ဦးနှောက်မှတ်ဉာဏ် ထက်မြက်စေသော နည်းလမ်းများအကြောင်း သိကောင်းစရာ

 

ဦးနှောက်မှတ်ဉာဏ် ထက်မြက်စေသော နည်းလမ်းများအကြောင်း သိကောင်းစရာ

 

     တစ်နေ့တာကို ဦးနှောက်လေ့ကျင့်ခန်းများဖြင့် စတင်ခြင်းက အာရုံစူးစိုက်မှုကို တိုးတက်စေကာ မှတ်ဉာဏ်ကို ထက်မြက်စေနိုင်ကြောင်းတွေ့ရှိရသည်။ ကာယလေ့ကျင့်ခန်းများက ခန္ဓာကိုယ်ကို အားကောင်းစေသကဲ့သို့    ဦးနှောက်လေ့ကျင့်ခန်းများသည်    စိတ်ကိုလှုံ့ဆော်ပေးပြီး စိတ်ပိုင်းဆိုင်ရာတက်ကြွမှုကို     မြှင့်တင်ပေးပါသည်။    အထူးသဖြင့် ဦးနှောက်လေ့ကျင့်ခန်းများကို   နံနက်ခင်းပုံမှန်လေ့ကျင့်ခန်း အစီအစဉ်တွင် ပေါင်းစပ်လုပ်ဆောင်ခြင်းဖြင့် ထိရောက်သော အကျိုးကျေးဇူးရရှိနိုင်ပါသည်။

တရားထိုင်ခြင်း

      ဤအလေ့အကျင့်သည် သတိပဋ္ဌာန်ကိုတိုးမြင့်စေသဖြင့် စိတ်ဖိစီးမှုကို လျော့ကျစေပြီးအာရုံစူးစိုက်မှုကို ထက်မြက်စေသည်။ တရားထိုင်ခြင်းသည်   အာရုံထွေပြားမှုများကို လျှော့ချပေးသဖြင့်   စိတ်ဆန္ဒရှိသလောက် အလုပ်လုပ်နိုင်သည့်အကျိုးရှိသော နေ့တစ်နေ့ဖြစ်စေသည်။

ဆိတ်ငြိမ်သောနေရာတွင် သက်သောင့်သက်သာထိုင်၍ မျက်လုံးမှိတ်ပြီး အသက်ရှူသွင်း၊  ရှူထုတ်ခြင်းအပေါ်တွင်  အာရုံစိုက်ပါ။  အသက်ကို ပြင်းပြင်းရှူသွင်းပြီး ၁၊ ၂၊ ၃ ၊၄ စသည်ဖြင့် ရေတွက်ပါ။ ဂဏန်း ၁ မှ ၄ အထိ ရေတွက်ပြီး  အသက်ရှူခဏအောင့်ထားပါ။  ထို့နောက်  ၁ မှ ၆ အထိရေတွက်၍  ဖြည်းဖြည်းချင်း ပြန်ရှူထုတ်လိုက်ပါ။

အတွေးအခေါ်စိတ်ခံစားမှုများနှင့် ရည်မှန်းချက်များကို ချရေးခြင်းအတွေးအခေါ်နှင့် စိတ်ခံစားမှုများကို ချရေးခြင်းသည် တီထွင်ဖန်တီးနိုင်စွမ်းကို မြှင့်တင်ပေးသည်။ စိတ်ပိုင်းဆိုင်ရာထိန်းညှိမှုကို ပိုမိုကောင်းမွန်စေကာ    မှတ်ဉာဏ်အားကောင်းစေသည်။  ရည်မှန်းချက်များကို ချရေးခြင်းသည်  အတွေးများကို စုစည်းစေပြီး ပြဿနာဖြေရှင်းရန် အတွက်ဦးနှောက်ကို ပြင်ဆင်စေသည်။ စိတ်ပိုင်းဆိုင်ရာ ခံနိုင်ရည်ရှိရန်နှင့်စိတ်ပိုင်းဆိုင်ရာ သုခချမ်းသာကိုပြုစုပျိုးထောင်ရန် ကျေးဇူးတင်ကြောင်းနှင့် အပြုသဘောဆောင်သော တွေးခေါ်မှုကို  လေ့ကျင့်ပါ။ အတွေးများ၊ အစီအစဉ်များနှင့်  ကျေးဇူးတင်သော အကြောင်းအရာများကို ချရေးရန် နေ့စဉ် ၁၀ မိနစ်အချိန်ယူပါ။

ပဟေဠိဉာဏ်စမ်းဖြေဆိုခြင်း

       ပဟေဠိဉာဏ်စမ်းသည် ယုတ္တိတွေးခေါ်မှုကို လှုံ့ဆော်ပေးပြီး အာရုံစူးစိုက်မှုကို တိုးတက်စေသဖြင့် ပြဿနာဖြေရှင်းခြင်းစွမ်းရည်ကို မြှင့်တင်ပေးသည်။ ယင်းတို့သည် ဦးနှောက်၏ မတူညီသော အစိတ်အပိုင်းများကို ချိတ်ဆက်ပေးကာ   မှတ်ဉာဏ်ကို   ထက်မြက်စေပြီး   စိတ်ပိုင်းဆိုင်ရာ ပျော့ပျောင်းမှုကို  တိုးတက်စေသည်။   စကားဝှက်ပဟေဠိ သို့မဟုတ် ကိန်းဂဏန်းပဟေဠိကို ဖြေရှင်းရန်  နေ့စဉ် အချိန် ၁၀-၁၅ မိနစ်ပေးပါ။ အက်ပ်၊  သတင်းစာ  သို့မဟုတ်  ပဟေဠိစာအုပ်ကိုသုံး၍    လေ့ကျင့်နိုင်သည်။

အလုပ်နှစ်ခုကိုတစ်ပြိုင်နက်လုပ်ဆောင်ခြင်း

      အလုပ်နှစ်ခု သို့မဟုတ်  ထိုထက်ပိုသော လုပ်ဆောင်ချက်များကို တစ်ချိန်တည်းတွင် လုပ်ဆောင်ခြင်းသည် မတူညီသော ဦးနှောက်အစိတ်အပိုင်းများကြား ပေါင်းစပ်ညှိနှိုင်းမှုကို  ပိုမိုကောင်းမွန်စေပြီး သိမြင်မှု၊အလုပ်များစွာ လုပ်ဆောင်နိုင်မှုနှင့်ပြောင်းလွယ်ပြင်လွယ်ရှိမှုကို တိုးတက်စေသည်။ အများစုသည် ယင်းကို သတိမထားမိဘဲ တစ်နေ့တာအတွင်း အလုပ်နှစ်ခုကို    လုပ်ဆောင်နေကြသည်။  ဥပမာ- ဖုန်းပြောနေစဉ် လမ်းလျှောက်ခြင်း၊ ညစာချက်ပြုတ်နေစဉ် သို့မဟုတ်  ဦးတည်ရာသို့ကားမောင်းနေစဉ် သတင်းနားထောင်ခြင်းတို့ ပါဝင်သည်။

ကျွမ်းကျင်မှုအသစ်အဆန်းတစ်ခုခုကို သင်ယူခြင်း

      ကျွမ်းကျင်မှုအသစ်များကို သင်ယူခြင်းသည် ဦးနှောက်နှင့်အာရုံကြော ချိတ်ဆက်မှုအသစ်များကို   လိုက်လျောညီထွေဖြစ်စေပြီး ရေရှည်မှတ်ဉာဏ်ကို တိုးတက်စေသည်။ ဘာသာစကား အသစ်သင်ခြင်း၊ စာရေးခြင်း၊ ပန်းချီဆွဲခြင်း၊ ဂီတတူရိယာတီးခြင်းနှင့်  ဗီဒီယိုသင်ခန်းစာတို များကဲ့သို့သော ကျွမ်းကျင်မှုအသစ်အဆန်း တစ်ခုကို နံနက်တိုင်း ၁၅ မိနစ် အချိန်ပေး၍ သင်ယူပါ။ နည်းနည်းနှင့်မှန်မှန် တိုးတက်မှုကို အာရုံစိုက်ပါ။

တီထွင်ဖန်တီးမှုကိုချဲ့ထွင်ခြင်း

     အချိန်တစ်မိနစ်လောက်ပေး၍  ကျပန်းတစ်ခုခုရေးပါ သို့မဟုတ် စိတ်ထဲပေါ်လာသမျှကို အမြန်ပုံကြမ်းဆွဲပါ သို့မဟုတ် ဝါကျတစ်ကြောင်းဖြင့်   ဇာတ်လမ်းတိုတစ်ပုဒ်ရေးပါ။       ဤဖန်တီးမှုလုပ်ငန်းများသည် ဦးနှောက်၏ညာဘက်ခြမ်းကို    နိုးကြားလာစေပြီး   တစ်ချိန်တည်းတွင် သမားရိုးကျမဟုတ်သည့် အတွေးများဖြင့်  စိတ်အပန်းဖြေရန် ကူညီပေးသည်။

ဦးနှောက်ဉာဏ်ထက်မြက်စေသော ဂိမ်းများကစားခြင်း

    ဤကဲ့သို့သောဂိမ်းများသည်   ဆင်ခြင်ဉာဏ်၊   အာရုံစူးစိုက်မှုနှင့် အခက်အခဲဖြေရှင်းနိုင်မှုတို့ကို အားကောင်းစေပြီး ဦးနှောက်ကို တက်ကြွ ထက်မြက်နေစေရန် လှုံ့ဆော်ပေးသည်။ နံနက်ခင်းတွင် အမြန်အွန်လိုင်းမှတ်ဉာဏ်ဂိမ်း၊  ကိန်းဂဏန်းများ၊ စကားဝှက်များနှင့် အမြန်ပဟေဠိ သို့မဟုတ် စစ်တုရင်ကစားပါ။  ဂိမ်းကစားခြင်းကို နေ့စဉ် အချိန် ၁၀-၁၅ မိနစ်ပေးပါ။

စိတ်ကူးဖြင့်ပုံဖော်မှု အလေ့အကျင့်ပြုလုပ်ခြင်း

     စိတ်ကူးဖြင့်ပုံဖော်မှု အလေ့အကျင့်သည် အတွေးများကို စုစည်းပေးသည်။ တီထွင်ဖန်တီးနိုင်စွမ်းကို လှုံ့ဆော်ပေးသည်။ အယူအဆများနှင့် ဆက်စပ်သဘောတရားများ၏ ချိတ်ဆက်နိုင်စွမ်းကို အားကောင်းစေသည်။ ဥပမာအားဖြင့် အကြောင်းအရာ သို့မဟုတ် ပြဿနာတစ်ခုကို ရွေးပြီး စာမျက်နှာအလွတ်တစ်ခု၏ အလယ်တွင်ရေးပါ။ စိတ်ကူးများ၊ ဆက်စပ်သဘောတရားများ သို့မဟုတ် ဖြေရှင်းချက်များဆီသို့ ဦးတည်သော အကိုင်းအခက်များကိုဆွဲပါ။ စိတ်ကူးဖြင့်ပုံဖော်ခြင်းသည် ဦးနှောက်၏ ဆုလာဘ်စင်တာများကို အသက်ဝင်စေပြီး အာရုံစူးစိုက်မှု၊ ယုံကြည်မှုနှင့် စိတ်ပိုင်းဆိုင်ရာ ထိန်းညှိမှုတို့ကို ပိုမိုကောင်းမွန်စေပါသည်။ မျက်လုံးကိုမှိတ်ထားပြီး ရှေ့လုပ်ငန်းစဉ်များကို အသေးစိတ်မြင်ယောင်ကြည့်ပါ။ အလုပ်များကိုပြီးမြောက်အောင် စိတ်ငြိမ်ငြိမ်ထားပြီး ရည်မှန်းချက်များကို    အောင်မြင်အောင်ပုံဖော်ပါ။   ဤအလေ့အကျင့်အတွက်    ၅-၁၀ မိနစ်အချိန်ပေးပါ။

မှတ််သားထားသည်များကို ပြန်လည်စဉ်းစားသည့် အလေ့အကျင့်ပြုလုပ်ခြင်း

     ဤအလေ့အကျင့်သည်   အသေးစိတ် အချက်အလက်များကို အာရုံစူးစိုက်မှု အားကောင်းစေသည်။ ဦးနှောက်တွင် အချက်အလက်များကို စုစည်းထိန်းသိမ်းနိုင်ရန် ကူညီပေးသဖြင့် မှတ်ဉာဏ်အားကောင်းစေသည်။ ယခင်နေ့က အဖြစ်အပျက်များကို အချိန်နှင့်တစ်ပြေးညီ ပြန်လည်အမှတ်ရရန် ၅ မိနစ်ခန့်အချိန်ပေးစဉ်းစားပါ။ စကားပြောဆိုမှုများ၊ အစားအစာများ သို့မဟုတ် သီးခြား လုပ်ဆောင်မှုများကဲ့သို့သော အသေးစိတ်အချက်အလက်များကို ပြန်လည်မှတ်မိရန် စဉ်းစားခြင်းဖြင့်လေ့ကျင့်ပါ။

ကိုယ်လက်လှုပ်ရှားမှုပြုလုပ်စဉ် သိမြင်မှုစွမ်းရည် ထက်မြက်စေရန် လေ့ကျင့်ခြင်း

      ကိုယ်လက်လှုပ်ရှားမှုသည်  ဦးနှောက်သို့ သွေးစီးဆင်းမှုကို တိုးမြင့်စေပြီး မှတ်ဉာဏ်နှင့်အာရုံ စူးစိုက်မှုကို  မြှင့်တင်ပေးသည်။ ကိုယ်လက်လှုပ်ရှားမှုပြုလုပ်နေစဉ်  စိတ်ပိုင်းဆိုင်ရာ စိန်ခေါ်မှုတစ်ခုကို ဖြေရှင်းခြင်းက  သိမြင်နိုင်စွမ်းကို ပိုမိုကောင်းမွန်စေပြီး အလုပ်များစွာလုပ်ဆောင်နိုင်သော စွမ်းရည်များကို  ထက်မြက်စေကြောင်း တွေ့ရှိလာကြသည်။ လမ်းလျှောက်စဉ် သို့မဟုတ် ရွရွပြေးနေစဉ် စိတ်ဖြင့်ပြဿနာများကိုဖြေရှင်းခြင်း သို့မဟုတ် ၁၀၀ မှ ၇ သို့  နောက်ပြန်ရေတွက်ခြင်းကဲ့သို့ လေ့ကျင့်ခန်းများပြုလုပ်ပါ။ တစ်နည်းအားဖြင့်  ဟန်ချက်ညီမှုနှင့်  အာရုံစူးစိုက်မှုလိုအပ်သော ယောဂကျင့်စဉ်များကို စမ်းသပ်ပြုလုပ်ကြည့်ပါ။

ဦးနှောက်ကျန်းမာရေးကိုမြှင့်တင်ပေးသောအစားအစာများ စားသောက်ခြင်း

     စိတ်ကျန်းမာရေးအတွက် သင့်လျော်သော အာဟာရလိုအပ်ပြီး တချို့သောအစားအစာများသည် ဦးနှောက်ကျန်းမာရေးကို မြှင့်တင်ပေးသည်ကို သုတေသနများအရ သိလာကြသည်။  သစ်ကြားသီး၊ ဗာဒံစေ့နှင့် နှမ်းကြတ်စေ့ကဲ့သို့သော  အစေ့အဆန်များသည်  မှတ်ဉာဏ်ဆိုင်ရာ လုပ်ဆောင်ချက်များကို တိုးတက်ကောင်းမွန်စေသည့်  Omega-3 Fatty acid နှင့် ဓာတ်တိုးဆန့်ကျင်ပစ္စည်းများ ကြွယ်ဝသည်။ ဘလူးဘယ်ရီနှင့် စတော်ဘယ်ရီကဲ့သို့သော ဘယ်ရီသီးများတွင် ဦးနှောက်ချိတ်ဆက်မှုကို  အားကောင်းစေပြီး  မှတ်ဉာဏ်လျော့ကျမှုကို    နှေးကွေးစေသော ဖလေဗိုနွိုက်များ   ပါဝင်သည်။   ဟင်းနုနယ်နှင့်  ကိုက်လန်အပါအဝင် အရွက်စိမ်းများသည် ဗီတာမင် K နှင့်  ဖောလိတ်တို့ကို ပေးစွမ်းနိုင်ပြီး ဦးနှောက်ဆဲလ်များကြီးထွားမှုကို   မြှင့်တင်ပေးသည်။ ဆယ်လ်မွန်ငါး၊ ဆာဒင်းငါးနှင့် တူနာငါးတို့ကဲ့သို့  Omega-3  ပါဝင်သော ငါးများသည် ဦးနှောက်တည်ဆောက်မှုနှင့်   စွမ်းဆောင်ရည်အတွက်   လိုအပ်သည်။

အနက်ရောင်ချောကလက်တွင် ဖလေဗိုနွိုက်နှင့် ကဖိန်းဓာတ်ပါဝင်သောကြောင့် အာရုံစူးစိုက်မှုနှင့် စိတ်ခံစားချက်ကို မြှင့်တင်ပေးသည်။

ဦးနှောက်ကျန်းမာရေးကိုထိခိုက်စေသော အလေ့အကျင့်များကိုရှောင်ခြင်း

      နာတာရှည်စိတ်ဖိစီးမှု၊     ကျန်းမာရေးနှင့် မညီညွတ်သော အစားအသောက်များကို စားမိခြင်း၊  ကိုယ်လက်လှုပ်ရှားမှုမရှိခြင်း၊  အိပ်ချိန် မလုံလောက်ခြင်းတို့ကြောင့် ဦးနှောက်ကျန်းမာရေးကို ထိခိုက်ပျက်စီး စေနိုင်သည်။  အရက်အလွန်အကျွံသောက်ခြင်း၊ ဆေးလိပ်သောက်ခြင်းနှင့် မူးယစ်ဆေးဝါး သုံးစွဲခြင်းသည်  မှတ်ဉာဏ်ဆိုင်ရာ လုပ်ဆောင်မှုကို ထိခိုက်စေနိုင်ပြီး အာရုံကြောရောဂါများ ဖြစ်နိုင်ခြေကိုတိုးမြင့်စေသည်။

လေထုညစ်ညမ်းမှုနှင့် အဆိပ်အတောက်များကို   ကြာရှည်စွာထိတွေ့ခြင်းက   ဦးနှောက်ဆဲလ်များကို ထိခိုက်စေနိုင်သည်။   အထီးကျန်ခြင်း၊ စိတ်ဓာတ်ကျခြင်းနှင့် စိုးရိမ်စိတ်လွန်ကဲခြင်းတို့သည်  စိတ်ကျန်းမာရေးနှင့်  ဦးနှောက်ဖွဲ့စည်းပုံကို ထိခိုက်စေသည်။  ဆိုရှယ်မီဒီယာကို အလွန်အကျွံသုံးစွဲခြင်းသည်  လူတစ်ဦး၏စိတ် သို့မဟုတ် ဉာဏ်ရည်ဉာဏ်သွေးကို  ယိုယွင်းလာစေနိုင်သည်။  မတော်တဆထိခိုက်မှုများကြောင့်  အာရုံကြောဆိုင်ရာထိခိုက်မှုသည်  ဦးနှောက်မှတ်ဉာဏ်ရေရှည် ပျက်စီးမှုကိုဖြစ်စေနိုင်သည်။  သွေးတိုးရောဂါ၊ သွေးချိုဆီးချိုရောဂါနှင့် ကိုလက်စထရော များခြင်းတို့ကဲ့သို့  မထိန်းချုပ်နိုင်သော ကျန်းမာရေး အခြေအနေများသည် ဦးနှောက်သို့ သွေးစီးဆင်းမှုကို လျော့ကျစေပြီး မှတ်ဉာဏ်ကျဆင်းစေသည်။

အချုပ်အားဖြင့်ဆိုရသော်  မှတ်ဉာဏ်သည်  လေ့ကျင့်ယူနိုင်သောကျွမ်းကျင်မှုတစ်ခုဖြစ်ပြီး      ဦးနှောက်ကျန်းမာရေး ကောင်းစေသောအလေ့အကျင့်များကို လိုက်နာခြင်းဖြင့် တိုးတက်စေနိုင်သည်။ ထို့ကြောင့်  ကျန်းမာရေးနှင့်ညီညွတ်သော နေထိုင်မှုပုံစံကို လိုက်နာခြင်း၊ သွေးတိုးရောဂါနှင့်   သွေးချိုဆီးချိုရောဂါများကို  စနစ်တကျကုသမှု ခံယူခြင်း၊   ဦးနှောက်ကျန်းမာရေးကို ထိခိုက်စေသော အလေ့အကျင့်များကို    ရှောင်ကြဉ်ခြင်း၊  ဦးနှောက်နှင့် စိတ်ကျန်းမာရေးကို မြှင့်တင်ပေးနိုင်သော အစာအာဟာရများကို ဦးစားပေးစားသောက်ခြင်းနှင့် မိမိနှင့်သင့်လျော်သော ဦးနှောက်လေ့ကျင့်ခန်းများ ပြုလုပ်ခြင်းတို့  လိုအပ်ကြောင်း ရေးသားလိုက်ရပါသည်။