နေပြည်တော်တိုင်းစစ်ဌာနချုပ်၏ (၁၈)နှစ်မြောက် တိုင်းနှစ်ပတ်လည်နေ့ အထိမ်းအမှတ် ဆုချီးမြှင့်ခြင်း အခမ်းအနားကျင်းပ

 

နေပြည်တော်တိုင်းစစ်ဌာနချုပ်၏ (၁၈)နှစ်မြောက် တိုင်းနှစ်ပတ်လည်နေ့ အထိမ်းအမှတ် ဆုချီးမြှင့်ခြင်း အခမ်းအနားကျင်းပ

နေပြည်တော်၊ ၂၀၂၄ မေ - ၂၁

          နေပြည်တော်တိုင်းစစ်ဌာနချုပ်၏ (၁၈)နှစ်မြောက် တိုင်းနှစ်ပတ်လည်နေ့ အထိမ်းအမှတ် ဆုချီးမြှင့်ခြင်း အခမ်းအနားကို ယနေ့နံနက်ပိုင်းတွင် တိုင်းစစ်ဌာနချုပ်ရှိ အောင်ငြိမ်းအေးခန်းမ၌ပြုလုပ်ရာ တိုင်းမှူး ဗိုလ်ချုပ်စောသန်းလှိုင်၊ တိုင်းစစ်ဌာနချုပ်မှ အရာရှိကြီးများ၊ တပ်နယ်၊ တပ်ရင်း/တပ်ဖွဲ့မှူးများ၊ အရာရှိ၊ စစ်သည်မိသားစုဝင်များနှင့် ဖိတ်ကြားထားသူများ တက်ရောက်ကြသည်။

          ဦးစွာ တိုင်းမှူးက တိုင်းနှစ်ပတ်လည်နေ့ အထိမ်းအမှတ် မိန့်ခွန်းပြောကြား သည်။ ထို့နောက် ၂၀၂၃-၂၀၂၄ ခုနှစ်၊ လေ့ကျင့်ရေးကာလအတွင်း သင်တန်းများတွင် ထူးချွန်ဆု ရရှိသည့် အရာရှိ၊ စစ်သည်များ၊ အိမ်ထောင်သည် လိုင်းသန့်ရှင်းရေး ဆုရရှိသည့် အိမ်ထောင်သည် ရဲမေများ၊ စွမ်းရည်သုံးရပ် ပထမ၊ ဒုတိယ၊ တတိယဆု ရရှိကြသည့် တပ်ရင်းများအား တိုင်းမှူးနှင့် တာဝန်ရှိသူများက ဂုဏ်ပြုမှတ်တမ်းလွှာနှင့် ဂုဏ်ပြုဆုငွေများ အသီးသီး ပေးအပ်ချီးမြှင့်ခဲ့ကြသည်။

           ယင်းနောက် တိုင်းနှစ်ပတ်လည်နေ့ အထိမ်းအမှတ် အရာရှိ၊ စစ်သည်၊ မိသားစု ဝင်များအား မာရဝိဇယဗုဒ္ဓရုပ်ပွားတော်မြတ်ကြီး၏ ပုံတူဆင်းတုတော်များနှင့် ပုံတူ ကားချပ်များ ကံစမ်းမဲဖောက်ပေးခြင်းနှင့် ဗလာမပါကံစမ်းမဲ ဖောက်ပေးခြင်းများ ပြုလုပ်ပေးသည်။ ဆက်လက်၍ အားကစားပြိုင်ပွဲနှင့် ပျော်ပွဲရွှင်ပွဲများ ပြုလုပ်ပေး၍ ဆုများ ချီးမြှင့်ပေးပြီး စားသောက်ဖွယ်ရာများဖြင့် ဧည့်ခံကျွေးမွေးသည်။

          ၎င်းနောက် ညနေပိုင်းတွင် တိုင်းစစ်ဌာနချုပ် စစ်ရေးပြကွင်း၌ အရာရှိ၊ စစ်သည်၊ မိသားစုဝင်များအား ဂုဏ်ပြုညစာစားပွဲဖြင့် ဧည့်ခံကျွေးမွေးပြီး တိုင်းစစ် ဌာနချုပ် ခေတ်ပေါ်တေးဂီတတီးဝိုင်းနှင့် အနုပညာရှင်များမှ တေးသီချင်းများဖြင့် သီဆို ဖျော်ဖြေ ခဲ့ကြကြောင်း သတင်းရရှိသည်။