မျိုးစေ့ချကိရိယာဖြင့်စိုက်ပျိုးခဲ့သည့် စံကွက်ရိတ်သိမ်း တစ်ဧကလျှင် ၁၂၃ ဒသမ ၀၄ တင်းထွက်ရှိ
ရန်ကုန် မတ် ၃၁
ရန်ကုန်တိုင်းဒေသကြီး ကွမ်းခြံကုန်းမြို့နယ် ဝါးကောက်တောကျေးရွာ တောင်သူ ဦးခင်မောင်အေး၏ စံကွက်သုံးဧကတွင် ရက် (၉၀) စပါးအား လွန်ခဲ့သောသုံးလခန့်က မျိုးစေ့ချကိရိယာ(Seeder)ဖြင့် စိုက်ပျိုးခဲ့ပြီး ယမန်နေ့ နေ့လယ်ပိုင်းကရိတ်သိမ်းပွဲအား အဆိုပါစံကွက်၌ပြုလုပ်ရာ တစ်ဧကလျှင် ၁၂၃ ဒသမ ၀၄ တင်း ထွက်ရှိခဲ့ကြောင်း သိရသည်။
ရှေးဦးစွာ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းနှင့် တိုင်းဒေသကြီးဝန်ကြီးများ၊ ဒေသခံ တောင်သူများသည် စပါးရိတ်သိမ်းခြွေလှေ့စက်ဖြင့် အဆိုပါစံကွက်ရှိ စပါးရိတ်သိမ်းနေမှုကို လည်း ကောင်း၊ ရိတ်သိမ်းပြီးစပါးများ ချိန်တွယ်နေမှုအားလည်းကောင်း ကြည့်ရှုအားပေးကြသည်။
ထို့နောက် စံကွက်စိုက်ပျိုးသူ တောင်သူဦးခင်မောင်အေးက ယခင်ကြဲပက်စိုက်ပျိုးကြရာ တစ်ဧက အထွက်နှုန်း ၇၀/၈၀ သာထွက်ရှိရာ ယခု Seeder ဖြင့်စိုက်ပျိုးခြင်းကြောင့် တစ်ဧကအထွက်နှုန်း ၁၂၃ ဒသမ ၀၄ တင်းထွက်ရှိကြောင်း၊ သို့ဖြစ်၍ လာမည့်မိုးစပါးရာသီကို Seeder ဖြင့်သာစိုက်ပျိုးမည် ဖြစ်ကြောင်းနှင့် ဘဝတူတောင်သူများအနေဖြင့် Seeder ဖြင့်စိုက်ပျိုးကြရန် တိုက်တွန်းပြောကြားသည်။
၎င်းနောက် တိုင်းဒေသကြီးဝန်ကြီးချုပ်က နွေစပါးပြီးပါက မြေကိုအလွတ်မထားဘဲ သီးနှံများစိုက်ပျိုးရန်၊ မိုးစပါးရာသီတွင်လည်း Seeder ဖြင့်စိုက်ရန်၊ မိရိုးဖလာ ကောက်စိုက်သမဖြင့်စိုက်ခြင်း၊ ကြဲပက် စိုက်ပျိုးခြင်းများသည် အလေအလွင့်နှင့် ဆုံးရှုံးမှုများရှိခြင်း၊ အချိန်ကုန်ခြင်း၊ ငွေကြေးကုန်ကျမှုများ ခြင်းကြောင့် Seeder ဖြင့်သာစိုက်ပျိုးကြရန်နှင့် Seeder ဖြင့်စိုက်ခြင်းကြောင့်ရရှိသည့် အကျိုး ကျေးဇူးများကို အခြားတောင်သူများအား လက်ဆင့်ကမ်း ပြောကြားပေးကြရန် ပြောကြားပြီး တောင်သူများအား ရင်းရင်းနှီးနှီးနှုတ်ဆက်သည်။
ကွမ်းခြံကုန်းမြို့နယ်တွင် နွေစပါး ၁၇၇၇၃ ဧကလျာထားသော်လည်း ၂၁၃၀၅ ဧကစိုက်ပျိုးနိုင်ခဲ့၍ လျာထားချက် ကျော်လွန်စိုက်ပျိုးနိုင်ခဲ့ကြောင်းနှင့် မိုးရာသီတွင် Seeder ဖြင့်စိုက်ပျိုးကြရန် တောင်သူများအား အသိပညာပေး ဆောင်ရွက်သွားမည်ဖြစ်ကြောင်း ကွမ်းခြံကုန်းမြို့နယ် စိုက်ပျိုးရေး ဦးစီးဌာနမှူးထံမှ သိရသည်။
စံကွက်ရိတ်သိမ်းခြင်း အခမ်းအနားသို့ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ တိုင်းဒေသကြီး အစိုးရအဖွဲ့ဝင်ဝန်ကြီးများ၊ တိုင်းဒေသကြီးဌာနဆိုင်ရာ တာဝန်ရှိသူများနှင့် ဒေသခံတောင်သူများ တက်ရောက်ခဲ့ကြကြောင်း သိရသည်။
ဝန်းရံခ