အိန္ဒိယနိုင်ငံမှ မြန်မာနိုင်ငံသို့ ကိုဗစ်-၁၉ ရောဂါ ကာကွယ်ဆေး COVAXIN တစ်သန်းလှူဒါန်း
နေပြည်တော် ဒီဇင်ဘာ ၂၃
အိန္ဒိယအစိုးရမှ မြန်မာနိုင်ငံသို့ ကိုဗစ်-၁၉ ရောဂါကာကွယ်ဆေး COVAXIN တစ်သန်းအား လွှဲပြောင်းပေးအပ်သည့် အခမ်းအနားကို ဒီဇင်ဘာ ၂၂ ရက် ညနေ ၄ နာရီခွဲတွင် နေပြည်တော် အပြည်ပြည်ဆိုင်ရာ လေဆိပ် အရေးကြီးပုဂ္ဂိုလ် ဧည့်ခန်းမဆောင်၌ ကျင်းပသည်။
အခမ်းအနားတွင် အိန္ဒိယနိုင်ငံခြားရေး အတွင်းဝန် H.E. Shri Harsh Vardhan Shringleက မြန်မာနိုင်ငံကြက်ခြေနီ အသင်းကိုယ်စားလှယ် ဦးမြင့်ထွန်းဟန်ထံ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန၊ ကျန်းမာရေး ဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနတို့မှ ကိုယ်စားလှယ်များ၏ ရှေ့မှောက်တွင် ကိုဗစ်-၁၉ ကာကွယ်ဆေးများကို လွှဲပြောင်းပေးအပ်သည်။ အိန္ဒိယနိုင်ငံခြားရေး အတွင်းဝန်နှင့်အတူ အိန္ဒိယကိုယ်စားလှယ်အဖွဲ့၊ မြန်မာနိုင်ငံဆိုင်ရာ အိန္ဒိယသံအမတ်ကြီး ဆော်ရက်(ဘ်)ကူမားနှင့် တာဝန်ရှိသူများ တက်ရောက်ကြသည်။
အိန္ဒိယနိုင်ငံက လှူဒါန်းသည့် ကိုဗစ်-၁၉ ရောဂါကာကွယ်ဆေးများကို လေကြောင်း ဖြင့် အသုတ်လိုက် ပေးပို့သွားမည်ဖြစ်သည်။
ပထမအသုတ် ပို့ဆောင်မှုသည် ရန်ကုန် အပြည်ပြည်ဆိုင်ရာ လေဆိပ်သို့ မြန်မာအမျိုးသား လေကြောင်းလိုင်း၏ ကယ်ဆယ်ရေး လေယာဉ်ဖြင့် ဒီဇင်ဘာ ၂၂ ရက်တွင် ရောက်ရှိခဲ့ကြောင်း သိရသည်။