ပြည်သူတွေအတွက်မြန်မာ့မီးရထား

ပြည်သူတွေအတွက်မြန်မာ့မီးရထား

ပြည်သူလူထု၏ လူနေမှုဘဝစားဝတ်နေရေးဖြစ်သည့်  လူမှုရေး၊  စီးပွားရေး၊  ကျန်းမာရေးတို့နှင့် ဆက်စပ်လျက်ရှိသည်မှာ သယ်ယူပို့ဆောင်ရေးကဏ္ဍဖြစ်သည်။ နိုင်ငံအတွင်းရှိ  တစ်နေရာနှင့်တစ်နေရာ ဒေသတစ်ခုနှင့်တစ်ခုသို့  လျင်မြန်ချောမောစွာရောက်ရှိရေးတွင်လည်း သယ်ယူပို့ဆောင်ရေးသည်အဓိက နေရာတွင်ရှိနေသည်။ သယ်ယူပို့ဆောင်ရေးကဏ္ဍတွင် မီးရထားဖြင့်ခရီးသွားလာခြင်းမှာ လူလည်း သက်သာပြီး ကုန်ပစ္စည်းများလည်းပိုမိုသယ်ဆောင်နိုင်သည်။ ရထားပို့ဆောင်ရေးလုပ်ငန်းသည် နိုင်ငံတစ်ဝန်းလုံး၏ သယ်ယူပို့ဆောင်ရေးကဏ္ဍအတွက် မရှိမဖြစ်လိုအပ်သည်ဖြစ်ရာ မြန်မာ့မီးရထားဝန်ထမ်းများ အနေဖြင့်လည်း ရထားပြေးဆွဲမှုလုပ်ငန်းတွင် အဓိကကျသည့်လုံခြုံစိတ်ချရမှု၊ အချိန်မှန်ကန်မှု၊ ခရီးသွားပြည်သူများ စိတ်ချမ်းမြေ့စွာ ခရီးသွားလာနိုင်မှု စသည့် အချက်များကို အလေးထားပြီး ဆောင်ရွက်ပေးလျက်ရှိသည်။

မြန်မာနိုင်ငံတွင် ၁၈၇၇ ခုနှစ် မေလ ၁ ရက်နေ့မှစတင်၍ ရန်ကုန်-ပြည်ရထားလမ်းဖောက်လုပ်ခြင်း နှင့်အတူ ရထားလုပ်ငန်းပေါ်ပေါက်လာခဲ့သည်။ ၂၀၂၄ ခုနှစ် မေလ ၁ ရက်နေ့တွင် ရထားလုပ်ငန်းသည် နှစ်ပေါင်း(၁၄၇)နှစ် ပြည့်မြောက်ခဲ့ပြီဖြစ်သည်။ သမိုင်းကြောင်းရှည်လျားခဲ့သည့်ကာလအတွင်း ရထားပြေး ဆွဲခြင်းလုပ်ငန်းဖြင့် ပြည်သူတို့အားဝန်ဆောင်မှုပေးနေသည်မှာ လုပ်ငန်းအတွေ့အကြုံလည်း များစွာရှိနေပြီဖြစ်သည်။  ရထားပြေးဆွဲခြင်းနှင့် ပတ်သက်၍ မြန်မာနိုင်ငံသည်အရှေ့တောင်အာရှနိုင်ငံများတွင် သက်တမ်းအရင့်ဆုံးအဖြစ် ဂုဏ်ယူနိုင်သည်။ ၁၉၈၉ ခုနှစ် ဧပြီလ ၁ ရက်နေ့တွင် ရထားပို့ဆောင်ရေး ကော်ပိုရေးရှင်းအမည်အား မြန်မာ့မီးရထားဟု ပြင်ဆင်ခေါ်ဝေါ်ခဲ့သည်မှာ ယနေ့တိုင်ဖြစ်သည်။

မြန်မာ့မီးရထားအနေဖြင့်ဖြတ်သန်းခဲ့ရသည့် (၁၄၇) နှစ်ကြာ ခရီးရှည်တစ်လျှောက်တွင် ခေတ်စနစ်များ အမျိုးမျိုးအဖုံဖုံ ပြောင်းလဲခဲ့သော်လည်း မြန်မာ့မီးရထားသည် ပြည်သူလူထုအကျိုးကိုသာ တစိုက်မတ်မတ် ဦးတည်ဆောင်ရွက်ခဲ့သည်။ ၁၉၈၈ ခုနှစ်မှစ၍ ယနေ့ထိ ရထားလမ်းခရီးမိုင် ၁၈၂၂ မိုင်ခန့်နှင့် ဘူတာရုံ ၄၇၃ ခု တိုးချဲ့ဖောက်လုပ်နိုင်ခဲ့သည့်အတွက် နိုင်ငံတစ်ဝန်းလုံးတွင်ယခုအခါရထားလမ်းခရီးမိုင်စုစုပေါင်း ၃၈၀၀ ကျော်နှင့်ဘူတာရုံပေါင်း ၉၆၀ ရှိနေပြီဖြစ်ကြောင်းသိရှိရသည်။ မြန်မာ့မီးရထား၏အဓိကလုပ်ငန်းတာဝန်မှာ ခရီးသည်နှင့်ကုန်စည်များကို လုံခြုံချောမွေ့စွာ သယ်ယူပို့ဆောင်ပေးခြင်းဖြင့် နိုင်ငံတော်ကိုဘက်စုံ၊ ကဏ္ဍစုံမှ ဖွံ့ဖြိုးတိုးတက်ရေးကို အထောက်အကူပြုလျက်ရှိခြင်း ဖြစ်သည်။

မြန်မာ့မီးရထားသည် ပြည်သူလူထုကို ဝန်ဆောင်မှုပေးလျက်ရှိသော သယ်ယူပို့ဆောင်ရေးစနစ် တစ်ခုဖြစ်သည်နှင့်အညီ ခရီးသွားပြည်သူများအပေါ် ကောင်းမွန်ပြည့်စုံသည့် ဝန်ဆောင်မှုပေးနိုင်ရေးအစဉ် ကြိုးပမ်းဆောင်ရွက်လျက်ရှိသည်။ ပါဆယ်ပစ္စည်းနှင့် ကုန်စည်အမျိုးမျိုးကို ရထားလမ်းတစ်လျှောက်ဒေသ အသီးသီးသို့ဈေးနှုန်းသက်သာပြီး လျင်မြန်စွာသယ်ယူပေးပို့နိုင်ရေးကိုလည်း ပဓာနကျသည့်ရည်မှန်းချက် တာဝန်တစ်ရပ်အဖြစ် ထားရှိဆောင်ရွက်လျက်ရှိသည်။

မြန်မာ့မီးရထား၏ခရီးသည်နှင့်ကုန်စည်ပို့ဆောင်ခြင်းလုပ်ငန်းအနေဖြင့် ၂၀၂၃ ခုနှစ် ဧပြီလမှ ၂၀၂၄ ခုနှစ် မတ်လအထိ  ခရီးသည်ဦးရေ ၇ ဒသမ ၈၀၁ သန်း၊ ခရီးသည်မိုင်  ၅၄၁ ဒသမ ၃၄၂ သန်းနှင့် ခရီးသည်ဝင်ငွေကျပ်သန်းပေါင်း ၁၅၉၀၁ ဒသမ ၀၃၀ သန်း စွမ်းဆောင်နိုင်ခဲ့သည်။ ကုန်စည်ပို့ဆောင်ရေး အနေဖြင့် ကုန်တန်မိုင် ၃၅၃ ဒသမ ၉၃၂ သန်းနှင့် ကုန်ဝင်ငွေ ၁၃၅၇၈ ဒသမ ၁၉၀ သန်း စွမ်းဆောင်နိုင်ခဲ့သည်။ လက်ရှိတွင် လူစီးအမြန်ရထား ၁၂ စင်း၊ စာပို့ရထား ရှစ်စင်း၊ လူစီး^ကုန်တင်ရထား ခြောက်စင်း၊ ခရီးတိုရထားနှစ်စင်း၊ မြို့ပတ်နှင့်ဆင်ခြေဖုံးရထား ၃၅ စင်း စုစုပေါင်း ၆၃ စင်း၊ ရိုးရိုးတန်းကုန်ရထား၊ ကုန်သေတ္တာရထား၊ ကျောက်ရထား၊ အင်ဂျင်နီယာရထား စုစုပေါင်း ၂၄ စင်း ပြေးဆွဲလျက်ရှိသည်။

နိုင်ငံတော်အကြီးအကဲ၏လမ်းညွှန်ချက်အရ ရှမ်းပြည်နယ်(တောင်ပိုင်း)ရှိ တောင်ကြီး-ရွှေညောင်ရထားလမ်း အဆင့်မြှင့်တင်ခြင်း လုပ်ငန်းများကို ဆောင်ရွက်နိုင်ခဲ့ပြီး ဖြစ်သည့်အပြင် ရှမ်းပြည်နယ်(တောင်ပိုင်း)၏ သဘာဝအလှတရားများကို အများပြည်သူများ ကြည့်ရှုခံစားနိုင်စေရန်အတွက် စနေ၊တနင်္ဂနွေ အများပြည်သူရုံးပိတ်ရက်များနှင့် ကျောင်းပိတ်ရက်များတွင် တောင်ကြီးဘူတာမှ ပေါမူဘူတာအထိ  Sight-seeing  ရထားကိုစီစဉ်ပြေးဆွဲပေးလျက်ရှိသည်။ ထို့ပြင် ပင်းပက်-နောင်ကားလမ်းခွဲ ၁၀ ဒသမ ၇၈ မိုင် ရထား လမ်းအသစ်ဖောက်လုပ်ခြင်း၊ တောင်ကြီး-ရွှေညောင်-သာစည်-မြင်းခြံရထားလမ်းပိုင်းအဆင့်မြှင်တင်ခြင်း လုပ်ငန်းများ ဆောင်ရွက်ပေးနိုင်ခဲ့သည်။ ရန်ကုန်-မန္တလေးရထားလမ်းပိုင်း အဆင့်မြှင့်တင်ရေး လုပ်ငန်းအဆင့် (၁)၏ရန်ကုန်-တောင်ငူလမ်းပိုင်း အဆင့်မြှင့်တင်ရေး လုပ်ငန်းမှာလည်း၂၀၂၄ ခုနှစ် နိုဝင်ဘာလတွင် အပြီးသတ် ဆောင်ရွက်နိုင်မည်ဖြစ်သည်။

မြန်မာ့မီးရထားအနေဖြင့်   နိုင်ငံအနှံ့အပြားပြည်သူများ၏ ခရီးသွားလာမှုနှင့်  ကုန်စည်ပို့ဆောင်မှု အဆင်ပြေချောမွေ့ မြန်ဆန်စေရေး၊ ရထားလမ်းအခြေခံအဆောက်အဦများ ပိုမိုကောင်းမွန်လာစေရေးတို့ အတွက်  တစိုက်မတ်မတ်ကြိုးပမ်းဆောင်ရွက်ပေးလျက်ရှိသည်။   မြန်မာ့မီးရထားမှအရာထမ်း၊ အမှုထမ်း များကလည်း ဘေးအန္တရာယ်အခက်အခဲများကြားမှ နေ့နေ့ညညတာဝန်များကို ထမ်းဆောင်လျက်ရှိသည်။ အနှစ်ချုပ်ဆိုရသော် မြန်မာ့မီးရထားသည် ကြုံလာသည့် အခက်အခဲမှန်သမျှကို ကျော်လွှားကာ ပြည်သူလူထု အကျိုးကို သယ်ပိုးနေမည်သာ ဖြစ်ပါကြောင်း ဂုဏ်ပြုရေးသား လိုက်ရပေသည်။  ။