ဒေသဖွံ့ဖြိုးတိုးတက်ရေး တက်ညီလက်ညီ ပူးပေါင်း

 

ဒေသဖွံ့ဖြိုးတိုးတက်ရေး တက်ညီလက်ညီ ပူးပေါင်း

 

အယ်ဒီတာ့အာဘော်                 

(၂၀၂၄ ခုနှစ်၊ မေ ၁၅ ရက်)

    နိုင်ငံတော်စီမံအုပ်ချုပ်ရေး ကောင်စီသည် နိုင်ငံတော်ကိုဘက်စုံဖွံ့ဖြိုး တိုးတက်စေရေးအတွက် အင်တိုက်အားတိုက်ဖြင့် ကြိုးပမ်းဆောင်ရွက်ပေးလျက်ရှိသည်။ တိုင်းဒေသကြီးနှင့်ပြည်နယ်များ အနေဖြင့်လည်း မိမိတို့ဒေသ အလိုက် ဖွံ့ဖြိုးတိုးတက်ရေးကို တတ်စွမ်းသရွေ့ ကြိုးပမ်း ဆောင်ရွက်ကြရမည်ဖြစ်သည်။ ဒေသတစ်ခုဖွံ့ဖြိုး တိုးတက်ရေးအတွက် တည်ငြိမ်အေးချမ်းမှု ရှိနေရမည်ဖြစ်သည်။ မိမိတို့လူမှု ပတ်ဝန်းကျင်တွင် အကြမ်းဖက် လက်နက်ကိုင်သောင်းကျန်းသူတို့ ရှိနေမည်ဆိုပါက မိမိတို့လူမှုစီးပွားဘဝ နိမ့်ကျစေတော့မည်ဖြစ်သည်။ တိုးတက်ကြီးပွားလိုသော လူမှုပတ်ဝန်းကျင်တွင် အဖျက်သမားတို့ ကင်းစင်နေရပေမည်။

အကြမ်းဖက်သမားတို့ရှိနေလျှင် ထိုနေရာပတ်ဝန်းကျင်တွင် မူးယစ်ဆေးဝါးနှင့် လောင်းကစားမှုများ ထူပြောနေမည်ဖြစ်သည်။ နိုင်ငံတော်အစိုးရ အနေဖြင့် ပြည်သူတို့နှင့်လက်တွဲကာ မူးယစ်ဆေးဝါးနှင့် လောင်းကစားမှုများကို ဖော်ထုတ်ဖမ်းဆီးလျက်ရှိရာ ဖမ်းဆီးရမိမှုများစွာ ရှိနေသည်။ ရှမ်းပြည်နယ်(အရှေ့ပိုင်း) ဒေသသည်ယခင်က မူးယစ်ဆေးဝါးနှင့်ပတ်သက်၍ နာမည်ထွက်ပေါ်ခဲ့သည်။ ဒေသအတွင်းမူးယစ်ဆေးဝါး အပါအဝင် တရားမဝင်လုပ်ငန်းများ ဆောင်ရွက်မှုမရှိစေရေးကို ထိန်းသိမ်းဆောင်ရွက် ကြရမည်ဖြစ်သည်။ နိုင်ငံတော်အစိုးရအနေဖြင့် မူးယစ်ဆေးဝါးနှင့် ပတ်သက်၍ နှစ်ပေါင်းများစွာ တိုက်ဖျက်တားဆီးခဲ့ကြပြီး အမျိုးသားရေးတာဝန် တစ်ရပ်အနေဖြင့် ဆောင်ရွက်လျက်ရှိသည်။ တရားဥပဒေစိုးမိုးမှု အားနည်းခြင်းနှင့် နယ်မြေဒေသ မတည်ငြိမ်မှုများကြောင့် မူးယစ်ဆေးဝါးထုတ်လုပ်မှုများနှင့် ရောင်းဝယ်မှုများမှာ အမြစ်ပြတ်ပပျောက်မှု မရှိခဲ့ခြင်းဖြစ်သည်။

နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် မေလ ၁၂ ရက်တွင် ရှမ်းပြည်နယ်(အရှေ့ပိုင်း) ကျိုင်းတုံမြို့နယ်ရှိ ပြည်နယ်၊ ခရိုင်၊ မြို့နယ်အဆင့်ဌာနဆိုင်ရာ တာဝန်ရှိသူများ၊ မြို့မိ၊ မြို့ဖများနှင့်တွေ့ဆုံစဉ် “စီးပွားရေးနှင့်ပတ်သက်၍ ရှမ်းပြည်နယ်(အရှေ့ပိုင်း) အနေဖြင့် ထုတ်ကုန်ပစ္စည်းများ ရရှိစေရေး မိမိအနေဖြင့် တွန်းအားပေး ဆောင်ရွက်ခဲ့ကြောင်း၊ ဒေသတွင်း စိုက်ပျိုးမွေးမြူရေး ထုတ်ကုန်ပစ္စည်းများ ရရှိအောင် ဆောင်ရွက်၍ အိမ်နီးချင်းနိုင်ငံများသို့ တင်ပို့နိုင်မည်ဆိုပါက ဒေသဝင်ငွေ တိုးပွားလာပြီး လူမှုစီးပွားဘဝများလည်း ဖွံ့ဖြိုးတိုးတက် လာနိုင်မည်ဖြစ်ကြောင်း၊ ဒေသတွင်းအောင်မြင်ဖြစ်ထွန်းသည့် စိုက်ပျိုးသီးနှံများကို ခေတ်မီနည်းစနစ်များ အသုံးပြုစိုက်ပျိုး၍ ဈေးကွက်ဝင်ထုတ်ကုန်များ ထုတ်လုပ်နိုင်ရေး ကြိုးပမ်း ဆောင်ရွက်ကြစေလိုကြောင်း” ဆွေးနွေးပြောကြားသည်။

ကုန်ထုတ်လုပ်မှုလုပ်ငန်းများ ဆောင်ရွက်ရာတွင် မိရိုးဖလာဖြင့် ဆောင်ရွက်ခြင်းထက် ခေတ်နှင့်လျော်ညီသည့် ကုန်ထုတ်လုပ်မှုလုပ်ငန်းများကို ဆောင်ရွက်ကြရမည်ဖြစ်သည်။ ထိုသို့ဆောင်ရွက်နိုင်ရေး အတွက် အသိပညာ၊ အတတ်ပညာကြွယ်ဝသည့် လူသားအရင်းအမြစ်ကောင်းများ လိုအပ်သဖြင့် ပညာရေးကို အားပေးဆောင်ရွက်ကြရမည်ဖြစ်သည်။ ကျိုင်းတုံဒေသတွင် အဆင့်မြင့်ပညာများ သင်ကြားနိုင်ရေး နိုင်ငံတော်မှ ဆောင်ရွက်ပေးထားပြီး ဖြစ်သဖြင့် အကျိုးရှိရှိအသုံးချနိုင်ရန် လိုအပ်သည်။ မိဘများ၊ ဆရာများအနေဖြင့်  ပညာရေးကိုအားပေး ဆောင်ရွက်ကြရမည်ဖြစ်သလို ကျောင်းသား၊ ကျောင်းသူများအနေဖြင့် မိမိတို့ဘဝ တိုးတက်မြင့်မားရေးအတွက် ပညာကိုဆုံးခန်းတိုင် သင်ယူကြရမည်ဖြစ်သည်။ နိုင်ငံတော်အစိုးရအနေဖြင့် စိုက်ပျိုးမွေးမြူရေးနှင့် စက်မှုပညာကျွမ်းကျင်သည့် လူသားအရင်းအမြစ်များ ရရှိရေးအတွက် စိုက်ပျိုးရေး၊ မွေးမြူရေးနှင့်စက်မှုအထက်တန်းကျောင်းများကို ဖွင့်လှစ်ပေးထားပြီးဖြစ်ရာ ထိုမှတစ်ဆင့် အဆင့်မြင့်ပညာရပ်များ ဆက်လက်သင်ယူသွားနိုင်ရေး သိပ္ပံများ၊ ကောလိပ်များနှင့်တက္ကသိုလ်များ တိုးချဲ့ဖွင့်လှစ် ပေးသွားမည်ဖြစ်ကြောင်း သိရသည်။

ရှမ်းပြည်နယ်(အရှေ့ပိုင်း)မှ ကျန်းမာရေး၊ အိုင်တီ၊ အင်ဂျင်နီယာပညာရှင်များ မွေးထုတ်ပေးနိုင်ရေး ကြိုးပမ်းကြရမည်ဖြစ်သည်။ ကျောင်းမှသင်ကြားပေးသည့် ပညာရပ်များသာမက အခြားအသိပညာ ဗဟုသုတများ ရရှိစေရေးအတွက်လည်း စာကောင်းပေမွန်များ ဖတ်မှတ်လေ့လာကြရန် လိုအပ်သည်။ ထိုသို့ ဆောင်ရွက်နိုင်ရေးအတွက် နိုင်ငံတော်အစိုးရ အနေဖြင့် စာဖတ်ရှိန်မြှင့်တင်ရေး လုပ်ငန်းများနှင့်စာကြည့်တိုက်များ တိုးချဲ့ပေးနိုင်ရေး၊ စာအုပ်စာစောင်များ ရရှိရေး၊ စာကြည့်တိုက်လုပ်ငန်းများ ဖွံ့ဖြိုးတိုးတက်ရေးတို့ကို အလေးထား ဆောင်ရွက်ပေးလျက်ရှိသည်။

ရှမ်းပြည်နယ်(အရှေ့ပိုင်း)တွင် ခရီးသွားလုပ်ငန်း ဖွံ့ဖြိုးတိုးတက်ရေးအတွက် ကျိုင်းတုံလေဆိပ်နှင့် တာချီလိတ်လေဆိပ်တို့ကို အဆင့်မြှင့်တင်ခြင်း လုပ်ငန်းများ ဆောင်ရွက်လျက်ရှိသည်။ ကျိုင်းတုံမြို့အတွင်း ယာဉ်ကြောပိတ်ဆို့မှု လျှော့ချနိုင်ရေးနှင့် ကုန်စည်စီးဆင်းမှုများ ပိုမိုမြန်ဆန်ချောမွေ့စေရေးအတွက် အကျယ် ၂၃ ပေ၊ လမ်းအရှည် ၆ မိုင်ရှိ ကျိုင်းတုံမြို့ မြို့ရှောင်လမ်းကိုလည်း ဖွင့်လှစ်ပေးပြီးဖြစ်သည်။ ကျိုင်းတုံဒေသသည် ရေမြေတောတောင် သဘာဝနှင့်ရှေးဟောင်း အမွေအနှစ်များစွာ ပိုင်ဆိုင်ထားပြီးဖြစ်၍ ခရီးသွားလုပ်ငန်းများလည်း ပိုမိုအောင်မြင်မည်ဖြစ်သည်။ အနှစ်ချုပ်ဆိုရသော် ဒေသဖွံ့ဖြိုးတိုးတက်ရေး အတွက် အားလုံးက တက်ညီလက်ညီ ပူးပေါင်း ဆောင်ရွက်ကြရန်ဖြစ်ပါကြောင်း ရေးသားလိုက်ရပေသည်။     ။