မွန်ပြည်နယ်ရှိ ကျွဲကောစိုက်ပျိုးသူများ ကျွဲကောသီး အထွက်နည်းပါးချိန်တွင် အဝယ်လိုက်နေသောကြောင့် ဈေးကောင်း ရနေ
ကျွဲကောသီး အထွက်နည်းပါးချိန်တွင် အဝယ်လိုက်နေသောကြောင့် ဈေးကောင်း ရရှိနေကြောင်း မွန်ပြည်နယ်ရှိ ကျွဲကော စိုက်ပျိုးသူများ၏ ပြောကြားချက်အရ သိရသည်။
လတ်တလောတွင် ပန်းရောင် (၁) ကျွဲ ကောသီးတစ်လုံးလျှင် ငွေကျပ် ၂၄၀၀ ဝန်းကျင် ရရှိနေကြောင်း သိရသည်။
“ ကျွဲကောသီးက ဒုတိယအသုတ်ထွက်တဲ့ ရာသီချိန်အစမှာကတည်းက ဈေး ကောင်းနေတာပါ။ အခု အသီး ပိုရှားချိန်ဆိုတော့ အဝယ်ပိုလိုက်ပြီး ဈေးကောင်းလာတယ်။ ရန်ကုန်မြို့ကို အဓိက တင်ပို့ပါတယ်။ အခုက နောက်သီးလေးတွေဆိုတော့ ပိုအထားခံတယ်။ ပန်းရောင်သီးက ရောင်းအား ပိုကောင်းတယ် ” ဟု မွန်ပြည်နယ်မှ ကျွဲကောစီးပွားဖြစ် စိုက်ပျိုးသူ ဦးမင်းစိုးကပြောသည်။
ပြည်တွင်းမှစိုက်ပျိုးထွက်ရှိသည့် ကျွဲ ကောသီးများတွင် ပန်းရောင်နှင့် အဖြူဟူ၍ ရှိပြီး အဖြူသီးများမှာ အရသာပိုမိုကောင်း မွန်သော်လည်း ပန်းရောင်သီးများမှာ ပိုမို တာရှည်ခံလေ့ ရှိကြောင်း သိရသည်။
ကျွဲကောသီးကို ရန်ကုန်တိုင်းဒေသကြီး ၌ ဧက ၃၀၀ ကျော်၊ မွန်ပြည်နယ်၌ ၃၂၀၄ ဧက အပါအဝင် ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်း ဒေသကြီး၊ ကရင်ပြည်နယ်နှင့် ကချင်ပြည် နယ်တို့၌ စိုက်ပျိုးလျက် ရှိကြောင်း သိရသည်။
ယခုနောက်ပိုင်းတွင် ဧရာဝတီတိုင်း ဒေသကြီး၌ ကျွဲကောသီးကို သီးညှပ်စိုက်ပျိုး ခြင်းအပြင် ကချင်ပြည်နယ်၌လည်း တိုးချဲ့ စိုက်ပျိုးလာကြောင်း သိရသည်။