အမြင်လေးမြင်ဖြင့် နိုင်ငံ့ကောင်းကျိုးသယ်ပိုး
အယ်ဒီတာ့အာဘော်
(၂၀၂၄ ခုနှစ်၊ မတ် ၁ ရက်)
နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင် သည် နိုင်ငံတော် ကာကွယ်ရေး တက္ကသိုလ်မှ နည်းပြအရာရှိကြီးများနှင့် သင်တန်းသား အရာရှိကြီးများအား ဖေဖော်ဝါရီလ ၂၇ ရက်နေ့က Video Conferencing ဖြင့် အမှာစကား ပြောကြားစဉ် “လုပ်ငန်းများဆောင် ရွက်ရာတွင် နိုင်ငံရေး၊ စီးပွားရေး၊ အုပ်ချုပ်ရေးနှင့် ကာကွယ်ရေးစသည့် အမြင် ၄ မြင်ဖြင့် ပြည့်စုံစွာထည့်သွင်း စဉ်းစားတွက်ချက် ဆောင်ရွက်နိုင်ခြင်းမရှိပါက နိုင်ငံတော်အတွက် လိုအပ်ချက်များ ဖြစ်ပေါ်လာနိုင်မည် ဖြစ်ကြောင်း၊ နိုင်ငံ့ဝန်ထမ်း အကြီးအကဲများသည် တာဝန်ထမ်းဆောင်ရာတွင် အထက်ပါအမြင် ၄ မြင်ဖြင့် စဉ်းစားဆောင်ရွက်တတ်ရန် လိုကြောင်း၊ သင်တန်းသားများ အနေဖြင့် အချင်းချင်းဆွေးနွေးခြင်း၊ ဖတ်ရှုလေ့လာခြင်းတို့ကိုတစ်နှစ်တာ ကာလအတွင်း ဆွေးနွေး လေ့ကျင့်ပေးခြင်းဖြစ်သဖြင့် တန်ဖိုးရှိသည့် သင်တန်းတစ်ခုဖြစ်ပြီး နိုင်ငံတော်အတွက် အကျိုးပြုနိုင်သည့် အရာရှိကြီးများဖြစ်အောင် ကြိုးပမ်းကြစေလိုကြောင်း” ထည့်သွင်း ပြောကြားခဲ့သည်။
နိုင်ငံတော်ကာကွယ်ရေး တက္ကသိုလ်သည် နိုင်ငံတော်နှင့် တပ်မတော်အတွက် မရှိမဖြစ်သော သင်တန်းကြီးတစ်ခုဖြစ်သည်။ နိုင်ငံတော်နှင့် တပ်မတော်ကို ဦးဆောင်နိုင်စွမ်း ရှိသူများဖြစ်အောင် သင်ကြားလေ့ကျင့် မွေးထုတ်ပေးရာ တက္ကသိုလ်ကြီး တစ်ခုလည်းဖြစ်သည်။ နိုင်ငံတော်ကာကွယ်ရေး တက္ကသိုလ်သို့ တက်ရောက်ရန်အတွက် သင်တန်းသားများ ရွေးချယ်ရာတွင် ယခင်ကတပ်မတော် အရာရှိကြီးများကိုသာ ရွေးချယ်ခဲ့ သော်လည်း ယခုအချိန်တွင် အရပ်ဘက်နိုင်ငံ့ဝန်ထမ်း အရာရှိကြီးများကိုလည်း တက်ရောက်စေခဲ့ခြင်း ဖြစ်သည်။ အရပ်ဘက်၊ စစ်ဘက် စည်းစည်းလုံးလုံး ညီညီညွတ်ညွတ် တိုင်တိုင်ပင်ပင်ရှိနေမှသာ နိုင်ငံတော်သည် ပိုမိုဖွံ့ဖြိုးတိုးတက်သည့် လမ်းကြောင်းတွင် ရှိနေပေလိမ့်မည်။
မြန်မာနိုင်ငံသည် နိုင်ငံတော်ဖွဲ့စည်းပုံ အခြေခံဥပဒေအရ စစ်မှန်၍ စည်းကမ်းပြည့်ဝသော ပါတီစုံ ဒီမိုကရေစီစနစ်ကို ကျင့်သုံးလျက်ရှိသည့် နိုင်ငံဖြစ်သည်။ နိုင်ငံတော်၏ အခြေခံမူများအဖြစ် နိုင်ငံတော်သည် ပြည်ထောင်စုမပြိုကွဲရေး၊ တိုင်းရင်းသားစည်းလုံး ညီညွတ်မှုမပြိုကွဲရေး၊ အချုပ်အခြာအာဏာ တည်တံ့ခိုင်မြဲရေး၊ စစ်မှန်၍ စည်းကမ်းပြည့်ဝသော ပါတီစုံဒီမိုကရေစီစနစ် ထွန်းကားရေး၊ နိုင်ငံတော်၌ တရားမျှတလွတ်လပ်ခြင်းနှင့် ညီမျှခြင်းတည်းဟူသော လောကပါလတရားများ ပိုမိုထွန်းကားရေးနှင့် နိုင်ငံတော်၏ အမျိုးသားနိုင်ငံရေး ဦးဆောင်မှုအခန်းကဏ္ဍတွင် တပ်မတော်က ပါဝင်ထမ်းဆောင်နိုင်ရေးတို့ကို အစဉ်တစိုက် ဦးတည်သည် ဟူ၍ ချမှတ်ပြဋ္ဌာန်းထားပါသည်။
"မြန်မာနိုင်ငံသည် အချုပ်အခြာအာဏာပိုင် လွတ်လပ်သည့်နိုင်ငံဖြစ်သည်}} ဟူ၍နိုင်ငံတော် ဖွဲ့စည်းပုံ အခြေခံဥပဒေအခန်း(၁) ပုဒ်မ ၁ တွင်ပြဋ္ဌာန်းထားသည်။ ဤအချက်သည် နိုင်ငံတွင်း မှီတင်းနေထိုင်ကြသူ အားလုံးအတွက် အရေးကြီးပြီး အဓိကကျလှသည့် အချက်ဖြစ်သည်။ ဘိုးဘွားအစဉ်အဆက်က ခိုင်မာစွာ တည်ဆောက်လာခဲ့သော နိုင်ငံတော်ကို သားစဉ်မြေးမြစ်အထိ ခိုင်မာနေအောင် တည်ဆောက် ကာကွယ်ထားကြရမည်ဖြစ်သည်။ နိုင်ငံတော်ကာကွယ်ရေး တက္ကသိုလ်သင်တန်းသားများ အနေဖြင့် မိမိတို့ဘဝအတွက်၊ နိုင်ငံ့အတွက် အထောက်အကူရအောင် အလေးအနက်ထား ဆောင်ရွက်ကြရမည်ဖြစ်သည်။
မြန်မာနိုင်ငံ၏ သမိုင်းကြောင်းကို ပြန်ကြည့်မည်ဆိုပါက မိမိတို့နိုင်ငံသည် အချုပ်အခြာအာဏာပိုင် တည်တံ့ခိုင်မြဲသည့် ရေမြေပိုင်နက်နယ်နိမိတ်နှင့် ခိုင်မာသည့် သမိုင်းကြောင်း ရှိသည့်နိုင်ငံဖြစ်သည်။ သို့သော် ပညာရေးနှင့် ပတ်သက်၍ အားနည်းချက်များရှိခဲ့ပြီး အတွက်အချက် ပညာရပ်နှင့် စက်မှုပညာရပ်တို့တွင် အခြားနိုင်ငံများနှင့် ရင်ပေါင်တန်းနိုင်မှု မရှိခဲ့သည်ကို အခြေခံ၍ သင်ခန်းစာဖော်ထုတ်ကာ နိုင်ငံအကျိုးအတွက် ဆောင်ရွက်ကြရမည်ဖြစ်သည်။ ကိုလိုနီနယ်ချဲ့နိုင်ငံများ အနေဖြင့် မြန်မာနိုင်ငံ၏ သယံဇာတရင်းမြစ်များကို ရယူလိုမှုဖြင့် နယ်ချဲ့ခဲ့သည်။ ကိုလိုနီနိုင်ငံအဖြစ်တွင် ယခင်က စည်းလုံးညီညွတ်နေသော တိုင်းရင်းသားများကို နယ်ချဲ့တို့က သွေးခွဲအုပ်ချုပ်ခဲ့သည်။
နိုင်ငံတစ်နိုင်ငံဖွံ့ဖြိုး တိုးတက်ရေးအတွက် လိုအပ်ချက် များစွာရှိရာတွင် အဓိကအားဖြင့် နိုင်ငံရေး မောင်းနှင်အား၊ စီးပွားရေး မောင်းနှင်အားနှင့် ကာကွယ်ရေး မောင်းနှင်အားများ ကောင်းမွန်နေရမည်ဖြစ်သည်။
နိုင်ငံတော်စီမံအုပ်ချုပ်ရေးကောင်စီသည် နိုင်ငံတော်ဖွဲ့စည်းပုံ အခြေခံဥပဒေနှင့်အညီ နိုင်ငံတော်တာဝန်များကို ဦးဆောင်လျက်ရှိရာတွင် အဆိုပါမောင်းနှင်အား သုံးရပ်လုံး ဖွံ့ဖြိုးတိုးတက်အောင် ကြိုးပမ်းဆောင်ရွက်လျက် ရှိသည်။ နိုင်ငံရေးရည်မှန်းချက် ၂ ရပ်၊ အမျိုးသားရေးရည်မှန်းချက် ၂ ရပ်ချမှတ်၍ အကောင်အထည် ဖော်လျက်ရှိသည်။ နိုင်ငံတော်အား ပါတီစုံဒီမိုကရေစီ လမ်းကြောင်းပေါ်တွင် ခိုင်မာစွာ ဆက်လက်လျှောက်လှမ်းနိုင်ရေး အတွက် လွတ်လပ်၍ တရားမျှတသည့် ရွေးကောက်ပွဲ ကျင်းပပေးနိုင်ရေး ကြိုတင်ပြင်ဆင်ဆောင်ရွက်လျက်ရှိသည်။
နိုင်ငံဖွံ့ဖြိုးတိုးတက်ရေး အတွက် ရည်မှန်းချက်များနှင့် ဦးတည်ချက်များ ချမှတ်အကောင်အထည် ဖော်လျက်ရှိရာတွင် နိုင်ငံတော်၏ အနာဂတ်အတွက် ပညာတတ် လူသားအရင်းအမြစ်ကောင်းများ မွေးထုတ်ပေးနိုင်ရေးကိုလည်း ဦးတည် ဆောင်ရွက်လျက်ရှိရာ နိုင်ငံတော် ကာကွယ်ရေးတက္ကသိုလ်သည်လည်း ပါဝင်သည်။ အနှစ်ချုပ်ဆိုရသော် နိုင်ငံတော် ကာကွယ်ရေးတက္ကသိုလ်မှ သင်တန်းသားအရာရှိကြီးများ အနေဖြင့် အမြင် ၄ မြင်ဖြင့် နိုင်ငံတော်၏ ကောင်းကျိုးများ သယ်ပိုးဆောင်ရွက် အောင်မြင်အောင် ထမ်းဆောင်နိုင်ကြရန် ဖြစ်ပါကြောင်း ရေးသားလိုက်ရပေသည်။ ။