ပြိုင်ဘက်နိုင်ငံများနှင့် ပခုံးချင်းယှဉ်နိုင်စွမ်းရှိလာသည့် တရုတ်ရေငုပ်သင်္ဘောနည်းပညာ

ပြိုင်ဘက်နိုင်ငံများနှင့် ပခုံးချင်းယှဉ်နိုင်စွမ်းရှိလာသည့် တရုတ်ရေငုပ်သင်္ဘောနည်းပညာ

တရုတ်ပြည်သူ့  လွတ်မြောက်ရေးတပ်မတော် (PLA) ရေတပ်၏ရေငုပ်သင်္ဘောတပ်ဖွဲ့သည် ယခုအခါတော်ပီဒိုနှင့် ဒုံးကျည်ပစ်ခတ်မှု စွမ်းဆောင်ရည်တွင် သမိုင်းတွင်လောက်သည့်   အောင်မြင်မှုများရရှိခဲ့ပြီး ရေတပ်အနေဖြင့် သမားရိုးကျစစ်သင်္ဘောများကို ဆက်လက်ထိန်းသိမ်းထားစဉ်အတွင်း နျူကလီးယား စွမ်းအင်သုံးစစ်သင်္ဘောများ တည်ဆောက်ရေးကို အလေးပေးလုပ်ဆောင် လျက်ရှိသည်ဟု ရေတပ်မှအရာရှိတစ်ဦးက ယခုရက်သတ္တပတ် အစောပိုင်းတွင် ပြောကြားခဲ့ကြောင်း တွေ့ရသည်။

ယခုအခါ တရုတ်ရေတပ်ရှိ  ရေငုပ်သင်္ဘောတပ်ဖွဲ့တွင်  သမားရိုးကျရေငုပ်သင်္ဘောများကိုသာမက  နျူကလီးယားစွမ်းအင်သုံး   ရေငုပ်သင်္ဘောများကိုပါ ဖြန့်ကြက်နိုင်ပြီဖြစ်ပြီး ရေတပ်ဖွဲ့အနေဖြင့် နျူကလီးယားစွမ်းအင်သုံး ရေငုပ်သင်္ဘောများ ထုတ်လုပ်နိုင်ရေးအတွက် ဆက်လက်ကြိုးပမ်းလျက်ရှိပြီး လက်ရှိတွင် အဆိုပါ ရေငုပ်သင်္ဘောများသည် နိုင်ငံ့ပင်လယ်ရေပိုင်နက်များကို ပုံမှန်ကင်းလှည့်နိုင်ပြီဖြစ်ကြောင်း   ရေတပ်ဖွဲ့မှ တာဝန်ရှိသူတစ်ဦးဖြစ်သူ ဝမ်ရှုရှင်က နိုင်ငံပိုင် CCTV ရုပ်သံဌာနနှင့် လုပ်ဆောင်ခဲ့သည့် တွေ့ဆုံမေးမြန်းခန်းတွင် ပြောကြားခြင်းဖြစ်သည်။

ဝမ်ရှုရှင်၏ ရေငုပ်သင်္ဘောတပ်ဖွဲ့သည် တရုတ်ရေတပ်၏ ပထမဆုံးသော ရေငုပ်သင်္ဘောတပ်ဖွဲ့ဖြစ်ပြီး ရေငုပ်သင်္ဘောများအား စမ်းသပ်ရေး၊  လေ့ကျင့်သင်ကြားရေးတို့ကို လုပ်ဆောင်ရန် တာဝန်ရှိသည်။ ရေငုပ်သင်္ဘောများ၏တော်ပီဒိုနှင့်ဒုံးကျည်ပစ်ခတ်မှု စွမ်းဆောင်ရည် တိုးတက်လာခြင်းသည် မိမိတို့တပ်ဖွဲ့၏    စွမ်းဆောင်ရည် ပိုမိုကောင်းမွန်လာခြင်းကို ပြသခြင်းဖြစ်သောကြောင့် တရုတ်ရေတပ်အနေဖြင့် အမိနိုင်ငံနှင့် ပိုမိုအလှမ်းကွာဝေးသည့် ဒေသများသို့ သွားရောက်နိုင်ပြီး မိမိတပ်ဖွဲ့အပေါ် ယုံကြည်မှုတွင်လည်း ပိုမိုခိုင်ခံ့လာကြောင်း ဝမ်ရှုရှင်က ဆက်လက်ပြောကြားသည်။

ယခုကဲ့သို့ ရေတပ်ဖွဲ့ရှိ ရေငုပ်သင်္ဘောတပ်ဖွဲ့၏ အောင်မြင်မှုများသည် ပြည်ပမှကျူးကျော်ရန်စမှုနှင့် ရင်ဆိုင်နေရချိန်တွင် သော်လည်းကောင်း၊ ငြိမ်းချမ်းသည့် ကာလအတွင်း၌ သော်လည်းကောင်း တရုတ်နိုင်ငံသားများအား နိုင်ငံ၏စီးပွားရေးတိုးတက်မှုအတွက် လုပ်ဆောင်နိုင်ရန် အထောက်အကူပြုနိုင်မည် ဖြစ်သည်။

ရေငုပ်သင်္ဘောဆိုင်ရာစွမ်းဆောင်ရည်နှင့် စပ်လျဉ်း၍ ကမ္ဘာပေါ်ရှိ နိုင်ငံအများအပြားက လုံခြုံရေးအရ အထိအခိုက်မခံသည့် လျှို့ဝှက်ကိစ္စရပ်အဖြစ် သဘောထားလေ့ရှိသည်။ ထို့ပြင် တရုတ်နိုင်ငံ၏ ရေငုပ်သင်္ဘော တည်ဆောက်ရေးဆိုင်ရာ နည်းပညာဖွံ့ဖြိုးတိုးတက်မှုသည် အခြားကမ္ဘာ့နိုင်ငံကြီးများနှင့် ယှဉ်ပါက ယခင်အချိန်က နောက်ကျကျန်ရစ် နေခဲ့သော်လည်း ယခုရရှိခဲ့သည့် အောင်မြင်မှုများက အဆိုပါ ကမ္ဘာ့အင်အားကြီး နိုင်ငံများအား တရုတ်က အမှီလိုက်နေသည်ဟူသော  အချက်ကိုပြသလျက်ရှိသည်။

တရုတ်ရေတပ်မတော်သည်လက်ရှိတွင် Type  039 အတန်းအစားသမားရိုးကျ ရေငုပ်သင်္ဘောများကို  အသုံးပြုလျက် ရှိသည်။ တစ်ချိန်တည်းမှာပင် တရုတ်နိုင်ငံ သည် Type 09III အတန်းအစား နျူကလီးယား စွမ်းအင်သုံးတိုက်ခိုက်ရေး   ရေငုပ်သင်္ဘောနှင့် Type 09IV  အတန်းအစား နျူကလီးယားစွမ်းအင်သုံး ပဲ့ထိန်းဒုံးကျည်တပ် ရေငုပ်သင်္ဘောများနှင့်အတူ အခြားအဆင့်မြင့်နည်းပညာသုံး   စစ်ရေယာဉ်များကို တည်ဆောက်ရန်    ကြိုးပမ်းလျက်ရှိသည်။

ထို့အတူ     တရုတ်ရေတပ်သည် အမေရိကန်၏ အင်ဒို-ပစိဖိတ်မဟာဗျူဟာဖော်ဆောင်မှုကို  တုံ့ပြန်နိုင်ရေး အတွက် အာရုံစိုက်လုပ်ဆောင်လျက်ရှိသည်။ ထိုသို့ လုပ်ဆောင်ရာတွင်လည်း  ရေတပ်အား ပစိဖိတ်သမုဒ္ဒရာမှ  အိန္ဒိယသမုဒ္ဒရာအထိ တပ်ဖြန့်နိုင်ပြီး   အင်ဒို-ပစိဖိတ်ဒေသတွင် အကြီးမားဆုံးရေတပ်  Blue Water Navy  ဖြစ်ရေး အတွက်လည်း ဦးတည်လုပ်ဆောင်လျက်ရှိကြောင်း တွေ့ရသည်။

ရေတပ်အဆင့်မြှင့်တင်ရေးအတွက် ဖရီးဂိတ်စစ်သင်္ဘောများအဆင့်မြှင့်တင်ခြင်းကို အလေးပေး လုပ်ဆောင်ခဲ့ရာ Jiangkai-I Type-054 အတန်းအစား ဖရီးဂိတ်သင်္ဘောအား ၂၀၀၅ ခုနှစ်တွင် တပ်တော်ဝင်ခဲ့ပြီး Jiangkai-II Type-054A အတန်းအစား ဖရီးဂိတ်သင်္ဘောကို ၂၀၀၆ ခုနှစ်တွင် တပ်တော်ဝင်နိုင်ခဲ့သည်။  Jiangkai-II Type-054A အတန်းအစား  ဖရီးဂိတ်သင်္ဘောကို ၂၀၀၈ ခုနှစ်တွင် စတင်အသုံးပြုခဲ့ရာ ၂၀၁၈ ခုနှစ်အထိ အဆိုပါ ဖရီးဂိတ်အစီး ၃၀  တပ်တော်ဝင်ထားပြီးဖြစ်သည်။

ယခုအခါ  တရုတ်နိုင်ငံသည် ပိုမိုခေတ်မီသော Type-054B အတန်းအစား ဖရီးဂိတ်သင်္ဘောများ    တည်ဆောက်လျက်ရှိသည်။

တရုတ်ရေတပ်က လက်ရှိ အသုံးပြုနေသည့် Type-039 အတန်းအစား  ရေငုပ် သင်္ဘောသည် ပြည်တွင်း၌   ပထမဆုံးအကြိမ် အပြီးသတ် ထုတ်လုပ်ခဲ့ခြင်း ဖြစ်သည်။ ထူးခြားသည့်အချက်မှာ ယင်းရေငုပ်သင်္ဘောသည် ရေဒါဖမ်းယူနိုင်ခြင်း မရှိသည့် တစ်မူထူးခြားသော  အဆင့်မြင့်နည်းပညာများ အသုံးပြု၍ တည်ဆောက်ထားခြင်း ဖြစ်သည်။ ထို့ပြင် ရေငုပ်သင်္ဘောတွင် မောင်းနှင်ခြင်းဆိုင်ရာ  အဆင့်မြှင့်တင်မှုအချို့ကိုလည်း ထည့်သွင်း တည်ဆောက်ထားခြင်းကြောင့် ၎င်းရေငုပ်သင်္ဘောသည် ရေပြင်ပေါ်တွင် မောင်းနှင်နေစဉ်အတွင်း ရန်သူ၏ ရေဒါစနစ်များမှ ထောက်လှမ်းခံရခြင်းကို   လျှော့ချနိုင်ပြီး လျှို့ဝှက်စွာ မောင်းနှင်နိုင်မည့် အပြင် ရေအောက်တွင် ငုပ်လျှိုးမောင်းနှင်ရာတွင်လည်း သွားလာမှုဆိုင်ရာ အားသာချက်များကို ရရှိစေမည်ဖြစ်သည်။ တရုတ်ရေတပ်သည် ယင်းရေငုပ်သင်္ဘောများကို သက်တမ်းရင့် ရေငုပ်သင်္ဘောများ၏ နေရာတွင် အသစ်အစားထိုး အသုံးပြုမည်ဖြစ်ရာ တရုတ်ရေငုပ်သင်္ဘောနည်းပညာ တိုးတက်မှုသည် ယခုအခါ ပြိုင်ဘက်နိုင်ငံများ၏ ရေငုပ်သင်္ဘောများနှင့် ပခုံးချင်းယှဉ်နိုင်သည့် အခြေအနေသို့ ရောက်ရှိလာပြီ ဖြစ်ကြောင်း ရေးသား တင်ပြလိုက်ပါသည်။   

                     Ref: Sputnik