နေပြည်တော်၊ ဇွန် ၁၆
တိုင်းဒေသကြီး၊ ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိသူများ၊ နိုင်ငံ့ဝန်ထမ်းများနှင့် အေးချမ်းစွာ နေထိုင်နေကြသော ပြည်သူလူထုအချို့အား အုပ်ချုပ်မှုယန္တရား ပျက်ပြားစေရန်၊ လူထုအတွင်း အကြောက်တရားများလွှမ်းမိုးလာစေရန်နှင့် ငါနှင့်မတူ ငါ့ရန်သူဟူသည့် တစ်ဖက်သက် အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သူများက သေနတ်များ၊ တုတ်/ ဓားများ၊ လက်လုပ်ဗုံး၊ လက်ပစ်ဗုံးများအသုံးပြုကာ အကြောင်းမဲ့ ရက်စက်စွာ လုပ်ကြံသတ်ဖြတ်ခဲ့ကြောင်း သိရသည်။
ထိုသို့ဆောင်ရွက်ခဲ့ရာတွင် ဇွန်လ ၁၅ ရက်နေ့ နံနက် ၁၀ နာရီအချိန်တွင် စစ်ကိုင်း တိုင်းဒေသကြီး၊ ပုလဲမြို့နယ်၊ ကံကြီးကျေးရွာ၊ ပစ္ဆိမာရုံဘုန်းကြီးကျောင်းမှ ဆရာတော် ဥူးဉာဏိတ (၄၂)နှစ်(၂၂)ဝါနှင့် ၎င်းကျေးရွာနေ ကိုဇော်မျိုး(၂၆)နှစ်(ဘ)ဦးဌေးဦးတို့သည် ကြို့ပင်ကျေးရွာ၊ အင်ပင်လှ ဘုန်းကြီးကျောင်းမှ ဆိုင်ကယ်ဖြင့် ပြန်လာပြီး ကျောက်ရံတောပြင်ရှိ ကိုဦး ၏ နေအိမ်တဲ၌ ခေတ္တနားနေစဉ် တူမီးသေနတ်များကိုင်ဆောင်ထားသည့် ဆူပူအကြမ်းဖက် သောင်းကျန်းသူ အင်အား ၁၅ ဦးခန့်က ဆရာတော်နှင့် ကိုဇော်မျိုးတို့အား အော်ဟစ် ဆဲဆိုကာ တူမီးသေနတ်များဖြင့် ဝိုင်းဝန်း ပစ်ခတ်ခဲ့သဖြင့် ဆရာတော် ဥူးဉာဏိတနှင့် ကိုဇော်မျိုးတို့တွင် တူမီးသေနတ်ထိမှန်ဒဏ်ရာများရရှိကာ သေဆုံးခဲ့ကြောင်း သိရသည်။
အလားတူ ဇွန်လ ၁၆ ရက်နေ့ နံနက် ၇ နာရီ ၂၀ မိနစ်ခန့်တွင် ရန်ကုန်တိုင်းဒေသကြီး၊ ကျောက်တန်းမြို့နယ်၊ မလွန်းကျေးရွာ၊ စံချိန်မီရပ်ကွက်၌ ဒုမြို့နယ်ပညာရေးမှူး ဦးအေးထွန်း(၅၃)နှစ် (ဘ)ဦးထွန်းရွှေသည် ၎င်း၏နေအိမ်မှ မြို့နယ်ပညာရေးမှူးရုံးသို့ သွားရောက်စဉ် ရွှေညောင်ပင်လမ်း၊ အမှတ်(၁)အခြေခံပညာ အထက်တန်း ကျောင်းရှေ့အရောက်တွင် အကြမ်းဖက်သူ အမျိုးသား ၂ ဦးက ဆိုင်ကယ် ၁ စီးဖြင့် ရောက်ရှိ လာပြီး ဦးအေးထွန်းအား ၃၈ ဘို့သေနတ်ဖြင့် ၁ ချက်ပစ်ခတ်၍ မောင်းနှင်ထွက်ပြေးသွားခဲ့ရာ ဦးအေးထွန်းတွင် ကျောကုန်းဝဲဘက် ကျည်ဖောက်ဝင်၊ ယာရင်အုံ ကျည်ဖောက်ထွက်ဒဏ်ရာများဖြင့် အခင်းဖြစ်နေရာ၌ သေဆုံးသွားခဲ့ကြောင်း သိရသည်။
အထက်ပါဖြစ်စဉ်များတွင် အုပ်ချုပ်ရေးပိုင်းဆိုင်ရာ တာဝန်ရှိသူများ၊ နိုင်ငံ့ဝန်ထမ်းများနှင့် အေးချမ်းစွာနေထိုင်နေကြသော ပြည်သူများအား အကြောင်းမဲ့ ရက်စက်စွာ လုပ်ကြံသတ်ဖြတ်မှု ကျူးလွန်ခဲ့သည့် အကြမ်းဖက်သူများကို အမြန်ဆုံးဖမ်းဆီးရမိရေး စုံစမ်းဖော်ထုတ်လျက်ရှိကြောင်း သတင်းရရှိသည်။