ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ ဖိုရမ်ကျင်းပ

နေပြည်တော်  ဧပြီ  ၂၀

ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ ဖိုရမ်ကျင်းပ

မြန်မာနိုင်ငံတော်ဗဟိုဘဏ်နှင့် Bank of China (Hong Kong) Yangon Branch တို့ပူးပေါင်းကျင်းပသည့် ငွေကြေး ခဝါချမှုနှင့် အကြမ်းဖက်မှုကို ငွေကြေးထောက်ပံ့မှု တိုက်ဖျက်ရေးဆိုင်ရာ ဖိုရမ်အား မြန်မာနိုင်ငံတော်ဗဟိုဘဏ် ရန်ကုန်ဘဏ်ခွဲ၌ ယနေ့နံနက် ၉ နာရီခွဲတွင်ကျင်းပရာ မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါ်သန်းသန်းဆွေနှင့် အဂတိလိုက်စားမှု တိုက်ဖျက်ရေး ကော်မရှင် ဥက္ကဋ္ဌတို့ က အဖွင့်အမှာစကားများ ပြောကြားပြီး Bank of China (Hong Kong) Yangon Branch  ၏ Chief Executive Officer Mr. LIU Ying က နှုတ်ခွန်းဆက်စကားပြောကြားသည်။

အဆိုပါဖိုရမ်တွင် Bank of China (Hong Kong) မှ တာဝန်ရှိသူနှစ်ဦးက ငွေကြေးခဝါချမှု တိုက်ဖျက်ရေးဆိုင်ရာ အပြည်ပြည် ဆိုင်ရာစံနှုန်းများနှင့် အဖွဲ့ဝင်နိုင်ငံအချင်းချင်း အပြန်အလှန်အကဲဖြတ်ခြင်းဆိုင်ရာ အစီအစဉ်များ၊ ဟောင်ကောင် အထူးအုပ်ချုပ်ခွင့်ရ ဒေသ၏ ငွေကြေးခဝါချမှုတိုက်ဖျက်ရေးမူဘောင်နှင့် Bank of China (Hong Kong) ၏ အကောင်အထည်ဖော် ဆောင်ရွက်မှုများကို   အသေးစိတ်ဆွေးနွေးတင်ပြကြရာ တက်ရောက်လာသည့် ဘဏ်များနှင့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှု တိုက်ဖျက်ရေးဆိုင်ရာ လုပ်ငန်းအဖွဲ့ဝင်များက အကြံပြုဆွေးနွေးချက်များနှင့် သိရှိလိုသည်များကို ပြန်လည် ဆွေးနွေးကြသည်။

ဖိုရမ်သို့ အဂတိလိုက်စားမှု တိုက်ဖျက်ရေးကော်မရှင်အဖွဲ့ဝင် ဦးကျော်ဝင်းသိန်း၊ မြန်မာနိုင်ငံတော် ဗဟိုဘဏ်အရာရှိကြီးများ၊ Bank of China (Hong Kong) Yangon Branch မှ တာဝန်ရှိပုဂ္ဂိုလ်များ၊ ငွေကြေးခဝါချမှုနှင့် အကြမ်းဖက်မှုကို ငွေကြေး ထောက်ပံ့မှု တိုက်ဖျက်ရေးဆိုင်ရာ လုပ်ငန်းအဖွဲ့ဝင်များဖြစ်သည့် ပြည်ထောင်စုတရားစီရင်ရေးကြီးကြပ်မှုရုံး၊ အထွေထွေ အုပ်ချုပ်ရေးဦးစီးဌာန၊ အထူးစုံစမ်း စစ်ဆေးရေးဦးစီးဌာန၊ ငွေရေးကြေးရေး ကြီးကြပ်စစ်ဆေးရေးဦးစီးဌာန၊ အကောက်ခွန်ဦးစီးဌာန၊ ပြည်တွင်းအခွန်များ ဦးစီးဌာန၊ ရင်းနှီးမြှုပ် နှံမှုနှင့်ကုမ္ပဏီများ ညွှန်ကြားမှုဦးစီးဌာန၊ဥပဒေရေးရာဝန်ကြီးဌာန၊ မြန်မာ့ကျောက် မျက်ရတနာ ရောင်းဝယ်ရေး လုပ်ငန်း၊ သစ်တောဦးစီးဌာန၊ ပြည်ထောင်စုစာရင်းစစ်ချုပ်ရုံး၊ မြန်မာနိုင်ငံရဲတပ်ဖွဲ့ဌာနချုပ် (နိုင်ငံဖြတ် ကျော်မှုခင်းဌာနကြီး)၊ မြန်မာနိုင်ငံ ရဲတပ်ဖွဲ့ဌာနချုပ် (မှုခင်းနှင့်ဥပဒေရေးရာဌာနကြီး)၊ မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့နှင့် ငွေကြေးဆိုင်ရာ စုံစမ်းထောက်လှမ်းရေးအဖွဲ့ တို့မှ တာဝန်ရှိပုဂ္ဂိုလ်များ၊ ငွေချေးသက်သေခံ လက်မှတ်လုပ်ငန်း ကြီးကြပ်ရေး ကော်မရှင်၊ နိုင်ငံပိုင်နှင့် ပုဂ္ဂလိကဘဏ်များ၊ နိုင်ငံခြားဘဏ် ဘဏ်ခွဲများနှင့် နိုင်ငံခြားလက်အောက်ခံ ဘဏ်များမှ ကိုယ်စားလှယ်များ တက်ရောက်ခဲ့ကြ ကြောင်း သိရသည်။

 (သတင်းစဉ်)