ်လအတွင်းမှာ ဆာလောင်ခြင်း၊ ပင်ပန်းနွမ်းနယ်ခြင်း၊ ခေါင်းကိုက်ခြင်း၊ ကိုယ်လက်မအီမသာဖြစ်ခြင်း၊ ညဘက်အိပ်မပျော်ခြင်း စသည့်အဆာခံ နေထိုင်သည့် အလေ့အကျင့်အထမမြောက်ခင် ခံစားရတဲ့ဝေဒနာများတော့ ခံရနိုင်ပါတယ်။ အလေ့အကျင့်ဖြစ်သွားတဲ့အခါမှာတော့ ခက်ခဲမှုမရှိတော့ဘဲ ဖော်ပြပါကျန်းမာရေး အကျိုးကျေးဇူးများရရှိနိုင်မှာ ဖြစ်ပါကြောင်း ရေးသားလိုက်ရပါတယ်။ ။
ကိုဇေ