မိုခါ (MOCHA) ဆိုင်ကလုန်းမုန်တိုင်း ဝင်ရောက်နိုင်ကြောင်း ခန့်မှန်းထားသည့် ဒေသများသို့ ကယ်ဆယ်ရေး ပစ္စည်းများနှင့် ပြန်လည်ထူထောင်ရေး ပစ္စည်းများ ပို့ဆောင်
နေပြည်တော် မေ ၁၃
အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအောက်ရှိ ပို့ဆောင်ဆက်သွယ်ရေး လုပ်ငန်းကော်မတီသည် ဘင်္ဂလားပင်လယ်အော်တွင် ဖြစ်ပေါ်နေသော လေဖိအားနည်းရပ်ဝန်း အခြေအနေအရ မိုခါ( MOCHA ) ဆိုင်ကလုန်း မုန်တိုင်းဝင်ရောက်နိုင်ကြောင်း သိရှိရချိန်မှစ၍ အမျိုးသား သဘာဝဘေးအန္တရာယ်
ဆိုင်ရာစီမံခန့်ခွဲမှု ကော်မတီ၏ လမ်းညွှန်မှုကို ခံယူကာ ဆိုင်ကလုန်းမုန်တိုင်း ဝင်ရောက်နိုင်သည့် ဒေသများသို့ ဆေးဝါးများ၊ စားရေရိက္ခာများ၊ ကယ်ဆယ်ရေးပစ္စည်းများနှင့် ပြန်လည်ထူထောင်ရေးပစ္စည်းများကို လေယာဉ်၊ မော်တော်ယာဉ်တို့ဖြင့် ပို့ဆောင်ပေးလျက်ရှိသည်။
ယနေ့တွင် ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနမှ ရခိုင်ပြည်နယ် စစ်တွေမြို့သို့ ပို့ဆောင်လိုသည့် လူသုံးကုန်ပစ္စည်းများ၊ ကယ်ဆယ်ရေးပစ္စည်းများကို ပို့ဆောင်ရေးနှင့် ဆက်သွယ်ရေးဝန်ကြီးဌာန ကုန်းလမ်း ပို့ဆောင်ရေး၊ ကုန်စည်ပို့ဆောင်ရေးဌာနခွဲမှ ကုန်တင်ယာဉ်နှစ်စီးဖြင့် ပို့ဆောင်ပေးခဲ့ကြောင်း သိရသည်။