ခုနစ်နှစ်ကြာသည်အထိ အထီးအဖြစ် မှတ်ယူခံထားရသည့် ရေမြင်းတစ်ကောင်က တကယ်တမ်းတွင် အမဖြစ်နေ
ဂျပန်နိုင်ငံ တိုကျိုမြို့ရှိ တိရစ္ဆာန်ရုံတစ်ခုမှ အသက် ၁၂ နှစ်ရှိနေပြီဖြစ်သည့် ရေမြင်းတစ်ကောင်ကို တာဝန်ရှိသူများက အထီးအဖြစ် ခုနစ်နှစ်ကြာ မှတ်ယူထားရာမှ တကယ်တမ်းတွင် ထိုရေမြင်းသည် အမဖြစ်ကြောင်း သိရှိလိုက်ရသည်ဟု အဆိုပါ တိရစ္ဆာန်ရုံက ဧပြီလ၂၃ ရက်တွင် ထုတ်ပြန်သည်။
မက္ကဆီကိုရှိ ဆာဖာရီဥယျာဉ်မှ ၂၀၁၇ ခုနှစ်တွင် လက်ခံရရှိလာသည့် ထိုရေမြင်းအတွက် အချက်အလက်များကို ဖြည့်သွင်းရာတွင် အထီးဟုသာ ဖြည့်သွင်းခဲ့ခြင်း ဖြစ်သည်။
သို့သော် ထိုရေမြင်းသည် အပေါ့အပါးသွားရာတွင် အထီးများ၏ ဟန်ပန်ပုံစံဖြင့် သွားခြင်းမဟုတ်ဘဲ အမ၏ ဟန်ပန်ပုံစံဖြင့်သာ သွားသည်ကိုတွေ့ရကြောင်း တိရစ္ဆာန်ရုံဝန်ထမ်းများက ပြောသည်။
ထိုရေမြင်း၏မျိုးပွားအင်္ဂါကို သွားရောက်ကြည့်ရှုရမည့် အခြေအနေမှာလည်း အလွန်အန္တရာယ်များသော အနေအထား ဖြစ်သည့်အတွက် ဝန်ထမ်းများက ထိုရေမြင်းကို အထီးဟုပင် သတ်မှတ်ထားခြင်းဖြစ်သည်။
ထို့ကြောင့် အဆိုပါရေမြင်း၏ ဒီအန်အေကို စစ်ဆေးပေးရန် ပြင်ပပညာရှင် အဖွဲ့ကို အကူအညီတောင်းခံခဲ့ပြီး အဖြေထွက်လာသောအခါ ထိုရေမြင်းမှာ အမဖြစ်နေသည်ကို တွေ့ရခြင်းဖြစ်သည်ဟု တိရစ္ဆာန်ရုံ၏ ထုတ်ပြန်ချက်တွင် ဖော်ပြထားသည်။
ယင်းအတွက် တိရစ္ဆာန်ရုံအနေဖြင့် ရေမြင်းအမနှင့် သင့်လျော်သည့် ပတ်ဝန်းကျင်ကို ဖန်တီးပေးသွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်ဟု သိရသည်။