ကန်ကြီးထောင့်မြို့၌ ကျင်းပသည့် (၆၂)နှစ်မြောက် တောင်သူလယ်သမားနေ့ အခမ်းအနားသို့ နိုင်ငံတော်စီမံအုပ်ချုပ်ရေး ကောင်စီအဖွဲ့ဝင် မန်းငြိမ်းမောင် တက်ရောက်
ပုသိမ် မတ် ၂
(၆၂)နှစ်မြောက် တောင်သူလယ်သမားနေ့ အခမ်းအနားကို ယနေ့နံနက်ပိုင်းတွင် ဧရာဝတီတိုင်းဒေသကြီး ကန်ကြီးထောင့်မြို့နယ် ဝါးဒူးကျေးရွာ၌ ကျင်းပရာ နိုင်ငံတော်စီမံအုပ်ချုပ်ရေး ကောင်စီအဖွဲ့ဝင် မန်းငြိမ်းမောင် တက်ရောက်သည်။
အခမ်းအနားသို့ တိုင်းဒေသကြီး ဝန်ကြီးချုပ် ဦးတင်မောင်ဝင်း၊ အနောက်တောင်တိုင်း စစ်ဌာနချုပ် တိုင်းမှူး၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး၊ ပုသိမ်လေတပ်စခန်းဌာနချုပ်မှူး၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ ဌာနဆိုင်ရာများနှင့် တိုင်းဒေသကြီးအတွင်းရှိ တောင်သူများ တက်ရောက်ကြသည်။
ရှေးဦးစွာ တောင်သူလယ်သမားနေ့ အခမ်းအနား မုခ်ဦးဆိုင်းဘုတ်အား နိုင်ငံ တော်စီမံအုပ်ချုပ်ရေး ကောင်စီအဖွဲ့ဝင်၊ တိုင်းဒေသကြီးဝန်ကြီးချုပ်၊ အနောက်တောင်တိုင်း စစ်ဌာနချုပ်တိုင်းမှူး၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး၊ လုံခြုံရေးနှင့် နယ်စပ်ရေးရာဝန်ကြီးတို့က ဖဲကြိုးဖြတ်ဖွင့်လှစ်ပေးပြီး စုပေါင်းမှတ်တမ်းတင် ဓာတ်ပုံရိုက်ကြသည်။
ဆက်လက်၍ (၆၂)နှစ်မြောက် တောင်သူ လယ်သမားနေ့ အခမ်းအနားကို ကျင်းပရာ ပြည်ထောင်စုသမ္မတမြန်မာနိုင်ငံတော် နိုင်ငံ တော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး သတိုးမဟာ သရေစည်သူ သတိုးသီရိသုဓမ္မမင်းအောင်လှိုင် ထံမှ (၆၂)နှစ်မြောက် တောင်သူလယ်သမား နေ့အခမ်းအနားသို့ ပေးပို့သော သဝဏ်လွှာအား နိုင်ငံတော်စီမံအုပ်ချုပ်ရေး ကောင်စီ အဖွဲ့ဝင် မန်းငြိမ်းမောင်က ဖတ်ကြားသည်။
ထို့နောက် တိုင်းဒေသကြီးဝန်ကြီးချုပ် က တိုင်းဒေသကြီးအတွင်း ဆောင်ရွက်နေသည့် စိုက်ပျိုးရေး၊ မွေးမြူရေး၊ MSME လုပ်ငန်းများ ဖွံ့ဖြိုးတိုးတက်ရေး၊ ဆီထွက်သီးနှံ များတိုးချဲ့စိုက်ပျိုးရေး ဆောင်ရွက်နေမှု အခြေ အနေများကို ရှင်းလင်းပြောကြားသည်။
ယင်းနောက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီးက အမှာစကား ပြောကြားသည်။
ဆက်လက်၍ နိုင်ငံတော်စီမံအုပ်ချုပ်ရေး ကောင်စီအဖွဲ့ဝင်နှင့် တာဝန်ရှိသူများသည် ပညာအလင်္ကာတေးဂီတ အဖွဲ့၏ တောင်သူ လယ်သမားနေ့ ဂုဏ်ပြုတေးသီချင်းများဖြင့် သီဆိုဖျော်ဖြေမှုများကို ကြည့်ရှုအားပေးကြသည်။
ထို့နောက် မိုးစပါး၊ နွေစပါး၊ နေကြာ၊ မြေပဲသီးနှံစိုက် ထူးချွန်တောင်သူများကို နိုင်ငံ တော်စီမံအုပ်ချုပ်ရေး ကောင်စီအဖွဲ့ဝင်က လည်းကောင်း၊ မိုးနှမ်း၊ မတ်ပဲ၊ ပဲတီစိမ်းစိုက် ထူးချွန်တောင်သူများနှင့် နေကြာ ၁၀ ဧက မြို့နယ်ထူးချွန်ဆု ရရှိသူများကို တိုင်းဒေသ ကြီးဝန်ကြီးချုပ်ကလည်းကောင်း၊ ပီလောပီနံ၊ ရော်ဘာ၊ စပါးမျိုးစေ့ထုတ် ထူးချွန်တောင် သူများနှင့် အသားတိုးဝက် မွေးမြူထုတ်လုပ်မှု ဆုရရှိသူများကို တိုင်းမှူးက လည်းကောင်း၊ ပျားလိမ္မော်၊ သီဟိုဠ်သီးနှံစိုက် ထူးချွန်တောင် သူများနှင့် ဥစားဘဲမွေးမြူထုတ်လုပ်မှု ထူးချွန် ဆုရရှိသူများကို ဒုတိယဝန်ကြီးကလည်း ကောင်း၊ နေကြာသီးညှပ်၊ ကျွဲကောသီးနှံ၊ ဒေသနွားမွေးမြူထုတ်လုပ်မှု၊ ကော်ဖီ၊ ငှက်ပျော၊ မင်းကွတ်၊ ဆေးရွက်ကြီး၊ စပါးသီးနှံ(ပေါ်ဆန်းဘေးကျား- သဘာဝမြေသြဇာသုံး)၊ ငရုတ်ကောင်း၊ နာနတ်၊ နို့စားနွားမွေးမြူ ထုတ်လုပ်မှု၊ ကွမ်းသီး၊ ဟင်းသီးဟင်းရွက်၊ ကဏန်းပျော့မွေးမြူ ထုတ်လုပ်မှုနှင့် အုန်းချိုမွှေးသီးနှံစိုက် ထူးချွန်တောင်သူများကို တာဝန် ရှိသူများကလည်းကောင်း ဂုဏ်ပြုဆုများချီးမြှင့် ကြပြီး နိုင်ငံတော်စီမံ အုပ်ချုပ်ရေးကောင်စီ အဖွဲ့ဝင်၊ တိုင်းဒေသကြီးဝန်ကြီးချုပ်၊ တိုင်းမှူး နှင့် တာဝန်ရှိသူများက တောင်သူများထံ လယ်ယာသုံး စက်ကိရိယာပစ္စည်းများအား ထောက်ပံ့ပေးအပ်ကြသည်။
ယင်းနောက် နိုင်ငံတော်စီမံအုပ်ချုပ်ရေး ကောင်စီအဖွဲ့ဝင်၊ တိုင်းဒေသကြီးဝန်ကြီးချုပ်၊ တိုင်းမှူးနှင့် တာဝန်ရှိသူများသည် (၆၂)နှစ် မြောက် တောင်သူလယ်သမားနေ့ ပြခန်းများ ကို ဖဲကြိုးဖြတ်ဖွင့်လှစ်ပေးကာ ပြခန်းများကို လှည့်လည်ကြည့်ရှု အားပေးကြသည်။
ဆက်လက်၍ နိုင်ငံတော်စီမံအုပ်ချုပ် ရေးကောင်စီအဖွဲ့ဝင်နှင့်အဖွဲ့သည် တောင်သူ များနှင့် နေ့လယ်စာကို အတူတကွသုံးဆောင် ခဲ့ကြပြီး ပညာအလင်္ကာတေးဂီတအဖွဲ့၏ တောင်သူလယ်သမားနေ့ ဂုဏ်ပြုတေးသီချင်းများဖြင့် သီဆိုဖျော်ဖြေမှုများကို ကြည့်ရှုအားပေးကြသည်။
ယနေ့ကျင်းပသည့် (၆၂)နှစ်မြောက် တောင်သူလယ်သမားနေ့ အခမ်းအနားတွင် စိုက်ပျိုးရေးဦးစီးဌာနမှ ပြသထားသည့် သီးနှံစုံ စိုက်ခင်းများ၊ ငါးလုပ်ငန်းဦးစီးဌာနမှ ငါးမွေးကန်များ၊ စက်မှုလယ်ယာဦးစီးဌာနမှ လက်ဆွဲကောက်စိုက်စက်၊ ခြောက်တန်းသွားကောက် စိုက်စက်နှင့် ဆယ်တန်းသွား မျိုးစေ့ချစက်တို့ဖြင့် သရုပ်ပြစိုက်ပျိုးခြင်းများ စိုက်ပျိုး ပြသထားရှိပြီး (၆၂)နှစ်မြောက် တောင်သူ လယ်သမားနေ့ ပြခန်းများတွင် ဌာနဆိုင်ရာ ပြခန်းများ၊ ခရိုင်အလိုက်ပြခန်းများ၊ စိုက်ပျိုးမွေးမြူရေးဆိုင်ရာ ပြခန်းများ၊ လယ်ယာသုံး စက်ကိရိယာပြခန်းများ၊ သွင်းအားစုလုပ်ငန်း ပြခန်းများ၊ မျိုးစေ့ထုတ်ကုန်ပြခန်းများ၊ ငါးထုတ်ကုန်ပြခန်းများ၊ အုန်းအခြေခံထုတ်ကုန် ပြခန်းများ၊ အစာတောင့် ထုတ်ကုန်ပြခန်းများဖြင့် ပြခန်းပေါင်း ၃၉ ခန်းဖွင့်လှစ်ပြသထားရှိ ကာ ပြခန်းများနှင့် ဆွေးနွေးပွဲများကို မတ်လ၄ ရက်အထိ စည်ကားသိုက်မြိုက်စွာ ခင်းကျင်းပြသပြုလုပ် သွားမည်ဖြစ်ကြောင်း သိရသည်။
မွန်းလွဲပိုင်းတွင် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်၊ တိုင်းဒေသကြီးဝန်ကြီးချုပ်၊ ဒုတိယဝန်ကြီး၊ တိုင်းဒေသကြီးအစိုးရ အဖွဲ့ဝင် ဝန်ကြီးများသည် ဆုရတောင်သူများ၏ လုပ်ငန်းဆောင်ရွက်ချက်များ ရှင်းလင်းဆွေးနွေးပွဲ Real Live Show ပြသမှုများကို တက်ရောက်အားပေးကြပြီး စပါးစိုက်ပျိုး ထုတ်လုပ်သူ တောင်သူ ဦးတင်အောင်သန်းက စပါးစိုက်ပျိုးရေး အတွေ့အကြုံများကို ရှင်းလင်းတင်ပြရာ ဒုတိယဝန်ကြီးက လိုအပ်သည်များကို ဖြည့်စွက်ဆွေးနွေးခဲ့သည်။
ထို့နောက် မြေပဲစိုက်တောင်သူ၊ နေကြာစိုက် တောင်သူ၊ မွေးမြူရေးတောင်သူ၊ စပါး-ပဲ-နေကြာ^စပါး-ပဲ-နှမ်း သုံးသီးစိုက်ပျိုးသည့် တောင်သူနှင့် နေကြာစံပြစိုက်ခင်း ၁၀ ဧက အကောင်းဆုံးဆု ရရှိသည့် သာပေါင်းမြို့နယ်တို့မှ စိုက်ပျိုးရေး လုပ်ငန်းအတွေ့အကြုံရှင်းလင်းဆွေးနွေးမှုများ အပေါ် တက်ရောက်လာသည့် ဧည့်သည်တော်များက ဖြည့်စွက်ဆွေးနွေးခဲ့ကြသည်။
ဆက်လက်၍ နိုင်ငံတော်စီမံအုပ်ချုပ်ရေး ကောင်စီအဖွဲ့ဝင်နှင့်အဖွဲ့သည် ပုသိမ်ခရိုင် သာပေါင်းမြို့နယ် သဲဖြူကျေးရွာအုပ်စု သန်လျက်စွန်းကျေးရွာရှိ လယ်မြေ ၁၀ ဧကပေါ်တွင် စိုက်ပျိုးထားရှိသည့် စံပြဆောင်း နေကြာ(SuperSun-41) စိုက်ပျိုးအောင်မြင်ဖြစ်ထွန်းမှုကို ကြည့်ရှုအားပေးပြီး နေကြာစိုက်ပျိုး ဖြစ်ထွန်းအောင်မြင်မှုများအား တောင်သူများ ကျယ်ကျယ်ပြန့်ပြန့် သိရှိလိုက်ပါ ဆောင်ရွက်စေရေး၊ အသိပညာပေး လုပ်ငန်းများဆောင်ရွက်စေရေး၊ ရိတ်သိမ်းချိန် လေလွင့်မှုမရှိစေရေး၊ နေကြာပွင့်အရွယ်အစားများ စနစ်တကျ မှတ်တမ်းထားရှိ ဆောင်ရွက်စေရေးနှင့် ပိုမိုအောင်မြင်အောင် ဆောင်ရွက်စေရေးမှာကြားခဲ့ကြောင်း သိရသည်။