မောင်တောမြို့နယ်နှင့် ပေါက်တောမြို့နယ်တို့၌ ကိုဗစ်-၁၉ ရောဂါကာကွယ်ဆေး ဆက်လက်ထိုးနှံ
ရခိုင်ပြည်နယ် မောင်တောမြို့နယ်အတွင်းရှိ ကိုဗစ်-၁၉ ရောဂါကာကွယ်ဆေး နှစ်ကြိမ်ထိုးနှံပြီးစီးသော ဦးတည်အုပ်စုတွင် ပါဝင်သူများအား ထပ်ဆောင်း ကာကွယ်ဆေး ထိုးနှံပေးခြင်းကို မေ ၂၇ ရက်တွင် သတ်မှတ်စုရပ်နေရာများ၌ ဆက်လက် ထိုးနှံပေးလျက်ရှိသည်။
အဆိုပါ ထပ်ဆောင်း ကိုဗစ်-၁၉ ရောဂါ ကာကွယ်ဆေး Booster Dose ထိုးနှံပေးခြင်းကို မေ ၂၆ ရက်တွင် ကျန်းမာရေး ဝန်ထမ်းနှစ်ဦး၊ ပညာရေး ဝန်ထမ်းလေးဦး၊ ပြည်သူ ၇၆၉ ဦး စုစုပေါင်း ၇၇၅ ဦး အားထိုးနှံပေးပြီး မေ ၂၇ ရက်အထိ ထပ်ဆောင်း ကိုဗစ်-၁၉ ရောဂါကာကွယ်ဆေး Booster Dose ထိုးနှံပြီးစီးသူ ၁၄၆၆၆ ဦးအား ကျန်းမာရေး ဝန်ကြီးဌာန၏ လမ်းညွှန်ချက်များနှင့်အညီ ဆက်လက် ထိုးနှံပေးပြီးဖြစ်သည်။
အလားတူရခိုင်ပြည်နယ် ပေါက်တောမြို့နယ်၌ ဒေသခံပြည်သူများအား ကိုဗစ်-၁၉ ရောဂါ ကာကွယ်ဆေး Covaxinထိုးနှံပေးခြင်းကို ပေါက်တောမြို့နယ်အတွင်း သတ်မှတ်ထားသော ဆေးထိုးစုရပ်နေရာများ၌ မေ ၂၇ ရက်တွင် ဆက်လက် ထိုးနှံပေးလျက်ရှိသည်။
ထို့နောက် မြို့နယ်ပြည်သူ့ ကျန်းမာရေး ဦးစီးဌာနမှ ကျန်းမာရေး ဝန်ထမ်းများက ကိုဗစ်-၁၉ ရောဂါ ကာကွယ်ဆေးကို ကျန်းမာရေး ဝန်ကြီးဌာန၏ သတ်မှတ် စည်းကမ်းချက်များနှင့်အညီ ဆေးမထိုးမီ ကိုယ်အပူချိန် တိုင်းတာပေးခြင်း၊ သွေးပေါင်ချိန် တိုင်းတာပေးခြင်းတို့ကို ပြုလုပ်ဆောင်ရွက်ပေးကြပြီး ပုံမှန်အခြေအနေရှိသူများကိုသာ ကာကွယ်ဆေးထိုးနှံပေးကာ ထိုးနှံပြီးသူများအား မိနစ် ၃၀ ခန့် စောင့်ကြည့်၍ ထိုးနှံပေးလျက်ရှိကြောင်း သိရသည်။