လပွတ္တာမြို့နယ်မှ ထွက်ရှိသည့် ငါးစည်ဖောင်းခြောက်များကို ရန်ကုန်ဈေးကွက်မှ ဝယ်လိုအားကောင်းနေ
ဧရာဝတီတိုင်းဒေသကြီး လပွတ္တာမြို့နယ်မှ ထွက်ရှိသည့် ငါးစည်ဖောင်းခြောက်များကို ရန်ကုန်ဈေးကွက်မှ ဝယ်လိုအားကောင်းနေကြောင်း လပွတ္တာမြို့နယ် ငါးခြောက်မျိုးစုံ ရောင်းဝယ်ရေးလုပ်ငန်း လုပ်ကိုင်သူ ဒေါ်တင်တင်ညို၏ ပြောပြ ချက်အရ သိရသည်။
လပွတ္တာမြို့နယ်မှထွက်ရှိသော ငါးစည်ဖောင်းခြောက်များကို ရန်ကုန်ဈေးကွက်မှ ဖေဖော်ဝါရီလ ဒုတိယပတ်မှစ၍ ဝယ်လို အားကောင်းလာခြင်းဖြစ်သည်။ အဆိုပါ ငါးစည်ဖောင်းခြောက်များသည် ပင်လယ်ငါးများဖြစ်သည့် ငါးရွှေ၊ ငါးရောင်၊ ငါးပုတ်သင် စသည့်ငါးများကို ဝမ်းဗိုက်ခွဲပြီး အတွင်းမှရရှိသည့် စည်ဖောင်းများကို စနစ် တကျသန့်စင်၍ နေပူလှန်း အခြောက်ခံရရှိခြင်း ဖြစ်ကြောင်း သိရသည်။
“လပွတ္တာမြို့နယ်ထွက် ပင်လယ်ငါးစည်ဖောင်းခြောက်တွေကို ရန်ကုန်ဈေးကွက်က ဝယ်လိုအား သိသိသာသာကောင်းနေတယ်။ ငါးစည်ဖောင်းခြောက်က အဝယ်လိုက်နေ ပေမယ့် ကုန်ကြမ်းဖြစ်တဲ့ ငါးတွေတော့ အဝင်နည်းနေတယ်။ ငါးစည်ဖောင်းထုတ် လို့ရတဲ့ ငါးတွေဖမ်းဆီး ရရှိမှုနည်းနေလို့ပါ။ ရန်ကုန်ဈေးကွက်က တင်ပို့ရောင်းချရတာ အစစအရာရာ အဆင်ပြေပါတယ်” ဟု ဒေါ်တင်တင်ညိုကပြောသည်။
လပွတ္တာမြို့နယ်မှ ရန်ကုန်ဈေးကွက်သို့ ဖေဖော်ဝါရီလ ဒုတိယပတ်မှ လက်ရှိအချိန် ထိ ငါးစည်ဖောင်းခြောက် ပိဿာချိန် ၇၅၀၀ အထိ တင်ပို့ရောင်းချထားရကြောင်း၊ အဆိုပါ ငါးစည်ဖောင်းခြောက်များ၏ ဈေးနှုန်းမှာ ငါးရွှေ ငါးစည်ဖောင်းခြောက် တစ်ပိဿာလျှင် ငွေကျပ် ၅၅၀၀၀၊ ငါးရောင် ငါးစည်ဖောင်းခြောက် တစ်ပိဿာလျှင် ငွေကျပ် ၃၂၅၀၀ မှ ၃၅၀၀၀၊ ငါးပုတ်သင် ငါးစည်ဖောင်းခြောက် တစ်ပိဿာလျှင် ငွေ ကျပ် ၇၅၀၀၀ ဈေးနှုန်းအသီးသီး ရှိကြောင်း သိရသည်။