အစာမကြေရောဂါ သတိပြုပါ
အစာမကြေရောဂါသည် ကမ္ဘာပေါ်တွင် အဖြစ် အများဆုံးသောရောဂါတစ်မျိုးဖြစ်သည်။ အစာမကြေ ခြင်းကြောင့် အစာအိမ်ရောင်ရောဂါ၊ အူရောင်ရောဂါ နှင့် နာတာရှည်ရောဂါအမျိုးမျိုး နောက်ဆက်တွဲဝင် ရောက်လာတတ်သည်။ ရောဂါမှန်သမျှသည် အစာ မကြေခြင်းကစသည်ဟု ဆေးကျမ်းများကဆိုသည်။
ဝမ်းချုပ်တတ်သူ အတော်များများသည် အစာမကြေရောဂါရှိသူများ ဖြစ်သည်။ ထိုသူများသည် အစာမကြေရောဂါကို ဦးစွာကုသရမည့်အစား ဝမ်းနုတ်ဆေးအမျိုးမျိုးကို အားကိုးပြီး ဝယ်ယူသောက် သုံးနေကြသည်ကို တွေ့ရသည်။ မြန်မာဆေးအမျိုးမျိုး တွင် ရောင်းအားအကောင်းဆုံးဆေးမှာ ဝမ်းနုတ် ဆေးပင်ဖြစ်သည်။ ဝမ်းနုတ်ဆေးကိုပင် သွေးတိုးကျ ဆေး၊ အဆီကျဆေး၊ ပိန်ဆေး၊ ရုပ်လှဆေး၊ အကြော ပြေဆေး စသည်ဖြင့် နာမည်အမျိုးမျိုးတပ်၍ ရောင်းချလျက်ရှိကြသည်။ ဝမ်းနုတ်ဆေးစားခြင်းဖြင့် ရေရှည်တွင် ဖြစ်လာမည့် ကျန်းမာရေးဆိုးကျိုးကို မသိကြ၍ သောက်သုံးနေကြခြင်း ဖြစ်သည်။ အူမကြီးအတွင်းမှ သက်စောင့်အချွဲမြှေးများသည် ဝမ်းနုတ်ဆေးဒဏ်ကြောင့် တဖြည်းဖြည်းပါးလာပြီး အူမကြီးနှင့်ပတ်သက်သော ရောဂါအမျိုးမျိုး ခံစားရနိုင်သည်ကို အထူးပင်သတိပြုသင့်သည်။
ဝမ်းချုပ်တတ်သူများအနေဖြင့် အစာမကြေဖြစ်စေနိုင်သော အောက်ပါအချက်များကို သတိပြုစစ်ဆေး သင့်သည်။
(၁)မိမိ၏သွားများ ကောင်းမွန်ခြင်း ရှိ၊ မရှိ စစ်ဆေးသင့်သည်။
(၂)သွားကောင်းလျှင်လည်း အစားစားသောအခါ တစ်လုတ်လျှင် ၁၀ ကြိမ်ခန့် ဝါးပြီးမှသာ မျိုချသင့်သည်။
(၃)အစာကို အချိန်မှန်မှန်စားသုံးသင့်သည်။
(၄)အစာကို နေ့စဉ်ပူပူနွေးနွေးစားသလား၊ အေးစက်သောအစာများကို စားသုံးနေပါသလား သတိပြု သင့်သည်။
(၅)ထမင်းစားရန် သီးသန့်အခန်းရှိ၊ မရှိ သို့မဟုတ် မိမိအလုပ်စားပွဲတွင်ပင် စားလေ့ရှိပါသလား။ သတိပြုသင့်သည်။
(၆)ထမင်းစားနေစဉ်နှင့် ထမင်းစားပြီးနောက် ရေခဲရေ သို့မဟုတ် အအေး၊ အချိုရည်များ သောက်သုံး ခြင်းကို ရှောင်ကြဉ်သင့်သည်။
(၇)အစားစားပြီးလျှင် ခေတ္တမျှ လမ်းလျှောက်သည့် အလေ့အထ ပြုလုပ်သင့်သည်။
(၈)ညနေစာ သို့မဟုတ် ညစာမစားသုံးမီလမ်းလျှောက်ခြင်း သို့မဟုတ် လေ့ကျင့်ခန်းတစ်ခုခု ပြုလုပ်ခြင်း အလေ့အထ ပြုလုပ်သင့်သည်။
(၉) ညအိပ်ရာဝင်ချိန်နှင့် နံနက်စောစောအိပ်ရာ ထချိန်တွင် ရေတစ်ဖန်ခွက် သောက်သည့် အလေ့အထ ပြုလုပ်သင့်သည်။
အထက်ပါအချက်များတွင် အစာမကြေ၊ ဝမ်းချုပ် ခြင်းအတွက် လိုက်နာကျင့်သုံးသင့်သည်များနှင့် ဆောင်ရန်၊ ရှောင်ရန်များ ဖြစ်သည်။
အစားစားသောအခါ ဆာမှစားခြင်းသည် အကောင်းဆုံးဖြစ်သည်။ ထမင်းစားပျက်အောင် ထမင်းစား ချိန်နီးမှ လက်ဖက်ရည်သောက်ခြင်း၊ အချိုရည်သောက်သုံးခြင်း၊ မုန့်ပဲသရေစာစားခြင်းတို့ကို မပြုလုပ် သင့်ပေ။ အထူးသဖြင့် ထမင်းမစားမီ တစ်နာရီအတွင်း မုန့်များမစားသင့်ပေ။ ထမင်းစား ပျက်သွား စေနိုင်သည်။ ကြားချိန်တွင် စားသုံးထားသဖြင့် မဆာဘဲထမင်းစားလျှင် များများ မစားနိုင်တော့ သည့်အပြင် အစာမကြေလည်းဖြစ်တတ်သည်။ စားချင်သည့်စိတ်ဖြစ်မှသာ ဝမ်းမီးတောက်သည်။ ဝမ်းမီးတောက်မှ အစာကြေနိုင်မည် ဖြစ်မည်။
တချို့သူများသည် တီဗွီကြည့်ရင်း အစားအသောက်များ စားကြသည်။ တီဗွီဇာတ်လမ်းထဲတွင် စိတ်ရောက်နေသဖြင့် စားသည့်အစာတွင် စိတ်မရောက် ဖြစ်နေတတ်သည်။ အစာ၏အရသာကိုခံပြီး ကြေညက်အောင်ဝါးမစားလျှင်လည်း အစာမကြေဖြစ်တတ်သည်ကို သတိပြုရန်လိုသည်။ ထို့ထက်ပို၍ ဆိုးသည်မှာ အစားစားပြီးနောက် ခေတ္တမျှ လမ်းလျှောက်ခြင်းမပြုဘဲ တီဗွီဇာတ်လမ်း ပြီးဆုံးသည် အထိကြည့်ကာ တီဗွီရှေ့၌ အိပ်ပျော်နေတတ်သူများမှာ အဆိုးဆုံးဖြစ်သည်။ ထိုသူများမှာ အစာမကြေ ဖြစ်နိုင်သည့်အပြင် ကြာလျှင် အူမကြီးရောင်သည့် ရောဂါပါရနိုင်သည်။
အစားမစားမီ ရေသောက်လျှင် အစားပျက်တတ်သည်။ အစာကြေစေရန် အစားစားခြင်း၏ အလယ်တွင် ရေသောက်သင့်သည်။ အစာမနင်စေရန် ရေကိုသင့်တော်ရုံသာ သောက်ရမည်။ အစားစားပြီးချင်း ရေသောက်ပါက ဝမ်းမီးငြိမ်း၍ အစာမကြေ ဖြစ်တတ်သည်။ အစားစားပြီး ခဏကြာမှသာ ရေသောက် သင့်သည်။ ရေကျက်အေးသောက်ခြင်းသည် အစာကို ပို၍ကြေစေနိုင်သည်။ ရေနွေးကြမ်းလည်း သောက်နိုင်သည်။ အလွန်အေးသော ရေခဲရေသောက်ခြင်းကို ရှောင်ကြဉ်သင့်သည်။
အစာကြေညက်စွာဝါးစားနိုင်ရန် မိမိ၏သွားများ ကောင်း၊ မကောင်းစစ်ဆေးသင့်သည်။ သွားမကောင်း လျှင် အလျင်အမြန်ဖာထေးပြုပြင်သင့်သည်။ သွားများသည် အစာကိုကြိတ်ဝါးရန် သဘာဝကပေးသော အစာခြေစက်ဖြစ်သည်။ တစ်လုတ်လျှင် ၁၀ ကြိမ်ခန့်ဝါးစားမှသာ အစာကြေစေနိုင်ကြောင်း အစာ မကြေရောဂါဖြစ်ပွားမှုမှ ကာကွယ်နိုင်ရန် အကြံပြုရေးသားလိုက်ရပါသည်။ ။
ကြည်လွင်မြင့်(မုဒြာ)