သမိုင်းသစ်လမ်း . . .ပန်းကြယ်ပွင့်စေ
- ယောကျ်ားတံခွန်...လူရည်ချွန်ကား
မိုးစွန်တမွတ် .. ကြယ်ကိုဆွတ်လည်း
မလွတ်စတမ်း...ရမြဲလမ်းတည့်...။
အလွန်ကောင်းမွန်လှပသည့်
ရှေးရေးကဗျာစာစုလေးပင်။
ဆိုလိုသည်မှာ “သန္နိဋ္ဌာန်” ကိုဖော်ညွှန်းခြင်း ဝိဂြိုဟ်ပြုတင်စားခြင်း သဘောဖြစ်၏။ စင်စစ်...စိတ်သည် ကြီးမြတ်သည့်ခွန်အားကိုဖြစ်စေသည်။ စိတ်ဆောင်လျှင်အောင်ပွဲသည် မလွဲမသွေပိုင်ဆိုင်ရမြဲ။
“စိတ္တေန...နိယေတိ ...လောကော..” စိတ်သည်လောကကိုရှေ့ဆောင်၏...တဲ့၊ မြတ်ဗုဒ္ဓ၏ တရား ဒေသနာရှိနှင့်ပါသည်။
အဓိကဆိုချင်သည်မှာ လူငယ်ဖြစ်သည်။ ပညာရှာသူ၊ စိတ်ကိုသင်ယူသူဖြစ်သည်။ လူငယ်ဟူသည် နိုင်ငံ၏အညွန့်၊အဖူး၊ အသွေး၊ အသက်။ ပမာပုံခိုင်းနှိုင်းဆက်ရမည်ဆိုလျှင် တိုင်းပြည်၏ “ဝိညာဉ်” ဟုပင် ဆိုလောက်ပါ၏။ ဆိုနိုင်ပါ၏။ ကြီးမားသည့် စွမ်းအားအရင်းအမြစ်ဖြစ်သကဲ့သို့...အနာဂတ်နိုင်ငံဥပဓိကို ပိုင်ဆိုင်နေခြင်းကပင်လျှင် လူငယ်တို့၏ရုပ်ပုံလွှာကို မြော်မြင်တွေးဆနိုင်ပေသည်။
ယနေ့ခေတ်တွင် လူငယ်ဗဟိုပြုအဖွဲ့အစည်းများ အတော်အသင့်ရှိလာနေလေပြီ။ တစုတစည်းတွင် ထုထည်အကြီးအသေးသာ ကွာခြားမှုရှိပါ၏။ ထိုအထဲတွင်သတင်းစာ၊ ရေဒီယို၊ ရုပ်မြင်သံကြားတို့မှ မကြာမကြာ...မြင်ကြားသိရှိလာရသည် မှာ “လေကြောင်းလူငယ်” တဲ့...။ အမည်
တစ်ရပ်အနေဖြင့် သင်္ကေတပြုဖွင့်ဆိုချက် မဆန်းလှသော်လည်း အသုံးအနှုန်းမှာ အရိုးအရှင်းကြီး မဟုတ်ပေ။ အမည်ပညတ် ဆက်စပ်မှုကဖြင့် စိတ်ဝင်စားဖွယ်ဖြစ်ရသည်။ ပညာရပ်နယ်ပယ်အတွင်း လူငယ်ထုကို ဖြည့်သွင်းတွဲစပ် ဂုဏ်ဒြပ်ဖွဲ့ဆိုမှုကြောင့် အညွှန်းမြင့်ကာ အဖွင့်ယဉ်လှပေသည်။
စင်စစ်လေကြောင်းဆိုင်ရာ နည်းနာနိဿယပညာရပ်များသည်... နိုင်ငံတစ်နိုင်ငံ၏ အဆင့်အတန်း၊ အမြင့်အခန်းတွင် အရေးပါလှပေသည်။ စက်မှုနည်းစနစ် ပညာပိုင်းနှင့် သဘာဝသိပ္ပံဗေဒစီးမျောမှု အဟုန်များကလည်း နက်နဲလွန်းပေစွ။ လေကြောင်းပညာရပ်၏ နယ်ပယ်ဆန့်ထုတ်မှုမှာ ပညာခေတ်နှင့် အညီအပြောကျယ်သထက် ကျယ်လာနေပြီး မိမိတို့နိုင်ငံအနေဖြင့် ထိုကဏ္ဍကျယ်ကျယ်ပြန့်ပြန့် ရှိနေစေ ရန် ဖြန့်ကြက်ထားနိုင်ရမည်။ ပညာရပ်များ လက်ဆင့်ကမ်းပေးရပါမည်။ ပျိုးထောင်၊ လေ့ကျင့်၊ ညွှန်ကြားမှုများဖြင့် လေ့လာလိုက်စားစေရပါမည်။ ခေတ်သမိုင်း၏ အလိုအရ မျိုးဆက်သစ် လူငယ်များ အတွက် အမွေခံအခွင့်အရေး ပေါင်းကူးပေးရပါမည်။ အဆိုပါတန်ဖိုးကြီးသော၊ လေးနက်လှသော ကွင်းဆက်တစ်ခု၊ ကွက်လပ်တစ်ခုကိုပေါင်းစပ်ကာ ဖြည့်ဆည်းခြင်းနှင့် တာဝန်တစ်ရပ် သဖွယ် ဆောင်ရွက်လာသည်မှာ တပ်မတော်(လေ)ပင်ဖြစ်ပါ၏။ လူငယ်ဗဟိုပြုရပ်ဝန်းလေး တစ်ခုအဖြစ် ဖန်တီးခြင်း၊ တာဝန်ယူခြင်း၊ တာဝန်ခံခြင်းအပြင် စီမံချက်ဖြင့် စနစ်တကျ ပုံဖော်သင်တန်းဖွင့်လှစ်ခြင်း စသည်တို့ကို ဆောင်ရွက်လာခဲ့ပေသည်။ စင်စစ်လူငယ်ထုအတွက် ဖွင့်ပေးသည့်တံခါး၊ ထူလွှင့်သည့် မော်ကွန်းအောင်လံပင်တည်း။
တကယ်တော့ ဤသင်တန်းသည် ယခုနှစ်ပိုင်းမှ ပေါ်ပေါက်လာခဲ့ခြင်းမျိုး မဟုတ်ပေ။ ၁၉၅၄ ခုနှစ်မှ စတင်ကာ သင်တန်းအဖြစ် ဖွင့်လှစ်ခဲ့ခြင်းရှိခဲ့ပါသည်။ ထိုစဉ်ကအမည်မှာ “လေကြောင်း ကင်းထောက် သင်တန်း” ဟူ၍ဖြစ်၏။ ထိုမှဆက်ကာ “လူငယ်လေကြောင်းသင်တန်းများ” (၁၉၆၇)၊ “လေကြောင်း မျိုးဆက်သစ်သင်တန်း” (၁၉၉၄)၊ “လေကြောင်းရဲညွန့်လောင်းသင်တန်း”(၁၉၉၈) စသည့်အမည်များ ဖြင့် သင်တန်းများဖွင့်လှစ်ခဲ့သော်လည်း ၂၀၁၄ မှစတင်ကာ “လေကြောင်းလူငယ်” အမည်ဖြင့် နှစ်စဉ်ဖွင့်လှစ်လာခဲ့သည်။ ၂၀၂၀ ပြည့်နှစ်တွင် ကိုဗစ်ရောဂါဆိုးကြီးကြောင့် ရပ်နားထားခဲ့ရာမှ ၂၀၂၃ ခုနှစ်တွင် ပြန်လည်ဖွင့်လှစ် ဆောင်ရွက်လာခဲ့ခြင်းဖြစ်ပေသည်။ ယခုနှစ်အတွက် ကောင်းသော လာခြင်းဟု ယူသော်ရ၏။
သင်တန်းကာလသတ်မှတ်မှုမှာ နွေရာသီကျောင်းပိတ်ရက် ၂၀၂၄ ခုနှစ် ဧပြီလ ၂၂ရက်နေ့မှ မေလ ၂၄ ရက်နေ့အထိ ရက်သတ္တငါးပတ် ကြာမြင့်မည်ဖြစ်သည်။ အသက်ကန့်သတ်ချက်အဖြစ် ၁၄ နှစ်နှင့် ၂၀ နှစ်အတွင်း လူငယ်မောင်မယ်များ ဖြစ်ရပါမည်။ ပညာအရည်အချင်းမှာ အနည်းဆုံး ွမေိန-၉ အဆင့်ဖြစ် ၏။ “အခြေခံ” နှင့် “တန်းမြင့်” ဟူ၍ သင်တန်းနှစ်မျိုးရှိမည်ဖြစ်ပြီး သင်တန်းစခန်းအရေအတွက်၁၇ ခုတွင် တန်းမြင့်သင်တန်း နှစ်ခုပါဝင်ပါမည်။ အဆိုပါတန်းမြင့်သင်တန်းနှစ်ခုကို အထက်မြန်မာပြည်၊ အောက်မြန်မာပြည်တစ်ခုစီခွဲ၍ ဖွင့်လှစ်မည်ဖြစ်၏။ ကျန်လေကြောင်း လူငယ်အခြေခံသင်တန်း၁၅ ခုအပါအဝင် သင်တန်းအားလုံးကိုပြည်နယ်၊ တိုင်းဒေသကြီးများနှင့် လေတပ်စခန်းဌာနချုပ်များတွင် စီစဉ်ဖွင့်လှစ်ရန်နှင့် သင်တန်းစခန်းတစ်ခုစီတွင် လူဦးရေ ၅၀ ဦး လက်ခံရန် ကန့်သတ်ထားရှိကြောင်း ယေဘုယျအနေဖြင့် သိရှိရသည်။
အမှန်ဆိုရလျှင် လေကြောင်းပညာဘာသာရပ်သည် လွယ်လွယ်နှင့်သင်ကြားနိုင်၊ သင်ကြားခွင့်ရယူနိုင် လောက်သည့် ဘာသာရပ်မျိုးမဟုတ်ပေ။ စူးစမ်းလိုမှု၊ စိတ်ပါဝင်စား လိုလိုချင်ချင်ရှိမှု၊ ဝါသနာထက်သန်မှု စသည့် အကြောင်းအရာများ အပေါ်အခြေခံမှုကလည်း ပါမည်။ ဝါရင့်သမ္ဘာရင့်ပညာရှင်များ၏ ပညာ ဖြန့်ဝေမှုနှင့် စက်မှုပညာရှင်တို့၏ အတွေ့အကြုံလက်ဆင့်ကမ်းမှု၊ သက်ရောက်နေသည့် အချိန်ကာလ၊ နေရာဒေသ တိုက်ဆိုင်မှုကလည်း ရှိနေရန်လိုအပ်မည်။ တပ်မတော်(လေ)၏ စေတနာရည်မှန်းချက် တွင် အဆိုပါလိုအပ်မှုတို့ ပြီးပြည့်စုံစေတန်ရာ ရောက်သည့် ပညာအမွေဖြန့်ဝေခြင်း သဘောလည်း ပါဝင်နေသည်။
ယနေ့ခေတ်ကို ပညာခေတ်ဟုဆိုကြသည်။ ယနေ့လူငယ်များသည် ပညာကို အငမ်းမရရှာဖွေကြသည်။ သင်ယူလိုကြသည်။ ကြိုဆိုရပါမည်။ နိုင်ငံတော် အတွက်ကောင်းမွန်သည့် အစဉ်အလာဖြစ်စေသည်ဟု ဆိုရပါမည်။ ပညာသင်သည် ပညာယူသည်ဆိုရာမှာ စိတ်ကိုလေ့ကျင့်သင်ယူနေခြင်းပင်ဟု နားလည်ပါ သည်။ ပညာတတ်ခြင်းနှင့်အတူ စိတ်ကိုပါတတ်မြောက် လာရပေမည်။ သို့မှသာ ယုံကြည်ချက်၊ ရည်မှန်း ချက်၊ တွေးခေါ်မြော်မြင်မှု၊ ဆင်ခြင်နှိုင်းဆမှု၊ ကြောင်းကျိုးဝေဖန်တတ်မှု အစရှိသည့်ဘဝအမြင်များ ထက်မြက်လာပေလိမ့်မည်။ ပညာဟူသည် အကြောင်းတရားကို သိမြင်ခြင်း မဟုတ်ပါလား။
ဤသင်တန်းသည် လူငယ်များနှင့်အလွန်သင့်မြတ်လှသည်။ တက်ရောက်ခွင့်ရခြင်းသည် အခွင့်အရေး တစ်ရပ်ကို ရယူပိုင်ဆိုင်စွမ်းရှိခဲ့ပြီဟုပင် ပြောရပေမည်။ ပညာရပ်ဆိုင်ရာ သင်တန်းနှင့်လျော်ညီစွာ ဗဟုသုတများစွာ ရရှိလာပါလိမ့်မည်။ တစ်ခုတော့ရှိပါသည်။ သင်တန်းကာလနှင့်ယှဉ်သော် ပညာပိုင်း အရ “မိတ်ဆက်သဘော”အတွေ့အထိ ဖြစ်လာနိုင်ခြေရှိသော်လည်း အတွေ့အကြုံအသစ်အသစ်၏ ဆွဲဆောင်မှုနှင့် လွှမ်းမိုးမှုကြီးမားလာနိုင်ခြင်းမှာ သေချာပါ၏။ လေကြောင်း နည်းပညာပိုင်း၏ စွမ်းရည် ထုထည်မြင့်မားမှုအောက်တွင် စိတ်ပါဝင်စားမှု မြင့်တက်လာ ပေလိမ့်မည်။
ဤသင်တန်းအပေါ် စီမံခန့်ခွဲဖွင့်လှစ်ပေးသည့် တပ်မတော်(လေ)၏ ဂုဏ်ဒြပ်သရုပ်သကန်နှင့် သေနင်္ဂ ဗျူဟာအဆန့်အထုတ် အခင်းအဖြန့်၊ သမိုင်းနောက်ခံ၊ ကာလသုံးပါးဆက်နွှယ်မှု အစရှိသည့် အကြောင်းခြင်းရာများကို စူးစမ်းလေ့လာ ဆန်းစစ်သိမြင်လိုလာပေလိမ့်မည်။
လေယာဉ်/ရဟတ်ယာဉ်များ ပျံသန်းရေးပိုင်းနှင့် စက်မှုလက်မှုဆိုင်ရာနည်းပညာ အတွန်းအဖွင့်များ၊ လေယာဉ်မောင်းသင်ကျောင်း၊ လေသူရဲအမျိုးသား၊ အမျိုးသမီးများ စသည့်စသည့်လေကြောင်းရပ်ဝန်းမှ အဖွဲ့အစည်းအသီးသီးနှင့် သဘောတရား အဆင့်ဆင့်တို့ကို စိတ်ပါဝင်စားမှု ဖြစ်လာပေလိမ့်မည်။ ဤသို့ဆိုလျှင် သင်တန်းဖွင့်ရကျိုးနပ်ပြီဟု ဆိုချင်ပါ၏။ အသစ်အသစ်သော မျိုးဆက်သစ်တို့ကို အမွေ ဆင့်ကမ်းဝေခြမ်းရမည့် အစဉ်အလာတစ်ခု ပြည့်မြောက်ခဲ့ပြီဟုလည်း မှတ်ယူနိုင်သည်။ ဤသင်တန်း များမှ ပေါ်ထွက်လာသည့် အဆင့်အတန်းတို့သည် တပ်မတော်(လေ)တွင် အားသစ်လောင်းခဲ့သည့် အစဉ်အလာများရှိခဲ့ပြီးဖြစ်ကြောင်းလည်း သိရှိရပါသည်။ ယနေ့ဆိုလျှင် တပ်မတော်(လေ)၏သက်တမ်း စိန်ရတုကာလ ကျော်လွန်လာခဲ့ပြီးဖြစ်သကဲ့သို့ လေယာဉ်မောင်းသင်ကျောင်းမှာလည်း စိန်ရတုကာလ ချဉ်းကပ်လာနေသည့် အနေအထားသို့ ရောက်ခဲ့လေပြီ။ သက်တမ်းတည်သမျှဆက်လှမ်းချီရင်း မိမိတို့ အတွေ့အကြုံနှင့် ပညာရပ်များ ဖြန့်ဝေခြင်းတာဝန်ကို ကျေပွန်အောင် ထမ်းရွက်နေဆဲဖြစ်သည်။
မြန်မာနိုင်ငံတွင် တစ်ခုတည်းသာရှိသည့် သင်တန်းမျိုးဖြစ်သည်။ အလွန်တန်ဖိုးရှိ၏။ စိတ်ဝင်စားဖွယ် ကောင်းသည့် ပညာရပ်မျိုးဖြစ်၏။ မိုးကောင်းကင်ကို ပိုင်ဆုပ် ကိုင်လှုပ်စိုးမိုးနိုင်ရေးသည် အချုပ်အခြာ အာဏာတည်တံ့ ခိုင်မြဲရေးအတွက် ကြီးစွာသော စွမ်းရည်ဖြစ်ကြောင်း ဤသင်တန်းမှလမ်းကြောင်းပြ ညွှန်ပေလိမ့်မည်။
လေကြောင်းပညာသည် အာကာသ ကောင်းကင်ပြာကြီးကို အခြေပြု အခြေခံနေသည်။ ဤကောင်းကင် ပြာကြီးရှိနေသမျှ လေကြောင်းဆိုင်ရာ ပညာအစုအဝန်းလိုက် တည်နေမည်မှာအမှန်ပင်။ လူငယ်တို့ ခိုလှုံရာ နွေးထွေးသော ရင်ခွင်ကျယ်ကြီးတစ်ခု ဖြစ်လိမ့်မည်ဆိုလျှင် လွန်အံ့မထင်။ ပညာချဲ့ထွင် ဖွံ့ဖြိုး တိုးတက်လာခြင်းနှင့်အတူ အနာဂတ်အရင်းအမြစ်ကောင်းများလည်း ပေါ်ထွက်လာပေလိမ့်မည်။ ကောင်းကင်ကြီးသည် သင်ခန်းစာမှတ်တမ်း ကျောက်သင်ပုန်းဖြစ်နေခဲ့လျှင် လူတို့ဖန်တီးရာ လေယာဉ်/ ရဟတ်ယာဉ်များမှာ ဝလုံးအမှတ်အသားကဲ့သို့ အခြေပြု အခြေခံလေကြောင်း စွမ်းအားများ ဖြစ်ကြောင်း ပြောရပေလိမ့်မည်။
တကယ်တော့ လေကြောင်း လူငယ်သင်တန်းသည် လေကြောင်းပညာ အညွန့်အဖူးထုံကူးရုံမက လမ်းကြောင်းပြညွှန်ပညာအမြင့် လှမ်းဆင့်ကမ်းပေးခြင်းလည်းဖြစ်၏။
တစ်နည်းဆိုရလျှင် မျိုးဆက်အသစ်...အသစ် ထွန်းသစ်စေရေးပခုံးဖြင့် ထမ်းတင်ပေးခြင်း အစီအစဉ် လည်း ဖြစ်သည်။
ယနေ့ မျက်မှောက်ခေတ်ကာလ၌ပင် သိပ္ပံနှင့်နည်းပညာ၏ ဖြန့်ကြက်မှုတွင် လေကြောင်းပညာရပ် အရွှေ့အပြောင်းကြီးမားလာမှုများ မြင်တွေ့နေရပေသည်။ မျိုးဆက်တစ်ဆက်နှင့်တစ်ဆက် ကွာဟမှု မရှိစေဘဲ “ချင့်တွက် ဆင့်လျက် မြင့်တက်လာရေးသည်” အလွန်အရေးကြီးလှပါ၏။
လူငယ်တို့၏စိတ်ကူးစိတ်သန်း၊ ပညာရပ်ဆိုင်ရာကျွမ်းကျင်မှု၊ တစ်ဦးချင်းစီ၏ ပင်ကိုအရည်အချင်းအပြင် ကြိုးစားမှု၊ လေ့ကျင့်မှုနှင့်ပေးဆပ်မှုများ ပြည့်တင်းအောင် ဆောင်ရွက်လာရပေမည်။
ဤသင်တန်းကြောင့် လေသူရဲလေယာဉ်သားများနည်းတူ လေကြောင်းဆိုင်ရာပညာရပ်များကို လက်ပွန်း တတီးထိတွေ့လာရမည်။ လေယာဉ်/ရဟတ်ယာဉ်များနှင့် အကျွမ်းတဝင်ကိုင်တွယ်လေ့လာခွင့်များ ရရှိလာ ပေလိမ့်မည်။
သင်တန်းအလိုက် သင်တန်းပို့ချမှုများသည် လေ့လာ၊ လေ့ကျင့်၊ နာယူ မှတ်သားလိုက်နာခြင်းဖြင့် အကျိုးဆက်ကား ကြီးမြင့်လှပေ၏။ စိတ်ပါဝင်စားမှုအပိုင်းတွင် လေယာဉ်ပျံသန်းမှုအတတ်ပညာနှင့် စက်မှုလက်မှုဆိုင်ရာ တည်ဆောက်၊ ကြံဆ၊ ပြုပြင်၊ တီထွင်၊ ဖန်တီးဆန်းသစ်မှု အသိပညာတို့၏ အားပြိုင်မှုအပေါ်တွင်လည်း တွေ့မြင်သုံးသပ်နိုင်စွမ်း ရှိလာပေမည်။ ထိုမှခွဲထွက်လာသည့် နှစ်သက်ရာ ဘာသာရပ် အလိုက်မူတည်ကာ ကျွမ်းကျင်မှုပညာရှင် လမ်းကြောင်းသို့ ရည်မျှော်နိုင်ပါ၏။ အခြေခံ ကျကျ လေ့လာဆည်းပူးခွင့် ရရှိခြင်းကပင်လျှင် လူငယ်ထုအတွက် အခွင့်အရေးကြီး တစ်ခုပင်ဖြစ်သည်။ ကျောင်းသားဘဝမှာပင် အာကာသသိပ္ပံဆိုင်ရာချဉ်းကပ်မှု ဗဟုသုတများ ပြည့်စုံနေခြင်းဖြင့် မိမိတို့၏ မျိုးဆက်ဘဝကို မိမိတို့ကိုယ်တိုင်ပုံဖော် ထုဆစ်နေခြင်းသဘော သက်ဝင်မှုဖြစ်ပေလိမ့်မည်။ စင်စစ် လေကြောင်းလူငယ်များ၏ ကိုယ်ရေးသမိုင်းအစ၊ အဖွင့်၊နိဒါန်းဟုဆိုလောက်ပါ၏၊ ဆိုနိုင်၏။
အစ၊ အဦး...နိဒါန်းဆိုသည်နှင့်.. အသစ် ...အသစ် ...ဟုမြင်၏။
နေအရုဏ် ဖူးသစ်စ...၊
လေနှင့်စီးမျောလာသည့်ခံစားမှုက...
သင်းသင်းမြမြ...၊ တမာရနံ့များ
လား...။
ကျွန်တော့်အတွေးအမြင်ဝယ်စိတ်ကူးရုပ်ပုံသစ်များ ထင်ဟပ်လာသည်။
လေကြောင်းပညာ အဝန်းအဝိုင်းသို့ လူငယ်များ ယုံကြည်ကိုးစားချဉ်းကပ်လာမှု၊ တပ်မတော် ကာကွယ်ရေးဦးစီးချုပ်ကိုယ်တိုင် နှစ်စဉ်လေကြောင်း လူငယ်မောင်မယ်လေးများနှင့် ရင်းရင်းနှီးနှီး တွေ့ဆုံနှုတ်ဆက်သြဝါဒအမှာချီးမြှင့်ကာ ဂုဏ်ပြုစကားမိန့်ကြားနေမှုများ၊ တပ်မတော်(လေ) ဝတ်စုံ... အဆင် အပြင်ဝယ် မိုးပြာရောင် လည်စီးကိုယ်စီနှင့် နုနယ်ပျိုမျစ်အပြုံးပိုင်ရှင် လေကြောင်းလူငယ် မောင်မယ်လေးများ...ပြီးတော့...သူတို့ရှေ့တွင် ခန့်ခန့်ထည်ထည် ကြီးကြီးမားမား ရှိနေသည့် လေယာဉ်ရုံ အဆောက်အအုံ၊ အမျိုးအစားစုံလင်... လေယာဉ်/ရဟတ်ယာဉ်များ... အားလုံးသော မြင်ကွင်း... ရင်ခုန်စရာ ကြည်နူးစရာပင်... အရုဏ်ဦးမှာ...ပန်းသစ်ပွင့်သတဲ့...။
သူတို့...သူတို့သည် ပန်းကလေးများပေါ့။ နေအရုဏ်နှင့်ပွင့်လာသည့် ကြာမုံပွင့်ပန်းလေးတွေပေါ့...။ ကျွန်တော့်အနေနှင့် ထိုထက်မက ဆင့်ထပ်၊ သင့်မြတ်၊ ဖွင့်အပ်ချင်သည့် အမြင်မျိုးမြင်လာသည်။ ဒါကလည်း တိုက်တိုက်ဆိုင်ဆိုင်ရင်ထဲမှာ ပေါ်လာသည့် ခံစားမှုလေးတစ်ခုကြောင့်ထင်ပါသည်။
ကြာတော့ဖြင့်ကြာခဲ့ပါပြီ ...ကျွန်တော် ငယ်ငယ် အလယ်တန်းကျောင်းသားအဖြစ် နှုတ်တိုက်ကျက် မှတ်သင်ကြားခဲ့ရသည့် အင်္ဂလိပ်ကဗျာလေး တစ်ပုဒ်ဖြစ်၏။
အင်္ဂလိပ်လိုရော...မြန်မာလိုပါ အကြိမ်ကြိမ် အလွတ်ရွတ်ဆိုခဲ့ရဖူးသည်ကိုမမေ့၊ ယနေ့တိုင် ရင်ထဲမှာ ကိန်းဝပ်နေဆဲ..မြန်မာဘာသာပြန်ဖော်ပြရလျှင်...“မှိတ်တုတ်..မှိတ်တုတ်... ကြယ်လေးရယ်...သင့်အား ဘယ်လောက် အံ့သြဖွယ်...အလွန်မြင့်တဲ့... ကောင်းကင် ဝယ်စိန်တစ်လုံးနှင့်တူလှတယ်...”တဲ့...။
ကြည့်စမ်း...ကောင်းကင်ပြာပြာထက်က အလင်းဘက်..ဝင်းလက်နေသည့် ကြယ်လေးကိုဖွဲ့ဆိုတင်စားမှု၊ ရိုးရိုးရှင်းရှင်းလေးနှင့် အတွေးစကိုရှည်ဖြန့်စေသည့် အဖွဲ့အနွဲ့...သူဆိုလိုသည်မှာ ကြယ်လေး တစ်လုံး တည်း၊ ကျွန်တော့်အတွေး ကျွန်တော့်အမြင်ဆွဲယူလိုက်သည်မှာ ပန်းနှင့်ကြယ်ပေါင်းစပ်ပြုဝိသေသ၊ သက်ရောက် ခြင်းသဘောတရား ကြယ်ပန်းခင်းလေး..စုသင်းဖွဲ့မီ...မိုးတိမ်ပန်းချီပေါ့...။
တကယ်လည်း ပန်းကြယ်ပွင့်လေးများနှင့်တူလှသည့် လေကြောင်း လူငယ်မောင်မယ်လေးများသည် နှစ်လိုဖွယ်အပြုံးနှင့်ချစ်စရာ။ ပျိုမျစ်သည့် ခွန်အားက အပြည့်။
မျိုးဆက်သစ်ပီပီ ထမ်းဆောင်ရန် တာဝန်အတွက် ကြံ့ခိုင်မှုအသင့်...အသင့်... ကျွန်တော်ယုံကြည် နေပါသည်။ မကြာတော့ပြီဖြစ်သည့် သမိုင်းသစ်တွင်... ကြယ်အပေါင်းရံကာ လှပမှုအပေါင်း သရဖူ ဆောင်းမည့်...နိုင်ငံတော်ကြီးအဖြစ်...။ ။
မောင်လတ်(ကမ်းရိုးတန်း)