ဟူသီသူပုန်တို့၏ ဒုံးကျည်များဖြင့် ပစ်ခတ်မှုကြောင့် ကုန်တင်သင်္ဘောနှစ်စင်း ထိခိုက်ပျက်စီး

 

ဟူသီသူပုန်တို့၏ ဒုံးကျည်များဖြင့် ပစ်ခတ်မှုကြောင့် ကုန်တင်သင်္ဘောနှစ်စင်း ထိခိုက်ပျက်စီး

 

    ဟူသီသူပုန်တို့၏    ဒုံးကျည်များဖြင့် ပစ်ခတ်မှုကြောင့် ဧဒင်ပင်လယ်ကွေ့အတွင်းရှိ ကုန်တင်သင်္ဘောနှစ်စင်း ထိခိုက်ပျက်စီးရသည်ဟု အမေရိကန်အလယ်ပိုင်း ကွပ်ကဲမှု ဌာနချုပ်က ဇွန်လ ၁၀ ရက်တွင် ထုတ်ပြန်သည်။

အီရန်နိုင်ငံ၏ထောက်ပံ့ခံ ဟူသီသူပုန်များသည်   ယီမင်နိုင်ငံအတွင်းရှိ ၎င်းတို့ ထိန်းချုပ်ရာဒေသမှနေ၍   သင်္ဘောဖျက် အမြင့်ပျံ ဒုံးကျည်သုံးစင်းနှင့်  သင်္ဘောဖျက် အနိမ့်ပျံဒုံးကျည်တစ်စင်း တို့ကို ဧဒင်ပင်လယ်ကွေ့သို့ ပစ်လွှတ်ကြောင်း၊ ထိုဒုံးကျည်များသည် ဆွစ်ဇာလန်နိုင်ငံပိုင် ကုန်တင်သင်္ဘောနှင့် ဂျာမနီပိုင်  ကုန်တင်သင်္ဘောတို့ကို ထိမှန်ကြောင်း  အဆိုပါစစ်ဌာနချုပ်၏ ထုတ်ပြန်ချက်တွင် ဖော်ပြထားသည်။

အဆိုပါ    ဒုံးကျည်များ ထိမှန်မှုကြောင့် ကုန်တင်သင်္ဘောများမှာ ထိခိုက်ပျက်စီးမှုများ ရှိသော်လည်း သင်္ဘောနှစ်စင်းစလုံးမှာ နစ်မြုပ်သွားခြင်း မရှိကြောင်း ထုတ်ပြန်ချက်တွင် ဆက်လက်ဖော်ပြထားသည်။

တစ်ချိန်တည်းမှာပင်   အမေရိကန်စစ်ဘက်က ယီမင်နိုင်ငံအတွင်းရှိ   ဟူသီထိန်းချုပ်ရာနေရာမှ ဒုံးပစ်လောင်ချာတစ်ခု၊ အနိမ့်ပျံဒုံးကျည်နှစ်စင်းနှင့်   မောင်းသူမဲ့ လေယာဉ်တစ်စင်းတို့ကိုလည်း   ဖျက်ဆီးလိုက်နိုင်ကြောင်း ထုတ်ပြန်ထားသည်။

ဟူသီသူပုန်များသည် ဂါဇာကမ်းမြောင်ဒေသအတွင်း အစ္စရေးတို့၏ တိုက်ခိုက်မှုများကို လက်တုံ့ပြန်သည့်အနေဖြင့် ဒေသတွင်း သွားလာနေသော ကုန်တင်သင်္ဘောများနှင့် စစ်သင်္ဘောများကို တိုက်ခိုက်မှုများ လုပ်ဆောင်နေခြင်းဖြစ်သည်။

ဟူသီသူပုန်တို့၏ တိုက်ခိုက်မှုများကြောင့် အမေရိကန်စစ်ဘက်က နိုင်ငံပေါင်းစုံ ပါဝင်သော ပူးပေါင်းတပ်ဖွဲ့ကို ဖွဲ့စည်းကာ ဒေသတွင်းသွားလာနေသည့် သင်္ဘောများကိုကာကွယ်ရေးနှင့်   မြေပြင်ရှိဟူသီတို့၏ ပစ်မှတ်များကို တိုက်ခိုက်ရေးတို့ လုပ်ဆောင် လျက်ရှိကြောင်း သိရသည်။