သူနာပြုတက္ကသိုလ်(ရန်ကုန်) ဒုတိယနှစ်သူနာပြုသိပ္ပံဘွဲ့(ပုံမှန်) ၁/၂၀၂၄ သင်တန်း
အမျိုးသား သူနာပြုဝတ်စုံနှင့် သူနာပြုဦးဆောင်းအပ်နှင်း
ကျန်းမာရေးဝန်ကြီးဌာန ကျန်းမာရေးလူ့စွမ်းအား အရင်းအမြစ်ဦးစီးဌာန သူနာပြုတက္ကသိုလ်(ရန်ကုန်) ဒုတိယနှစ်သူနာပြု သိပ္ပံဘွဲ့(ပုံမှန်)၁/၂၀၂၄ သင်တန်း အမျိုးသားသူနာပြုဝတ်စုံနှင့် သူနာပြုဦးဆောင်းအပ်နှင်းခြင်း အခမ်းအနားကို ဇန်နဝါရီလ ၂ ရက်တွင် ရန်ကုန်မြို့ရှိ သူနာပြုတက္ကသိုလ်(ရန်ကုန်) ပင်မဆောင် ၌ ကျင်းပသည်။
အခမ်းအနားသို့ ရန်ကုန်တိုင်းဒေသကြီး အစိုးရအဖွဲ့ဝင် လူမှုရေးရာဝန်ကြီး ဦးမောင်မောင်သန်း၊ သူနာပြုတက္ကသိုလ်(ရန်ကုန်) ပါမောက္ခချုပ် ဒေါက်တာ တင်တင်ကျော်၊ ဆေးနှီးနွှယ် တက္ကသိုလ်များမှ ပါမောက္ခချုပ်များ၊ ရန်ကုန်မြို့ပေါ်ရှိ ဆေးရုံအသီးသီးမှ ဆေးရုံအုပ်ကြီးများနှင့် သူနာပြုအုပ်ကြီးများ၊ ရန်ကုန်တိုင်း ဒေသကြီး ကုသရေးဦးစီးဌာနမှ ညွှန်ကြားရေးမှူး၊ သူနာပြုနှင့်သားဖွား သင်တန်းကျောင်းများမှ ကျောင်း အုပ်ကြီးများ၊ သူနာပြုတက္ကသိုလ်(ရန်ကုန်)မှ ဒုတိယ ပါမောက္ခချုပ်များ၊ ဌာနမှူးများ၊ ဆရာ၊ ဆရာမများနှင့် ဖိတ်ကြားထားသည့် ဧည့်သည်များ တက်ရောက်ကြ သည်။
ရှေးဦးစွာ သူနာပြုတက္ကသိုလ်(ရန်ကုန်) ပါမောက္ခချုပ် ဒေါက်တာတင်တင်ကျော်က အဖွင့်အမှာစကား ပြောကြားသည်။ ယင်းနောက် တက်ရောက်လာကြသည့် တာဝန်ရှိသူများက သင်တန်းသား၊ သင်တန်းသူများအား အမျိုးသားသူနာပြုဝတ်စုံနှင့် သူနာပြုဦးဆောင်းများ ပေးအပ်သည်။
ဆက်လက်ပြီး အခမ်းအနားဒုတိယပိုင်းကို ကျင်းပရာ ရန်ကုန်တိုင်းဒေသကြီး အစိုးရအဖွဲ့ ဝင် လူမှုရေးရာ ဝန်ကြီးဦးမောင်မောင်သန်းက ဂုဏ်ပြုအမှာစကား ပြောကြားသည်။
ထို့နောက် သူနာပြုတက္ကသိုလ်(ရန်ကုန်) ဒုတိယနှစ် သူနာပြုသိပ္ပံဘွဲ့(ပုံမှန်) ၁/၂၀၂၄ သင်တန်းသား၊ သင်တန်းသူများအား သူနာပြုတက္ကသိုလ်(ရန်ကုန်) ပါမောက္ခချုပ်နှင့် တာဝန်ရှိသူများက သူနာပြုဝတ်စုံနှင့် သူနာပြုဦးဆောင်းများ ပေးအပ်ကြသည်။
ထို့နောက် တာဝန်ရှိသူများက ဆုရရှိသည့် သင်တန်းသား၊ သင်တန်းသူများအား ဆုများပေးအပ် ချီးမြှင့်ကြပြီး သူနာပြုတက္ကသိုလ်(ရန်ကုန်) အတွက် ရန်ကုန် တိုင်းဒေသကြီးအစိုးရအဖွဲ့က ပေးအပ်သည့် ငွေကျပ် သိန်း ၅၀ ကို တိုင်းဒေသကြီးအစိုးရ အဖွဲ့ဝင် လူမှုရေးရာ ဝန်ကြီးကပေးအပ်ရာ သူနာပြုတက္ကသိုလ်(ရန်ကုန်) ပါမောက္ခချုပ် ဒေါက်တာတင်တင်ကျော်က လက်ခံရယူသည်။
ယင်းနောက် သူနာပြုတက္ကသိုလ်(ရန်ကုန်) ဒုတိယ နှစ်သူနာပြုသိပ္ပံဘွဲ့(ပုံမှန်) ၁^၂၀၂၄ သင်တန်းသား၊ သင်တန်းသူများက သူနာပြုသစ္စာ အဓိဋ္ဌာန်ရွတ်ဆိုခြင်း၊ မြန်မာနိုင်ငံ သူနာပြုနှင့်သားဖွား အသင်း၏ ဂုဏ်ပြုတေးသီချင်းဖြစ်သော ကရုဏာအလင်း သီချင်းကို သီဆို ဂုဏ်ပြုခဲ့ကြကြောင်း သိရသည်။