ဂျယ်ဂျူးကျွန်းကမ်းလွန်၌ လူ ၂၂ ဦးပါကုန်တင်သင်္ဘောတစ်စင်းနစ်မြုပ် ၁၄ ဦးကို ကယ်ဆယ်ထားနိုင်
တောင်ကိုရီးယားနိုင်ငံတောင်ပိုင်းရှိ ဂျယ်ဂျူးကျွန်းကမ်းလွန်၌ လူ ၂၂ ဦးပါကုန်တင်သင်္ဘောတစ်စင်း နစ်မြုပ်မှုဖြစ်ပွား ရာ လူ ၁၄ ဦးကိုကယ်ဆယ်ထားနိုင်ပြီး ကယ်ဆယ်ရေးလုပ်ငန်းများကို ဆက်လက်လုပ်ဆောင်နေဆဲဖြစ်ကြောင်း ကမ်းခြေစောင့်တပ်ဖွဲ့ကပြောသည်။
သစ်သားများကိုတင်ဆောင်လာသည့် တန်ချိန် ၆၅၀၀ ကျော် အဆိုပါကုန်တင်သင်္ဘောသည် ဇန်နဝါရီ ၂၅ ရက် ဒေသစံတော်ချိန် နံနက် ၃ နာရီ ၇ မိနစ်တွင် ဒုက္ခရောက်နေကြောင်း အချက်ပြမှုကို ထုတ်လွှင့်ခဲ့ခြင်း ဖြစ်သည်ဟု ကမ်းခြေစောင့်တပ်ဖွဲ့၏ ထုတ်ပြန်ချက်တွင်ဖော်ပြထားသည်။
ဂျယ်ဂျူးကျွန်းမှ အရှေ့တောင်ဘက် ၁၄၈ ဒသမ ၂ ကီလိုမီတာကွာဝေးသော အခင်းဖြစ်နေရာသို့ ကမ်းခြေစောင့်တပ်ဖွဲ့ရောက်ရှိသွားချိန်တွင် ကုန်တင်သင်္ဘောသည် လုံးလုံးလျားလျားနစ်မြုပ်သွားပြီ ဖြစ်သည်။
ဟောင်ကောင်မှတ်ပုံတင်ထားသော ထိုကုန်တင်သင်္ဘောပေါ်၌ တရုတ်နိုင်ငံသား ၁၄ ဦးနှင့် မြန်မာနိုင်ငံသား ၈ ဦးတို့ လိုက်ပါလာပြီး ၎င်းတို့အနက် ၁၄ ဦးကို အနီးမှဖြတ်သွားသည့်သင်္ဘောများနှင့် အခြားကယ်ဆယ်ရေး သမားများက ကယ်ဆယ်လိုက်နိုင်ခြင်းဖြစ်သည်။
သို့သော် အသက်ရှင်လျက်ကယ်ဆယ်ထားသူ ၁၄ ဦးအနက် ၉ ဦးမှာ သတိမေ့နေဆဲဖြစ်ကြောင်းနှင့် ၎င်းင်းတို့ကို ဂျပန် နိုင်ငံ နာဂါဆာကီမြို့သို့ပို့ဆောင်ပေးသွားဖွယ်ရှိကြောင်း တာဝန်ရှိသူများကပြောသည်။
တောင်ကိုရီးယား ကမ်းခြေစောင့်တပ်ဖွဲ့သည် ဂျပန်ကမ်းခြေစောင့်တပ်ဖွဲ့နှင့်အတူပူးပေါင်းကာ ကင်းလှည့်ရေယာဉ် ၅ စင်းနှင့် လေယာဉ် ၄ စင်းတို့ကို အသုံးပြုကာ ပျောက်ဆုံးနေဆဲဖြစ်သူ ၈ ဦးကိုရှာဖွေလျက်ရှိကြောင်း သိရသည်။
Ref: Yonhap