ကျန်းမာရေးဝန်ကြီးဌာန အထူးကုဆေးကုသရေး အဖွဲ့ ကရင်ပြည်နယ် ဘားအံမြို့သို့ ကွင်းဆင်းဆေးကုသမှုများ ဆောင်ရွက်

 

ကျန်းမာရေးဝန်ကြီးဌာန အထူးကုဆေးကုသရေး အဖွဲ့ ကရင်ပြည်နယ် ဘားအံမြို့သို့ ကွင်းဆင်းဆေးကုသမှုများ ဆောင်ရွက်

 

နေပြည်တော်  ဇွန်  ၉

    ကျန်းမာရေးဝန်ကြီးဌာနသည် တစ်မျိုးသားလုံး သက်ရှည်ကျန်းမာ ကြံ့ခိုင်ရေး အတွက် ပြည်သူအားလုံး အကျုံးဝင်မည့် ကျန်းမာရေး စောင့်ရှောက်မှုကို  မြှင့်တင်ဆောင်ရွက်ရာတွင် ပြည်သူများ လိုအပ်သော ကျန်းမာရေးစောင့်ရှောက်မှုကို လက်လှမ်းမီရရှိစေခြင်းဖြင့် ရောဂါကင်းဝေး၍ သက်တမ်းစေ့နေထိုင်နိုင်စေရေး သက်ဆိုင်ရာ ပါမောက္ခ၊ အထူးကုဆရာဝန်ကြီးများနှင့် တွေ့ဆုံကာ လိုအပ်သော  ကုသမှုများ ရရှိနိုင်စေရန် ရန်ကုန်၊ မန္တလေးနှင့် နေပြည်တော်တို့မှ ပါမောက္ခ၊  အထူးကုဆရာဝန်ကြီးများ ပါဝင်သည့် အထူးကုဆေးကုသရေး အဖွဲ့များဖြင့်  တိုင်းဒေသကြီးနှင့်  ပြည်နယ်များသို့  ကွင်းဆင်းကုသမှု အစီအစဉ်များ ဆောင်ရွက်လျက်ရှိသည်။

ရန်ကုန်ပြည်သူ့ဆေးရုံကြီး၊   အထူးကုဆေးရုံကြီး(ခုတင်-၅၀၀)  ရန်ကုန်နှင့် ကလေးဆေးရုံကြီး ရန်ကုန်တို့မှ ပါမောက္ခ၊ အထူးကုဆရာဝန်ကြီးများ ပါဝင်သည့် အထူးကုဆေးကုသရေး အဖွဲ့သည် ကျန်းမာရေးဝန်ကြီးဌာန အစီအစဉ်ဖြင့် ဇွန်လ ၈ ရက်နှင့် ၉ ရက်တို့တွင်  ကရင်ပြည်နယ် ဘားအံမြို့သို့သွားရောက်၍   ပြည်သူ့ဆေးရုံကြီး(ဘားအံမြို့)မှ   အထူးကုဆရာဝန်ကြီးများ၊  ကျန်းမာရေး ဝန်ထမ်းများနှင့်အတူ   ဒေသခံပြည်သူများအား ဆေးကုသမှုများ ဆောင်ရွက်ပေးခဲ့သည်။

အဆိုပါ   အထူးကုဆေးကုသရေး အစီအစဉ်တွင်  ဘားအံမြို့သာမက  ကရင်ပြည်နယ် အတွင်းရှိ မြို့နယ် ခုနစ်မြို့နယ်နှင့် မွန်ပြည်နယ်ရှိ  မြို့နယ်နှစ်မြို့နယ်တို့မှ မြို့ပေါ်နှင့် ကျေးလက်နေပြည်သူများ လာရောက်ပြသခဲ့ပြီး နှလုံးရောဂါဆိုင်ရာ လူနာ ၁၁၁ ဦး၊ အစာအိမ်နှင့် အူလမ်းကြောင်းဆိုင်ရာ လူနာ  ၁၃၁ ဦး၊ ရင်ခေါင်းဆေးကုသမှုဆိုင်ရာ လူနာ ၄၆ ဦး၊ ကင်ဆာဆေးကုသမှုဆိုင်ရာ လူနာ ၁၂ ဦး၊ ကလေးအာရုံကြော ဆေးကုသမှုဆိုင်ရာ လူနာ ၃၅ ဦး၊  ဦးနှောက်နှင့် အာရုံကြောဆေးကုသမှုဆိုင်ရာ  လူနာ  ၁၇၇  ဦး၊ ဦးနှောက်နှင့်အာရုံကြော ခွဲစိတ်ကုသမှုဆိုင်ရာ လူနာ ၁၀ ဦး၊ အထွေထွေရောဂါဆေးပညာလူနာ ၅၆၁ ဦး၊ မျက်စိရောဂါလူနာ ၄၁၃ ဦးစုစုပေါင်း လူနာ ၁၄၉၆ ဦးတို့ကို ကြည့်ရှုကုသမှု ပေးခဲ့သည်။

အဆိုပါလူနာများအနက် နှလုံးပုံရိပ်ဖော်စက်ဖြင့် ကြည့်ရှုခြင်း (Echocardiography) ၇၈ဦး၊ အစာအိမ်မှန်ပြောင်း ကြည့်ရှုခြင်း (OGDS) သုံးဦး၊    အူမကြီးမှန်ပြောင်း ကြည့်ရှုခြင်း   (Colonoscope) သုံးဦး၊ ကွန်ပျူတာဓာတ်မှန်ဖြင့် စစ်ဆေးခြင်း (CT scan) ၂၂ ဦး၊ ဓာတ်မှန်ဖြင့်ရောဂါရှာဖွေခြင်း ၁၃၃ ဦး၊ ဓာတ်ခွဲစမ်းသပ်သူ (၂၈၉)ဦး၊ သွေးချိုဓာတ်(ံ HbA1C) တိုင်းတာခြင်း ၄၆ ဦး၊ Ultrasound  ရိုက်ကူးခြင်း  ၆၈ ဦး၊  နှလုံးစက်ဖြင့် စစ်ဆေးခြင်း(ECG) ၂၃၆   ဦး   စမ်းသပ်စစ်ဆေး ပေးနိုင်ခဲ့ပြီး ဦးနှောက်နှင့်  အာရုံကြောခွဲစိတ် ကုသမှုဆိုင်ရာ လူနာနှစ်ဦးတို့ကို ခွဲစိတ်ကုသမှုများ ဆောင်ရွက်ပေးနိုင်ခဲ့သည်။

ဇွန်လ ၈ ရက်က  ကရင်ပြည်နယ် အစိုးရအဖွဲ့ ပြည်နယ်ဝန်ကြီးချုပ် ဦးစောမြင့်ဦးနှင့် တာဝန်ရှိသူများသည် အထူးကုဆေးကုသရေး အစီအစဉ် ဆောင်ရွက်ရာနေရာသို့ လာရောက်၍ ပါမောက္ခ၊ အထူးကုဆရာဝန်ကြီးများအား တွေ့ဆုံနှုတ်ဆက်ပြီး အထူးကု ဆေးကုသရေး အစီအစဉ်အတွက် ချီးမြှင့်ငွေပေးအပ်ကာ လာရောက်ပြသကုသမှု ခံယူကြသော လူနာများအတွက် နေ့လယ်စာအာဟာရ လှူဒါန်းခြင်းတို့ကို ဆောင်ရွက်ခဲ့သည်။

ရန်ကုန်၊ မန္တလေး၊ နေပြည်တော်မှ အထူးကုသမှုဆိုင်ရာ (Super Speciality) ပါမောက္ခ၊ အထူးကု ဆရာဝန်ကြီးများ၏  အထူးကုကွင်းဆင်းကုသရေး ခရီးစဉ်များကို ၂၀၂၄ ခုနှစ် နှစ်ဆန်းမှ စတင်၍ ဆောင်ရွက်လျက် ရှိရာ တောင်ကြီးမြို့၊ ပြည်မြို့၊ သံတွဲမြို့၊ ပုသိမ်မြို့၊ မော်လမြိုင်မြို့၊ မကွေးမြို့၊ မြိတ်မြို့၊ ညောင်ဦးမြို့၊ မြစ်ကြီးနားမြို့၊ ဟင်္သာတမြို့၊ ထားဝယ်မြို့၊ ကျိုင်းတုံမြို့နှင့် ယခုဘားအံမြို့တို့သို့ သွားရောက်ပြီး  ကော့သောင်းမြို့တွင် ဆက်လက်ဆောင်ရွက် သွားမည်ဖြစ်ကြောင်း သိရှိရသည်။