ယူကရိန်းက အမေရိကန်အတွက် ရွှေတွင်းကြီးဖြစ်

 

ယူကရိန်းက အမေရိကန်အတွက် ရွှေတွင်းကြီးဖြစ်

 

    ယူကရိန်းနိုင်ငံသည်    အမေရိကန်အတွက် ရွှေတွင်းကြီးဖြစ်ကြောင်း၊ ယူကရိန်းပဋိပက္ခတွင်  ရုရှားတို့ အနိုင်ရရှိပါက ထိုရွှေတွင်းကြီးကို ဆုံးရှုံးလိုက်ရခြင်းဖြစ်မည်ဖြစ်ကြောင်း အမေရိကန်အထက်လွှတ်တော် အမတ် လင်ဆေးဂရေဟမ် ကပြောသည်။

ထို့ပြင် ရုရှားက ယူကရိန်းအရေးတွင် အနိုင်ရပါက ယူကရိန်း၏ ချမ်းသာကြွယ်ဝမှုများကို တရုတ်နှင့်ဝေမျှသွားမည်ဖြစ်ကြောင်း၊ ထိုသို့အဖြစ်ခံမည့်အစား ယူကရိန်းဆိုသည့် ရွှေတွင်းကြီးကို    အမေရိကန်တို့ကသာ လက်ဝယ်ပိုင်ဆိုင်ရသင့်ကြောင်း လင်ဆေး ဂရေဟမ်က ဆက်ပြောသည်။

ယူကရိန်းနိုင်ငံတွင် အမေရိကန်ဒေါ်လာ ၁၀ ထရီလီယံမှ ၁၂ ထရီလီယံအထိရှိသည့် တန်ဖိုးကြီး သတ္တုများရှိကြောင်း၊ ထိုသတ္တုများကြောင့် ယူကရိန်းသည် ဥရောပတွင် အချမ်းသာဆုံးနိုင်ငံဖြစ်နိုင်ကြောင်း၊ လက်ရှိတွင် ယူကရိန်းကိုကူညီခြင်းသည် နောင်တွင် အမေရိကန်နိုင်ငံအတွက် မမျှော်မှန်းနိုင်သည့် မိတ်ဖက်စီးပွားရေး နိုင်ငံဖြစ်လာနိုင်ကြောင်းနှင့်    ထိုအဖိုးတန်သတ္တုများကို အမေရိကန်နှင့် ရုရှားက အသုံးပြုနိုင်ကြောင်း ၎င်းက အင်တာဗျူးတစ်ခုတွင် ပြောသည်။

လင်ဆေးဂရေဟမ်သည်   ရုရှားနိုင်ငံအပေါ် ရန်လိုသူတစ်ဦးဖြစ်ပြီး အမေရိကန် အထက်လွှတ်တော်တွင်     ယူကရိန်းကို ထောက်ပံ့ရေးအတွက် တက်တက်ကြွကြွ ပါဝင်လုပ်ဆောင်နေသူ တစ်ဦးလည်းဖြစ်သည်။

ထို့ပြင်    ယူကရိန်းကိုထောက်ပံ့ရေး အတွက် ဒေါ်လာဘီလီယံ ၃၀၀ တန်ဖိုးရှိ ရုရှားနိုင်ငံပိုင် ပစ္စည်းများကို သိမ်းဆည်းရန်လည်း တောင်းဆိုထားသူဖြစ်သည်။

အလားတူ ရုရှားနိုင်ငံကို အကြမ်းဖက်မှု အားပေးထောက်ခံသည့်    နိုင်ငံအဖြစ် သတ်မှတ်ရေးအတွက်   အကြိမ်ကြိမ် တောင်းဆိုထားဖူးသူဖြစ်သည်။

လင်ဆေးဂရေဟမ်၏     အင်တာဗျူး မထွက်လာမီတစ်ရက်အလိုတွင် ဟန်ဂေရီ ဝန်ကြီးချုပ်က အနောက်အုပ်စုအနေဖြင့် ယူကရိန်းက ရုရှားကို အနိုင်ရရှိစေလိုသည့်အဓိက ရည်ရွယ်ချက်မှာ ယူကရိန်း၏ ချမ်းသာကြွယ်ဝမှုများကို ထိန်းချုပ်လိုသည့်အတွက် ဖြစ်သည်ဟုပြောထားသည်။

ရုရှားကမူ ယူကရိန်းနှင့် ပဋိပက္ခဖြစ်ပွားနေရသည့် အဓိကရည်ရွယ်ချက်မှာ ရုရှားဘာသာစကားပြောသည့်  ပြည်သူများကို ယူကရိန်းအစိုးရ၏ ဖိနှိပ်မှုမှ လွတ်မြောက်စေရန်နှင့် ရုရှား၏ အမျိုးသားအကျိုးစီးပွားကို ကာကွယ်ရန်တို့သာဖြစ်ကြောင်း   အခိုင် အမာပြောထားသည်။