နိုင်ငံ့စီးပွား အလေးထားဆောင်ရွက်

 

နိုင်ငံ့စီးပွား အလေးထားဆောင်ရွက်

 

အယ်ဒီတာ့အာဘော်                

 (၂၀၂၄ ခုနှစ်၊ မေ ၁၃ ရက်)

    နိုင်ငံတော်စီမံအုပ်ချုပ်ရေးကောင်စီသည် တိုင်းပြည်သာယာ ဝပြောရေးနှင့် စားရေရိက္ခာဖူလုံရေးတို့ အတွက် တိုင်းရင်းသားပြည်သူ တစ်ရပ်လုံးနှင့် အကျုံးဝင်သော စိုက်ပျိုးရေးနှင့် မွေးမြူရေးကို ခေတ်မီနည်းစနစ် များဖြင့် တိုးတက်အောင်ဆောင်ရွက်ပြီး အခြားစီးပွားရေး ကဏ္ဍများကိုလည်း ဘက်စုံဖွံ့ဖြိုး တိုးတက်အောင် တည်ဆောက်ရေးဟူသည့် စီးပွားရေး ဦးတည်ချက်နှင့်အညီ ဆောင်ရွက်လျက်ရှိသည်။ စိုက်ပျိုးမွေးမြူရေး  လုပ်ငန်းတိုးတက် ကောင်းမွန်မှသာ စက်မှုလုပ်ငန်း၊ ဝန်ဆောင်မှု လုပ်ငန်းနှင့် အသေးစား၊ အငယ်စားနှင့် အလတ်စားစီးပွားရေး လုပ်ငန်းများလည်း တိုးတက်ကောင်းမွန် လာမည်ဖြစ်သည်။

စိုက်ပျိုးမွေးမြူရေး လုပ်ငန်းများကို တိုးတက်လာအောင် ဆောင်ရွက်ရာတွင် ပြည်တွင်း လိုအပ်ချက်ကို ဖြည့်ဆည်းပေးနိုင်ရေးသာမက ပြည်ပနိုင်ငံများသို့ပါ တင်ပို့နိုင်သည်အထိ အရည်အသွေးပြည့်မီသော အဆင့်မီကုန်ပစ္စည်းများ ထုတ်လုပ်ကြရန် လိုအပ်သည်။ နိုင်ငံတော်အနေဖြင့် နိုင်ငံ့စီးပွားမြှင့်တင်ရေး ရန်ပုံငွေဖြင့် လယ်ယာစိုက်ပျိုးရေးကဏ္ဍတွင် တောင်သူလယ်သမားများ၏ စိုက်ပျိုးထုတ်ကုန်များ  ဖွံ့ဖြိုးတိုးတက်ကာ တစ်ဦးချင်းဝင်ငွေ တိုးတက်စေရန်ရည်ရွယ်ပြီး ဖြည့်ဆည်းဆောင်ရွက် ပေးလျက်ရှိသည်။ နိုင်ငံတော်အစိုးရ၏ ကူညီပံ့ပိုးမှုများနှင့်အတူ သီးနှံများကို စိုက်ပျိုးထုတ်လုပ်လျက်ရှိရာတွင် မျိုးကောင်းမျိုးသန့်များ သုံးစွဲခြင်း၊ စိုက်ပျိုးနည်းစနစ်များ ပြောင်းလဲစိုက်ပျိုးခြင်း၊ သွင်းအားစုများ ထည့်သွင်းမှု မှန်ကန်ခြင်းနှင့် စိုက်ပျိုးရိတ်သိမ်းရာတွင် စက်ကိရိယာများကို တွင်ကျယ်စွာအသုံးပြု ဆောင်ရွက်နိုင်ခြင်းတို့ဖြင့် တစ်ဧကပန်းတိုင်အထွက်နှုန်း ရရှိအောင် ဆောင်ရွက်ကြရမည်ဖြစ်သည်။

မကြာမီကာလတွင် မိုးရာသီကာလကို ရောက်ရှိတော့မည်ဖြစ်၍ စိုက်ပျိုးရေးလုပ်ငန်းများကို ကြိုတင် ပြင်ဆင်ဆောင်ရွက် ကြရတော့မည်ဖြစ်သည်။ စိုက်ပျိုးရေးလုပ်ငန်းများ အတွက် လိုအပ်သည်များကို ပြင်ဆင် ဆောင်ရွက်ထားရှိခြင်းဖြင့် လုပ်ငန်းများ လုပ်ကိုင်ဆောင်ရွက်ရာတွင် လွယ်ကူအဆင်ပြေ ချောမွေ့မည်ဖြစ်သည်။

နွေစပါးနှင့်နွေသီးနှံများကို ပြီးခဲ့သည့်ဘဏ္ဍာနှစ်အတွင်း အောင်မြင်ဖြစ်ထွန်းအောင် ဆောင်ရွက်ခဲ့သည့်နည်းတူ မိုးစပါးနှင့်မိုးသီးနှံများကိုလည်း အောင်မြင်ဖြစ်ထွန်းအောင် ဆောင်ရွက်ကြရမည်ဖြစ်သည်။ သို့မှသာ လုပ်ငန်းဆောင်ရွက်သူများ အနေဖြင့် လူမှုစီးပွားဘဝ အဆင်ပြေပြေရှိကြမည်ဖြစ်သည်။ ထို့အတူ နိုင်ငံ့စီးပွားဖွံ့ဖြိုးတိုးတက်မှုတွင် အထောက်အကူပြုနိုင်မည်ဖြစ်သည်။

ပြည်တွင်းစားသုံးဆီ ဖူလုံရေးအတွက် ဆီထွက်သီးနှံစိုက်ပျိုးမှုကို အားပေးမြှင့်တင်ပြီး ပန်းတိုင်ရည်မှန်းချက်အတိုင်း ထွက်ရှိအောင်ဆောင်ရွက်၍ နိုင်ငံအတွင်းဖူလုံမှုမှသည် ပြည်ပသို့တင်ပို့နိုင်သည်အထိ ကြိုးပမ်းဆောင်ရွက်ရေးကို နိုင်ငံတော်က ဦးတည်ချမှတ် ဆောင်ရွက်လျက်ရှိသည်။ ထို့ကြောင့် ဆီထွက်သီးနှံများဖြစ်သည့် မြေပဲ၊ နှမ်း၊ နေကြာတို့ကိုလည်း တိုးချဲ့စိုက်ပျိုးကြရမည်ဖြစ်သည်။ ဆီထွက်သီးနှံအထွက်နှုန်း တိုးတက်လာမှသာ ပြည်တွင်းစားသုံးဆီဖူလုံပြီး ပြည်ပမှ တင်သွင်းနေရမှုများကို လျှော့ချနိုင်မည်ဖြစ်သည်။ ထို့ပြင် ချည်မျှင်ရှည်ဝါ သီးနှံစိုက်ပျိုးမှုကိုလည်း မိုးကြို၊ မိုးနှောင်းရာသီအလိုက် လျာထားချက်ပြည့်မီအောင် တိုးချဲ့စိုက်ပျိုးကြရမည်ဖြစ်သည်။ တိုးချဲ့စိုက်ပျိုးခြင်းနှင့်အတူ ဝါသီးနှံအထွက်နှုန်း တိုးတက်လာအောင်လည်း ကြိုးပမ်းဆောင်ရွက်ကြရမည်ဖြစ်သည်။

မွေးမြူရေးကဏ္ဍတွင် တိရစ္ဆာန်များနှင့် ပတ်သက်၍ အပူရှိန်ပြင်းထန်လွန်ကဲမှု ဒဏ်မှ ကြိုတင်ကာကွယ်ရေးကိုလည်း ဂရုပြုကြရမည်ဖြစ်သည်။ အပူချိန်မြင့်သောအချိန်တွင် အရိပ်ရှိသောနေရာများ၌ ထားရှိရန်၊ နံနက်နှင့်ညနေမှသာ လွှတ်ကျောင်းခြင်းပြုရန်၊ မွေးမြူထားသော တိရစ္ဆာန်များအတွက် သောက်သုံးရေများ လုံလောက်စွာရရှိရေး ကြိုတင်စုဆောင်းရန်၊ ပူပြင်းသောဒဏ်ကို ကာကွယ်ရန်အတွက် ရေဓာတ်ပါသော အစားအစာများကို ဖြည့်စွက်ကျွေးမွေးရန်၊ တိရစ္ဆာန်အစာများဖြစ်သည့် ကောက်ရိုး၊ မြက်စို၊ မြက်နုများ စနစ်တကျကြိုတင် စုဆောင်းထားရန်၊  တိရစ္ဆာန်များတွင် ကူးစက်ရောဂါများ ဖြစ်ပွားကျရောက်စေခြင်း မရှိစေရန်အတွက် ကာကွယ်ဆေးများ ပုံမှန်ထိုးနှံထားရန်၊ ခြံနှင့်အစာသိုလှောင်ထားသော နေရာများတွင် မီးဘေးအန္တရာယ် ကာကွယ်ရေးအတွက် မီးချိတ်၊ မီးကပ်၊ သဲနှင့်ရေပုံးများ ထားရှိရန်နှင့် တိရစ္ဆာန်ကျန်းမာရေးဆိုင်ရာ ထူးခြားဖြစ်စဉ်များရှိပါက သက်ဆိုင်ရာသို့ ဆက်သွယ်အကြောင်းကြား ပူးပေါင်းဆောင်ရွက်ရန်တို့ဖြစ်သည်။

မြန်မာနိုင်ငံ၏ကုန်ထုတ် လုပ်ငန်းများမြှင့်တင်ရေး ကဏ္ဍ၌ စိုက်ပျိုးရေးနှင့် မွေးမြူရေးသည်အဓိက အခန်းကဏ္ဍတွင်ပါဝင်ပြီး အဆိုပါလုပ်ငန်းများကို အခြေခံ၍ စက်မှုကဏ္ဍနှင့်ဝန်ဆောင်မှု ကဏ္ဍများတိုးတက်အောင် ဆောင်ရွက်ကြရမည်ဖြစ်သည်။ စိုက်ပျိုးမွေးမြူရေးထုတ်ကုန်များ တိုးတက်ထွက်ရှိမှသာ စိုက်ပျိုး မွေးမြူရေးကို အခြေခံသည့်စက်ရုံ၊ အလုပ်ရုံများ လည်ပတ်မှုကောင်းမွန်လာမည်ဖြစ်သည်။ ထို့အတူ ဘဏ် လုပ်ငန်းများ၊ ဝန်ဆောင်မှုလုပ်ငန်းများလည်း ပိုမိုကောင်းမွန်လာမည်ဖြစ်သည်။ ထို့ကြောင့် နိုင်ငံတော်အစိုးရ အနေဖြင့် စိုက်ပျိုးမွေးမြူရေးလုပ်ငန်းများ ဖွံ့ဖြိုးတိုးတက်ရေးကို အခြေခံသည့် ကုန်ထုတ်လုပ်ငန်းတိုးတက် ရေးကို အားပေးဆောင်ရွက်နေခြင်း ဖြစ်သည်။ သက်ဆိုင်ရာ လုပ်ငန်းနယ်ပယ်မှ လုပ်ငန်းဆောင်ရွက်သူများ အနေဖြင့် စိုက်ပျိုးမွေးမြူရေး လုပ်ငန်းများကို ခေတ်မီနည်းစနစ်များဖြင့် တိုးတက်အောင်ဆောင်ရွက်ကြပြီး မိမိတို့ပုဂ္ဂလိကစီးပွားရေး၊ နိုင်ငံ့စီးပွားရေးဖွံ့ဖြိုး တိုးတက်ရေးအတွက် တက်ညီလက်ညီ ဆောင်ရွက်ကြရန် ဖြစ်ပါကြောင်း တိုက်တွန်း ရေးသားလိုက်ရပေသည်။  ။